ائلیمیزین باریشماز شاعیری

آذربايجان چاغداش ادبياتي‌نين ده‌يرلي و گؤركملي شاعرلريندن بيريسي حيدر عباسي- باريشماز تخلوصوايله، نئچه- نئچه اثرلر ياراداراق و هر اثرينده خالقي­نين تاريخ بويو ايستك­لريني ديله گتيره‌رك، وارليغيندان مودافيعه ائدير. اونون هانسي اثريني اله گؤتوردوكده، شاعيرين داياخلي، متين، عيني حالدا كنايه­لي ديلي ايله اوز – اوزه گليريك. حقيقت بودوركي اونون هر بير شئعرينده درين معنالار، سؤزجوكلرين بوللولوغو، شاعيرين حماسي ديلي و معلوماتي نين چوغلوو هر اوخوجونو اؤزونه چكير. باريشماز دوشونجه لي شاعردير، عاطفه­دن و دويغودان چوخ، فكر دنياسيني شعرينه جالاميشدير. دوشونجه‌لي اولدوغو او چون شعرلري باشدان آياغا كنايه، استعاره، تمثيل، آتالارسؤزو ايله دولودور و ديلي، باشقا شاعرلردن آرالي اؤزونه مخصوص­دور. كنايه­لي ديلي بوتون اثرلرينده جانلانير و شاعرين ديل اؤزه­لليگينه چئوريلير .

حيدر عباسي ۱۳۲۲ جي ايلده، شاعر «سهند» ين يوردوندا دوغولموشدور[۱]: ورووين كندي- ماراغانين ياخينليقيندا، «ورووين» گون توتان يئر معناسيندادير. شاعر اؤزو، آنادان اولدوغو يوردو بئله توصيف ائدير: گون چيخاندا، مراغاندان ورووييه باخان اولسا، كندي گؤره­ر گون اؤنونده ايشيلدايير، گون‌توتاردير. ورووي‌نين چوخ ايمانلي، توپوردويون يالامايان، سؤزلرينه ييه دوران، قوناق سئوه‌ر، اللري­نين قابارينا آند ايچمه­لي، دايانمالي آدامي وار. «ائولرينه كيتاب- ميتاب دولانمايان و رووي ده ييرمي ياشي سيناماميش گنج ايگيدلر، آغ ساققاللار، آغ بير چك­لر، اؤز يئرينده هر بيريسي سؤز خزنه­سي، سؤزلوكدولر.» حيدر بئله بير كندده دوغولوب، ياشاييب، ياشادولوبدور، آنجاق بيليم يوردونو يوكسك ليسانا قدر اوخويور و بيليم يوردولاريندا اوستادليق ائدير. آنجاق آلچاق گؤيوللو و باشي آشاغي­ليغي ائليندن آلديغي كيمي ساخلاميشدير. باريشمازين هر هانسي اثريني اوخودوقدا، اونون سؤز خزنه­سي­نين قارشيندا باش ايه­جكدير.

باريشماز، بولود قره چورلو- سهندين يوردداشي اولاراق، عيني حالدا سهند كيمي درين دوشونجه­لي، ايتي قلم­لي و باريشماز بير انسان­دير. شاعر اؤزو سهنددن اؤيره نديگيني خاطرلار:

«من سهندين كتابيني اوخوماقلا، عمر بويو ايتيرديگيمگونلرين بير – بير تاپديم . بو گؤروشون اثرينده وارليغيملاتانيش اولان، معجزه‌لر شهريندن سورگونلويوم باشاچاتدي.» شاعر، سهندي ورووي­لي بيله­رك، ورووي دا بويلاتيب- بؤيومه­ييني بئله ديله گتيرير: «هئچ بير دانشگاهدا، يئر اوزونون هئچ يئرينده سهنده تاي بير بيليجي، بير قوجامان يئتيرمه­يه چيخار يوخدور». شاعر اؤز كنديني بئله تانيتديريرو سهنده وورولدوغونو دا ديله گتيرير: «من اوخويان گون، يازيسي نين ديلين سئوديم، گؤزوم توتدو، قوشوم قوندو … اونون ديلي خالقا تانيش، چوخ- چوخ تميز، جانا سينه­ر، شيرين ايدي. سؤزلرينده بيروووز سؤز گؤزه ده­يمز».[۲]

