ائلیمیزین کوراوغلولاری – حبيب فرشباف     

صمد گيل‌دن دانيشاندا، اونلارجا يوخ، بلكه يوزلرجه دوشونجه‌لي معلم، مبارز شاعردن آد آپارماق لازم­دير. بونلاردان بيري ده حبيب فرشباف­ديركي درسيني بيتيرديكدن سونرا، آذربايجانين كندلرينده، يوخسول كند اوشاقلاريلا بيرگه ياشاييب، بيرگه زحمته قاتيليب و كند كوتله‌لري نين درد- كدرلريني بوتون ايليك‌لريله دويوب و اونلاري دوشونجه‌لي بير مباريزه‌يه حاضيرلاشديرميش‌لار. حبيب كتلي­لره، اؤزه‌لليك­له اوشاقلارا درين محبت بسله‌ييب و ملي- صنفي دوشونجه‌ني اونلارين قانينا قاتميش و دوشمنين نفرتلي اوزونو اونلارا تانيتديرميشدير. آنجاق اونو شعرلريله تانيماق ايسته­ديگيميز زامان شعرينه مراجعت ائتمه­ميز گره‌كير.

حبيب، صمد گيلين جرگه­سينده ساييلير . اونون دا شعرلرينده، غدار شاهين سيماسي، شاهليق رژيمي‌نين چيركين چهره‌سي آيدينلاشير. خالقيميزدا بئله بير چيركين نظاما نيسبت نفرت يارادير. حبيب ايلك آدديملاردان اوخوجولاريني گونش كيمي نورساچماغا وقارانليق گئجه‌لرين گوندوزه ساري قاپيلاريني آچماغا چاغيرير و بئله ديله گلير:

بو نئچه گون عمرده، گونش تكي نورساچاق

قارانليق بو گئجه‌يه، گوندوز قاپيلارين آچاق.[۱]

حبيب دونيا گؤروشلو بير شاعير كيمي چيخيش ائدير، اونون وطني دنيا بويوندا و خالقي بوتون ملت‌لر و انسانلاردير. او، جانيني بشريت عالمينه قوربان ائتمك اوچون بو دنيايا گلميش و اؤزونو «دنيا اوغلو» آدلانديراراق دئيير:

بو گئنيش سولار ايچينده

نه كي وار قورولوق، دنيادير آدي.

وطنيم دنيا دير، من دنيالي­يام

دونيا ايشچي لرينه

من قوربان اولمالي يام.

حقلي انسانلارا قارا بير قولام

بشريت جانلي بير جسم ديرسه

من ده وجودوندا بير آغ قولبولام.[۲]

حبيب ۱۳۲۳ ده تبريزده آنادان اولوب و تبريزين ان بوغونتولار چاغلاريندا مبارز معلم‌لر جرگه‌سينه قاتيليب و خالقيميزين مبارزه­سينده اؤن سيرالاردا دايانميشدير. آذربايجان شعري‌نين متعهد ادبياتيني قوللاناراق، شعرين مبارز قولوندان ياراتماغا جان آتميشدير. شاهين، خالق آراسيندا دووارلار چكديگي بير زاماندا، شاعر دووارلار ييخماغا چاليشير و بئله اينانيركي:

دووارلار اولماسايدي

گونش پنجره ميزده

سحر ائركن دوغاردي.

دووارلار اولماسايدي

مئه گتيره‌ن سلامدان

مين سعادت ياغاردي.

دووار آيريليق سؤزو

دووار هيجران آيه‌سي.

شاعر بونو دوشونوركي چوخلو دووارلار، تاريخ بويو يارانان دووارلار، انسانلارين جُمجُمه لريندن، انسانلارين قول- قيچلاريندان يارانميش و هر بير كرپيچي انسانين ال- آياغيندان دوزه‌لميشدير و يئنه اينانيركي:

دوستو دوستدان آييرمير

نه اوجا داغ، نه دره

لاكن شوبهه دوواري

آييرميشدير مين كره.

بئله بير دوروم اولورسا، شاعر دوستلاريني بئله چاغيرير:

محكم اولسون اليميز،

ديرناقلار گئچسين اته

قويماياق دووار چكه

شبهه، بو صداقته.

               ***

قويماياق كي بين توتا

دوشمن دسيسه‌سي، بيز.

قوي بير گولسون گؤزوموز

بير دؤيونسون قلبيميز.

حبيب خالقيني اوره‌كدن سئوير. هر زاد خالقيني اوندان اوزاقلاديرسا، شاعر اونونلا قارشي قارشييا دايانير. او، ساده سامانچي قيزيني – اؤز ائليندن اولدوغو اوچون – بوتون دنيا گؤزه­للريندن گؤزه‌ل بيلير، حتا ژوكونددان دا گؤيچك سانير. شاعر سامانچي قيزيني او قده‌ر گؤزه‌ل بيليركي ژوكوندو آلايا آلير:

سن اي گؤزه‌ل ملك، سامانچي قيزي

هئچ سن بيليرسن مي، اگر بير كره

ژوكوند گؤرسئيدي سنين اوزونو-

جيران باخيشيني- شوخ گولوشونو-

داها عمر بويو گولومسه‌­مزدي؟

لوور موزه‌يينده داها او زامان

باشين تيكردي يئره،

سن يادينا دوشنده.

[۱]) ح . فرضباف، دان يئري، تبريز، ۱۳۵۷، ص ۷٫

[۲]) همان، ص ۱۱٫

ارسال دیدگاه