ائلیمیزین سؤنمز شئعر اوجاغی

كريم مشروطه­ چي سؤنمز تخلصي ايله بوگونكو آذربايجان شعري­نين ذيروه­سينده دايانان محتشم شاعرلريميزين بيريسي­ديركي ۱۳۰۷ جي ايلينده تبريزده آنادان اولوب، زمانه­ميزين ائنيش- يوققوشلو آخيميني دالدا قويوب، توفانلاري باشدان كئچيريبدير. شاه رژيمي­نين استبداديندان قاچا بيلمه­ييب. دوستاقلارا سورگونلره ده معروض قاليبدير. آنجاق بير آن دا سوسماييب، حالقيميز اوغروندا دايانمادان چاليشيبدير. شاه دوورونده «آغير ايللر» شعري دفتريني يازان شاعر، انقلابدان سونرا، «آمان داغلار»، «شئح مونجوغو»، «عيسانين سون شامي» «بو ياشدا» شعر اثرلريني خالقينا اتحاف ائتميش، نثر ساحه­ سينده ده بؤيوك باجاريليقا «حسرت چلنگي» و «املاميز حاققيندا» اثرلري ياراتميشدير. بونلارلا برابر «حيدر بابايا سلام» ين فارسيجايا شاعرانه ترجمه­سي، شاعيريميزين شعريت كارنامه­سيني داها زنگين­لشديرير. ايللربويو- وارليق درگي­سينين اكثر نمره ­لرينده ده­ يرلي مقاله­ لريله چيخيش ائدير.

سؤنمزين شعرلري شاهين بوغونتولو زامانيندان بوگونه قدر ديللر ازبري اولوب و چوخلو شعرلري بوگون موسيقي­ميزده سسله­ نير. اونون درين توپلومسال گؤروشلري، نجيب شاعرانه دويغولاري، انسان سئوه­ رليك فكرلري هر اوخوجونو جلب ائدير و شاعريميزي اوره­ ك­لرده ياشادير. شاعرين الهام قايناغي، گرچك حياتدان گؤروب- گؤتوردويو تجربه­لر، تاثيرلنديگي حادثه‌لر و ياشانتي‌لار اولموشدور. شعريلرينده ياشايان دوشونجه­ لرين ماياسي گرچك حيات اولموشدور. شاعرين ايلك اثري اولان «آغير ايللر» ۱۳۵۶ جي ايلنده يارانيب قورتارير. بو اثر، «حيدربابايا سلام» ساياغيندا و فورماسيندا اولاراق ۱۷۴ بنددن عبارت­دير. بو اثرين محتواسي ملي دويغولارلا دولودور و خالقيميزين باشيندان كئچيرديگي اولايلار بوردا ديله گلير و شاعرين شعره اوز گتيرديگي نه دن‌لر ده سؤيله­ نيلير.

اوگوندن كي ديلم «لهجه» ساييلدي

ياتميش طبيعيم بير ديسكينيب آييلدي

بو آييقليق اؤلكه ميزه ياييلدي

دامارلاردا غيرت قاني قاينادي

پاسلي قلم اليميزده اوينادي[۱]

آنجاق شاعر ۱۳۳۳ ايلينده بير فارسيجا ماهنيدان الهام آلاراق آشاغيداكي شعري يازميشديركي او آغير ايللرده داغچيلارين ديللرينده اوخونوردو:

آچيل سحر

اويان گونش

آچيل بوسون نفسده

بو قارانليق قفسده

سن ايله من تاپيم يئني حيات

ايشيقلارين ساچيلسين

چيچك­لريم آچيلسين

بو ائللره باغيشلاسين نجات….[۲]

سؤنمزين نئچه شعري اوستاد علي سليمي­نين و حسن دميرچي­ نين آهنگ­لري ايله بسته­ لنميشدير.