بوراسي گؤزه‌‌لديركي باريشماز اثرلريني يازمادا سهنددن الهام آلير. ايكيسي بير بولاقدان سو ايچيرسه‌لر، باريشماز، سهندين ديلي خزنه­سيني يارارلاناراق. اثري­نين موضوعونو دا سهنددن آلير و بئله دئيير: «بو كيشي نين- سهندين- سفره­سيندن يئديگيم هئچ، جيبيمه ده دولدورموشام. كيتابي مين آديني دا سهنددن بورج آلميشام. «چاغيريلماميش قوناقلار».[۳]

باريشماز بو اثريني، سهندين «سازيمين سؤزو» اثرينده «تپه گؤز»ه يازديغي اؤن سؤزدن آلميشدير. سونرا اؤز اثريني سهندين اؤن سؤزو ايله توتوشدوروب بئله يازير:

«ايري اوتوروب دوز دانيشاق، آز حجملي اونون شعري چاغيرلماميش قوناقلارا كؤلگه ساليب، ياخود شاملو دييه‌ن كيمي: «دريا اونون بارينديغي بير قطره‌يه گيجيك ائدير» يووينجي دير.»[۴]

سهند، تپه گؤزه يازديغي اؤن سؤزده، دده قورقود و اوخوياركن اونون پرسوناژلاريني بوگون آراييب تاپير و اؤزو دئميشكن:

بير داها من

تانيميشام، تانيميشام!

عصريميزين

بير گؤزلوسون!

و ايندي باريشماز عصريميزين تپه گؤزونو تانيتديرير. باريشماز بورادا ناغيل دئيير و قهرمانلاري سمبوليك حاليندا مئيدانا چيخارير. استعمارين شوم آدلاري استعاره و كينايه ايله چكيلير:

«آي تكين» ين لقمان باشلي

يئرين آلتين- اوستون بيلن

قارداشلاري سؤيله ديلر:-بيز نه قولوق

نه ده بيرين قول ايسته ريك.

بيزجه «اوچروم»، «يارقان» دان دا مردارچيدير

بير مثقالا باتمان آلان

خالوار چيدير.

كينايه‌لي دانيشماق، سيمبوللاردان استفاده ائتمك و آذربايجان شفاهي خالق ادبياتيندان فايدالانيب، آتا بالا مثل­لرين يئرلي – ياتاقلي ايشه چكمك، باريشمازين ده­يرلي ديلي­نين اؤزه لليگي دير. اونون ديلي چاغداش شئعريميزده آغير، ووقارلي و محكم بير ديل دير، هر كلمه نين اؤز آغيرليغي وار و دينله­ييجي ياخود اوخوجو هر بيركلمه­ني اوخويوب يا دينله­ينده اونون آغيرليغين دويور. هئچ كلمه يا سؤزجوك بوش يئرينه شعرده گلمه­ييب، بلكه هر سؤزون، هر كلمه نين دقيق بير معنا و دوشونجه­لي ايفاده ائتمك اوچون ايشه آپارميش، بير سؤزو حذف ائديرسك، شاعرين ايسته ديگي مقصددن اوزاقلاشما معنا سيندادير. حتا اونون پرسوناژلاري توصيف ائتمك اوچون ايشه آپارديقلاري‌ دا يئريندن گؤتورمك دوز دئييل، چونكي بورادا اؤز بديعي فكر و ذوقوندان ايشه آپارميش و هر كلمه­سينده بير دوشونجه ياتميش دير.

باريشمازين چاپ اولان اثرلريني بئله سيرالاماق اولار:

  • چاغريلماميش قوناقلار[۵]
  • نغمه داغي و استعمار[۶]
  • اودوملو ديره ك[۷]
  • كعبه وقانلي اذان- يار و نار
  • شرح انور- ايكي جلد[۸]

