ائلیمیزین نغمه کاری – چاي اوغلو

بهروز دولت­آبادي چاي اوغلو تخلوصو ايله آذربايجان چاغداش ادبياتي و موسيقي­سينده اؤزه ل بير يئر توتور. شوبهه سيز چاي اوغلو ۴۰ و ۵۰ نجي ايللرده آذربايجان مبارز يازيچيلاري آراسيندا گؤركملي سيمالاردان­دير و صمدگيل­دن آد آپاراندا «بهروز» آدي غملي تارييلان آدي چكيلمك‌ده‌‌دير. بوتون ايران ضيالي­لاري اونو تانيياردي. بهروز چاي اوغلو اؤزه­ل تاري ايله، توتغون و چكيجي سسي ايله آذربايجان خالقي نين دردلريني چيغيريردي و گؤزه­ل شعرلريله مبارزه يوللاريني آچيردي. اونون اودلو شعرلري اللرده گزيب، سينه­لرده يئر توتوردو. آنجاق بوگون صمدگيل دن قالان ده­يرلي بير ياديگاردير. او، بوگون ده يازيب يارادير، هله ده شعرلريندن صمد قوخوسو گلير، سانكي اوره­يي اونلارلادير. انقلاب عرفه­سينده چاي اوغلو بوتون مبارزلرين ييغينجاقلاريندان انقلاب سه­سيني قالديريب آذربايجان آديني بؤيوتموش و موسيقي كاسئت­لري اللرده گزيردي. چاي اوغلو آدي اينقيلابي موسيقي و آذربايجان سه­سي كيمي تانينيردي. چاي اوغلونون شعرلري انقلابدا«مجموعه» آدلي كتابدا اللره چاتدي. بورادا اونون ۸ شعري گلميشدير و بونلار آذربايجان شعري­نين ده­يرلي اؤرنك­لري  اولاراق اللره دوشدو. اونون مبارز سسي بو شعرلرده سسله­نيردي:

نه قده رمني ازسه­لر

توتوب ديليمي كسسه­لر

قانيمي ناحق تؤكسه­لر

ال چكمه­رم، باغيرارام

ائل اوبامي چاغيرارام.[۱]

چاي اوغلو فرياد قوپارير و خالقيندان ايسته­يير سسينه- سس وئره­ن اولسون:

سسيمه سس وئر منيم

بوتون ائللر ياشيل چؤللر

خوش نغمه­لي سازدا تئللر

گؤزه­ل اوزلو

شيرين ديللر.[۲]

چاي اوغلو اؤزو دئميشكن هارايدان هاراي آلير، ائلين قوينونا دالير، اونلاردان الهام آلير، سازي ايله، سؤزو ايله اوره­كلره اود جالير. وطنين سئوگي سيني آتا بيلمه ييب و بئله سؤيلور:

منيم يوردوم آذربايجان

داغلاري­نين اوره­يي قان

جيرانلار اويلاغي موغان

اينان بو سؤزومه، اينان

دويا بيلمز سنون بالان-

آي ساوالان-

آي ساوالان-

آي ظالم­لردن،

باج آلان![۳]

چاي اوغلو ائلينه- خالقينا وفالي قالير. او، اؤزونو ساوالان بالاسي بيليب، ساوالان كيمي اوره‌يي قانلي، باشي توفانلي و  اته­يي چايلي­دير . اؤزونو ائل شاع­ري بيلن چاي اوغلو بئله سؤيلور:

من ائل عاشيقي يم،ائل شاعري­يم

آديم چاي اوغلو دور، اليمده سازيم

يوردوم آذربايجان اودلاري دياري

او دوركي اودلودور منيم آوازيم.

ماراقلي بوراديركي چاي اوغلو، سازيلا- آوازيلا آذربايجان درديني چيغيرير، فرياد چكير و همان سازا اوزونو توتاراق درديني اونا سؤيلور. شاعيرين چوخلو شعرلري سازينا خطاب سؤيله­نميشدير. اونونلا دانيشاندا اوره­ك سيزيسي­ني ائشيتمك اولور:

سوسما، دانيش

كوسمه، باريش

آي سينه­سي يانيق سازيم

درده وئره­ن قانيق سازيم

سؤيله منه:- دردين نه­دير-

سرّين نه­دير؟

چاي اوغلونون شعرلري­نين هاميسي، استثناسيز خالقيميزين درديندن ديله گلمه­ده­دير.

[۱]  مجموعه، سايي ۱، تهران، آذربايجان يازيچيلار جمعيتي، ۱۳۵۷، ص ۹٫

[۲]) همان، ص ۱۱٫

[۳]) همان، ص ۱۴٫

ارسال دیدگاه