شاعرين انقلابدان سونرا ايلك اثري «عيسانين سون شامي»  دير. بو اثر چاغداش  شعريميزده بير ده‌يرلي حادثه­ دير چونكي بير منظومه اولاراق درين معنالي سؤزلري دئمك ايسته­ يير. شاعر اوز گؤردويوندن دانيشار. بيرگون ميانادا بير چاخير ايچه­ني شاللاق وورورلار. چاخير ايچه‌نين با لاجا اوغلو آتاسي‌نين شاللاق وورولماسيني گؤرور.  تاثرله­نير. آنجاق شاعر بو اولايدان الهام  آلاراق عيسانين سون شامي داستانيني قلمه آلير. بئله يازيركي لئوناردو داوينچي مشهور ايتاليا هئيكل تراشي «عيسانين سون شامي»  تابلوسونا چكمه­ يه باشلايير. آنجاق اونا مودئل لازم­دير. ايلك اؤنجه ائله بير آدام لازيم دير گؤزه ل، تميز، نجيب و پاك بير انسان اولاراق عيسا اوچون مودئل اولماغا لاييق اولا. داوينچي گزير- دولانير- بير گنج و گؤزه ­ل اوغلانا راست گليركي گؤزه­لليك­ده، متانتده، و وقار و نجابت  سمبلي كيمي اولابيلر، صداقت، صميميت و پاك‌ليق اوز- گؤزوندن تؤكولور. صنعتكار اونلونلا دانيشير و مودئل اولماغا راضي­لاشير. تابلونون بير بؤلومو قورتارير. صنعتكار۱۲ نفر تابلودا اولان شخصيت‌لر اوچون مودئل تاپير تابلوسونو يارادير، آنجاق يهودا اوچون بير مودئل تاپمالي دير. بونا ائله بير آدام لازمديركي خيانت، خبيث‌ليق، جنايت اوز، گؤزوندون تؤكوله. فتنه، فساد، هر جوره پيس عمل­لرين سيمبولو اولابيله. گزير- دولانير، بئله بير آدام تاپا بيلمه يير.

آيلار- ايللر كئچير، آنجاق مودئل تاپا بيلمه‌يير. داها، داوينچي بو تابلودان واز كئچير و تابلونو قورتارماميش بوشلايير. ايللر كئچر، آيلار اؤتور، ۲۰ ايلدن سونرا، داوينچي داها ايسته­يير بو تابلونو قورتاريب، قيراغا قويسون، يئنه باشدان بير مودئل اولماق اوچون بير آدام  داليجا گزير. گونلر بونا وقت صرف ائده ­رك، بيرگون بير آدام تاپير كي اوغرولوق، جنايت و مختلف  فسادلارا متهم اولموش، اؤزونده چيركين، كثيف اولاراق اوز- گؤزوندن خيانت و خباثت ياغير. بوندان ياخشي مودئل يهودا اوچون تاپا بيلمزدي. ياخينا گئديب، هر بلايا دؤزور و اونو راضي­لاشديرير. بو آدام گليب داوينچي كارگاهيندا مودئل اولور. داوينچي تابلوسونا چكير – قورتارير. سونوندا بير پول مودئلين اووجونا قويوپ يولا سالماق ايسته­ يير، بو آدم دايانير، تابلويا باخير و صنعتكاردان سوروشور: يادينيز داديرمي بيرگون بو آداما – عيساني گؤسته­ ره­ رك- موئدل اولدوم؟

داوينچي يئريندن شاشير: نئجه اولابيلر بير نفر عيسانين پاكليغي، معصوملوغو و گؤزه­ ل­ليينه سمبول اولان بير كيشي، بوگون- اييرمي ايلدن سونرا- يهودانين خيانت و پيسليك سيمبولو اولا؟ مودئلين اليندن ياپيشيب اورتورماغا چاغيرير. او كيشي ده اگله­شيب باشيندان نه كئچرديگيني سؤيله يير و صنعتكار دوشونوركي دوغرودان دوغروسونا بير جامعه و  بير توپلوم باجارا بيلر عيسادان بير يهودا يارادا: اييرمي ايلده عيسانين باشينا گتيره‌ن بلالار، اونو يهودايا چئويرميش!