شاعيرين بير- بير اثرلرينه گؤز گزديرمك، اونون درين مفكوره­سيني، انساني دوشونجه­سيني، سينماز اراده سيني گؤرمك مُمكُندور. بوتون اثرلرينده سيمگه چي ليگي گؤرمك اولور. اونون سمبول‌لاري سؤزجوك­لر اوستونده قورولور و هر سؤزجويون نئچه معنالي اولدوغو، اوخوجونو حيرتده قويور. شاعر بو نئچه معنالي اولماغي دا، شعري­نين موسيقي، آهنگ و وزني اوستونده سئچير و بؤيوك بير صنعتكارليغدا هر مصرعده قويور. دئديگيميز كيمي هئچ مصرعده، شعرين بير كلمه­سيني حذف ائتمك ممكن دئييل، كلمه­نين يئرينه باشقا كلمه قويورساق دا آهنگ و موسيقي پوزولار. باريشماز دوغرودان دوغروسونا، بوتون شعريني همان كلمه­لرله و همان موسيقي ايله يازميشدير و هئچ بير عنصرونه ال وورماق اولماز. شاعر موسيقي و آهنگ سئچمه­ده ده چوخ دقيق اولموشدور. بو آهنگ وريتم اونون شئعرلرينده داستانين ايره­لي گئتمه‌سيله اويغوندور. شاعرين بياني اوصولا حماسي­دير و اونداكي وزن و ريتم بو حالت­لري ايفا ائدير، آنجاق داستانين گئديشيله اويغون اولاراق، وزن ده اونونلا اويقونلاشير. پرسوناژلارين نه حال – روحيه­ده اولدوقلاريلا اويقون، شعرين فورماسي و ريتمي ايره­لي گئدير. داستانين حال و هواسي ده­ييشيله­رك، شئعرين فورمو و ريتمي ده ده­ييشيلير. اونا گؤره­ديركي باش حرامي­نين ديلي – دانيشيغي چوخ گوبود اولاراق، مظلوم ملتيندن دفاع ائده­ن آشيغين ديلي چوخ تميز، يوموشاق و وام دير، حتا شعرين فورمودا ده­ييشيلير. بير يئرده دؤردلوك­لردن يارارلانير، باشقا بير يئرده سربست شعر ميدانا گلير. داستانين پرسوناژلاري­نين حال – روحيه­سيله، شعرين ده هاواسي عوض اولور. اوخوجو دا، بونو تئز دوشونور. شاعر بو هُنري و صنعتي ايله اوخوجولاريلا باخيندان علاقه قورور.

چاغيريلماميش قوناقلار، دده قورقود دا همان تپه گؤز اولاراق، گونوموزون تپه گؤزلري ده استعماردير و اونون ايشلري بونلاردير:

غريبه بير توكان آچيب / ماتاحيني تؤكوب ساچيب

سيلاح وئرير جانلار آلير/پيچاق وئرير قانلار آلير

هر طرفه آتين چاپير/ وه ر هوولادير، ياساق وئرير

خفتان وئرير، ياراق وئرير.

قودوروبن ايشه چكير/ ملت­لري شيشه چكير!

شوشه- شوشه قانين آلير!

استعمار اؤز ايشيني ايره­لي آپارماق اوچون، داخلي قوّه­لردن سئچير. بو قووه لر گره ك اربابيني تعريفله ييب، اونو نچون يول آچسين ويئر دوزه­لتسين. استعمار ايندي بيليركي زورونان سوخولورسا، ائشيگه چيخارتماق امكاني دا واردير، داها بوگون زور، بلكه ده استبداد دوزگون جواب وئرمه­دي، باشقايوللار سينامالي!

باريشمازين بواثرينده ياشاييشين فلسفه­سي­نين درين­ليگينه جوموروق. بو درينليكده، شاعيرين بشري گؤروشونو گؤروروك. او، بير قبيله­دن، حتا بير ملتدن مدافعه ائتمير، بلكه بوتون انسانلاري قوروماق ايسته­يير. بو دا شاعرين انسان سئوه­رليگيندن ايره­لي سورولور. شاعر گؤسته­ريركي مختلف قوه­لر خالقين جانينا دوشوب قانيني سومورور. بير «ديره­ك»ي تاپينان ملتين ايناملاريندان بهره آپاريب، او ديره­يه ايپك شال چولقالار. بو، همان استعمارين كولتور نفوذو اولا بيلر. اونلار بو ديره­يي بزه‌ييب دوزمكله، اؤز وارليقلاريني گيزله­ديرلر:

بنه ك- بنه ك قابارلاري

اطلس لرين آرخاسيندا / گؤزدن ايتير.

ائله بيل كي / سود گؤلونده اوزوب چيمن

ملكه دير.

قول – بوداغي/ داها خلقين

اوره ك ديده ن قابارينا / بنزه­مه­يير.

السيز اونا سؤيكنمكدن/ يولسوز اونا سؤيكه­نيردي.