شاعر، بورادا جامعه­ميزه اوز چئويريب، عيسالاريميز پاك و نجيب ساخلاماق اوچون جامعه­ميز اصلاح ائتمه­ يي ايسته­يير و بير كيشيني چاخير ايچمك اوچون شاللاقلاماسيني، ائله عيساني يهودايا چئويرمه پروسئسينده بيلير. شاعر بورادا بئله بير داستاني ياراتماقلا اؤز اجتماعي پياميني وئرير.[۳] چاغداش ادبياتيميزدا بئله منظومه‌لر چوخلو ده­ير و اؤنمه مالك­ديلر. شاعرين بورادا ديلي‌ده چاغداش و دوشونمه‌لي­دير. سؤنمزين انقلابدان سونرا ايكي اثري «شئح مونجوقو»[۴] و «آمان داغلار»[۵] چاپ اولدو و سونرا بو ايكي اثر بير كتابدا چاپ اولدو[۶]. بورادا يازيلان شعرلر شاعيرين شعريت گوجونو سيناماق اوچون بير ميدان  اولموش و سؤنمز شاعرليك گوجونو بورادا سيناميشدير. باياتي ساياغيندا- ۷ هيجالي- يازديغي شعرلري مونجوق آدلاياراق چوخلو مونجوقلار، دؤردلوك­لر و روباعي­لر يارادير. بير نئچه شعرده بو قايدادان قيراقدا اولاراق واردير، اؤرنك اوچون بوشعري:

قويون دئييم نيه منصوري چكديلر داره

او، حقي بير اوجا يئردن آراماق ايستردي

گؤروب ياتاقدا ياراشماز قووشسا دلداره

اولو مقامينا يارين، ياراقا ايستردي

شماتت ائيله­مه­سينلر، نه اونا، نه ياره

دارين ديبينده ده زولفون داراماق ايستردي.

آغ اوزله قارشيلاري داري اول ساچي قاره

قارا اوره­ كلري بلكه قاراماق ايستردي.[۷]

سؤنمزين بيرسيرا شعرلري او قدر اوره­يه ياتان و گؤزه­ ل دويغولارلا دولقوندوركي خالقين ديلينده ازبرله­نيب و ماهني كيمي اوخونور، او جمله‌­دن “سنسيزله­ ميشم” شعريني آد آپارماق اولار:

بير گؤيرچين كيمي دنسيزله­ ميشم

بولبولم يازدا چمنسيزله­ ميشم

اسكي­دن شانلي  شرفلي ائل ايديم

ظالمه قارشي آمانسيز سئل ايديم

ذيروه­سي چنلي دومانلي بئل ايديم

ايندي مدّتدي كي چنسيزله­ ميشم.

منده اردملي ارنلر ياشاميش

ستارا، بابكه تنلر ياشاميش

او قدر ائلجه بيلن­لر ياشاميش

ايندي من ارسيز، ارنسيزله­ ميشم.

حيرته دالديرار انساني، دئسم

درديمين يوخ آدي، عنواني دئسم

باشقابير سؤزله بومعناني دئسم

اؤز دياريمدا وطنسيزله­ ميشم.

درد مني يانديرير اما اودو يوخ

اودور، آغزيمدا حياتين دادي يوخ

دئميرم دردلر ايچينده آدي يوخ

دئييرم: من بئله منسيزله­ ميشم.

اي منيم منليگيم امداديما يئت

بيرجه گل، منله قووش، داديما ئيت!

مني باس باغرينا فرياديما يئت

بيلميسن كي نئجه سنسيزله ميشم.[۸]

سؤنمزين ديلي چوخ آخيجي، روان، شعرلري آخساقسيز، محكم­دير، محتوا جهتيندن ده شاعر درين دوشونجه­ سيندن، ملي باخيشيندان و اجتماعي گؤروشوندن آسيلي اولاراق، يوخاري سويه­ ده­ دير؛ بلكه ده چاغداش شعريميزين ذيروه ­سينده دايانان اثرلردن دير. شاعرين اوجا همتي، و وقاري و سارسيلماز اوره­ييني شعرلريندن اؤيره­نه بيليريك:

يارانيشيم بوراخيلسا  اؤزومه

آي اولمارام، او، گونشدن پاي ايستر

گونش اولارام، ائل قيزيشار كؤزومه

ايشيغيندان اولدوز ايستر، آي ايستر…

سؤنمز، شاعرين نئجه اولدوغونو «آمان داغلار» اثرينده مقدمه يئرينه يازديغي «شاعر دئديگين…» شعريندن آلماق اولور. او، شاعر حقينده بونا اينانير:

شاعير دئديگين آخماسا آل قال اوره­گيندن

بير گُل دره بيلمز او، گلستان اوره­گيندن

قان اولماسا كؤنلو  گئجه­لر قانلي شفق تك

البته آچيلماز سحري دان اوره­ گيندن…

 و نهايت شاعرين پيامي انسان سئوه­ رليك­دير و بئله فرياد چكير:

انساني دا بير سئو! اگر آللاهي سئوه رسن

آللاه يولو، والله كئچر انسان اوره­ گيندن.

سؤنمز ائله بير شاعرديركي اطرافيندا گئنيش بير باخيشلا باخير، داريسقال بير يولدان كئچمك ايسته­مير، دنياسي بؤيوك، مئيداني آچيق و فكري درين بير انسان­دير. اؤزونو بئله بير دونيا ايله باريشديرميشدير. اليندن گله‌ني‌ده اسير گه‌مه­ميش، اوياخشي شعر دئمكله برابر، ياخشي خط يازير،  رسامليق ائدير.  بوتون ساحه­لرده صاحيب نظر دير. املاء حقينده نظر صاحبي­دير و بو زمينه‌ده «املاميز حقينده» اثريني ده يازميشدير. هر حالدا بيز اونونلا موافق اولماساق دا، سؤنمز بير چرچيوايا باغلي و صاحب­نظردير. كتابلاري­نين سون چاپلاريندا اؤز نظرلريني اعمال ائتميشدير.

شهريارين حيدرباباسي‌ني چوخلو شاعرلريميز فارسيجا يا چئويره‌رك هاميسي اعتراف ائتميشلركي حيدربابانين گؤزه لليگي، طراوتي و شرينليگي اونون ديلينده دير و فارسيجا يا چئورمه ده هيچ كيم همان شرينليگي و گؤزه‌لليگي منتقل ائده بيلمه ميشدير. آنجاق سؤنمزين ترجمه سي بوآرادا گؤزه گله ن و ياخشي ترجمه‌لردن بيريسي ساييلير.[۹]

سؤنمز نثريميزله ده ادبياتيمزا يارديم­ليق ائتميش و گؤزه­ل قلمي ايله نثريميزدن زامانلا آدديملاماغينا يارديمچي اولموشدور. اونون «حسرت چلنگي»  اثري سفرنامه سي اولاراق ده يرلي نثر اثرلريميزدن  بيري ساييلير. شاعير ۱۹۶۶ جي ايلده باكييا چاغيريلير و اون گون لوك بير سفره چيخير.[۱۰] سؤنمز بو سفردن آلديغي ائتكي­لري قلمه آليب و گؤروشدويو عاليم لر، شاعير لر و  و صنعتكارلارين تانيتديرماغيندا آخيجي قلم ايله معلومات وئرير[۱۱]. بو ده يرلي كيتابدا نثرو و معلوماتدان علاوه چوخلو شعرلرله- شاعيرين اؤز شعرلري و گؤروشديو شاعرلرين شعرلريله اوز- اوزه گليريك.

سؤنمز بير محقق كيمي ده چاليشيب، وارليق درگي‌سي­نين مختليف ساييلاريندان درين مضمونلو مقاله‌لرله چيخيش ائده‌رك؛ گؤزه‌ل ديل ايله نثريميز  ساحه‌سينده چاليشيبدير. سؤنمزين حيدربابا حاققيندا دانيشيغي بير مستقل كتاب[۱۲] كيمي ياييليب و خالقيميزين آلقيشيني دا قازانيبدير. سؤنمز بو دانيشيقدا، درين معلوماتيني ترجمه حقينده دوشونجه­سيني و ائليميز حاققيندا دويغوسونو آيدينجاسينا گؤسترميشدير.

سؤنمز «ايملاميز حقينده»[۱۳] كتابيندا اؤز دويدوغو دوشونجه‌لري ايره‌لي سورموش و يازي قايدالاريني بيان ائتميشدير.

سونمز وارليق يازيچيلار هيأتي عضولريندن اولوب و ياخيندان اشتراك ائتميشدير. بيرسيرا يازيچيلار سؤنمزين «بابام اؤزو گله جكدير» و «يئني يوللار آچان داغچي» پوئمالاريني اونون سياسي اثرلري آراسيندا اؤنملي و ده­يرلي ساييرلار. [۱۴] همين اثرده اوخويوروق: «اوخوجولارا خاطرلاديريق كي سؤنمزين بوتون شعرلري مضمون اعتباريله وطنين و خالقين خوشبخت­لي­يي، آزادليغي اوغروندا مبارزه­يه حصر اولونموشدور. شاعيرين «سؤنمز» تخلوصودا محض بونونلا باغلي‌دير». [۱۵]

[۱]) سؤنمز، آغير ايللر، تبريز، ۱۳۵۸، ص ۷۸٫

[۲]) آغير ايللر، تهران، چاپ دوم، تهران، ۱۳۸۱، ص ۲۳٫

[۳]) سؤنمز، عيسانين سون شامي، تبريز، ۱۳۵۸٫

[۴]) سؤنمز، شئح مونجوغو،، تبريز، ۱۳۷۴٫

[۵]) سؤنمز، آمان داغلار، تبريز، ۱۳۷۴٫

[۶]) سؤنمز، كريم مشروطه‌چي، شئه مونجوغو و آمان داغلار، تهران، ۱۳۸۱٫

[۷]) همان، ص ۴۴٫

[۸]) سؤنمز، همان، ص ۱۲۷٫

[۹]) اوستاد شهريار، حيدربابايا سلام، ترجمه كريم مشروطه‌چي، تهران،    ۱۳۷٫

[۱۰]) سؤنمز، حسرت چلنگي، تهران، ۱۳۶۶٫

[۱۱]) سؤنمز بو كيتابيندا باكي سفري‌نين قيدلريني قلمه آلاراق، شاعيرلرله ده مشاعيره‌يه قاتيلير. او جمله‌دن نبي خزري، زليم خان يعقوب، صابر رستم خانلي، ناظم رضوان، حكيمه بلوري، ماهرخ مراداوا، بالاش آذر اوغلو، مدينه گولگون، نريمان حسن زاده، ميرزا ابراهيم اف، رضا آنار، سهراب طاهر، بختيار وهاب زاده، مهمان علي يف و باشقا شاعير و عاليم لرله گؤروشوب، اونلارلا شهر اتحاف ائديب، اونلاردان جاواب آلميشدير.

[۱۲]) مصاحبه، محمدرضا هيئت و سؤنمزين حيدربابا حقينده، دانشيقلاري، وارليق درگي‌سي‌نين اؤزه‌ل ياييملاري، تهران، ۱۳۸۰٫

[۱۳]) كريم مشروطه‌چي، املاميز حقينده، تهران، ۱۳۸۳٫

۱) جنوبي آذربايجان شعري آنتالوژيسي، جيلد ۴، باكي، ۱۹۹۴ ، ص ۱۴۶ .

۲) همان.

ارسال دیدگاه