دؤنرگه سي / دؤنور بيردن

دونن/ باشي آجلاريلا ييغينان اولان

بوگون توخلار

قارينجا تك/ سينه­سيندن ديرمانيرلار.

بئله بير دورومدا هئچ كيمسه دن اعتراض سه­سي قالخمير. چونكي ايپك دسمالين گؤزه­لليگي، يومشاقليغي، ملي منليك­لري­نين اوستون باسديرميش و داها ايگيدلرده واقعيت­لري گؤرمكدن عاجزديرلر. ضيالي­لار دا بير ديره­يي اؤز ملي مقصدلري بيله­رك، تكجه عادت اوزره اونو تاپينسالار مقصدي ايتيره­جك­لر:

هدف اگر/ عادت اؤزه اونودولسا

اوچ بوداغا حرمت ائتمك

يوزلر، مينلر ايشلر كيمي/ بير ده­يرسيز عادت اولار

عادت

حقي آلا بيلمز …

شاعر، «اودوملو ديره‌ك»[۹] پوئما سيندن بئله نتيجه­يه گليب – چيخيركي استعمار، اؤز نفوذ و ايله «ديره‌ك»ين ماهيتي‌ني ده ييشير و عادت­له تاپينان ملت، حتا ضياليلارين اليندن بير ايش گلمير. شاعير، آنجاق بو يوروشلرين قارشيندا دايانماق اوچون، ايگيدلري الي بوش قويمور، بلكه ۷ مشعل حاضرلاياراق، ملتين ايگيدلري­نين الينه وئرير و استعمارلا ساواشا گؤنده­رير.

بو يئددي مشعل، ايران اوسطوره­سيندن آلينان ۷ خوان كيمي­دير. بو يئددي مشعل، ۷ اصل و يا ۷ مرحله­دير. بيرينجي محبت، سئوگي و عشق­دير. ايكينجي دوشونجه، اوچونجو چاليشماق، دؤردونجو دايانماق، بئشينجي مبارزه، آلتينجي عدالت و يئددينجي نفرت­دير. شاعر «اودوملو ديره‌ك» ده دايانمادان سؤزلزيني دئيب‌ايره‌لي آدديملايير و همان كينايه، ايهام، استعاره و سيمبوللاردان يارارلاناراق، اؤز دوشونجه­سيني چاتدير ماغا چاليشير. بونا گؤره گاهدان اوخوجو شاعيردن دالا قالير، چوخ احتمال‌كي شاعر سؤزلريني يئتيرمير، سانكي تله­سيك سؤزونو دئييب ميداندان چيخمالي دير. بونا گؤره ده باريشمازين ديلي بير آز آنلاشيلماز اولور.

بو يئددي مرحله­ني باشدان كئچيرمك اوچون دايانماق گره­ك، آنجاق ادبييات تاريخيندن، هئچ كيم بئله بير شئي­یي گؤزله­مير. آمما نفرت اوستونده دايانماغيميز لازم دير. بيلديگيميز كيمي صمد بهرنگي ده دئميشدير:

«نفرت، محبت كيمي مقدس­دير». دوغرودان دا آتالار دئميشكن نفرت گؤسته­رمه­يي باجارمايان اوره­ك، سئوه ده بيلمز! نفرت دوشونجه­دن يارانير. نفرت دويغو اولورسادا محبتدن بير پيلله يوخاري دير. مسئوليتي دويماقدان، نفرت يارانير. عدالتي قورماق اوچون دوشمني ده آرادان قالديرماق لازم­دير، دوشمنه محبت يوخ، نفرت ايشله­يه بيلر. باريشمازين بوتون اثرلرينده بو نفرتين يئري گؤرسه­نير. چاغيريلماميش قوناقلاردا، نغمه داغي­ندا، كعبه ده بو نفرت مطرح اولور و شاعر ده بئله دوشونور كي:

اوره­ك­لر معبدينده

نفرت اودون ديري ساخلار

محبته اينانانلار!

شاعر بو نفرته، محبت كيمي باغلي­دير و اينانيركي ووروشمادان باشقا بير يولوموز يوخ. دوشمني سارسيتماق اوچون:

دنيا بويو

بير مقدس ووروشمادان

اوزلريميز / دؤنمه­ين­دير.

سينماز

پولاد بارماقليقلار / آرخاسيندان

نفرت اودو / سؤنمه­ين­دير.

بو دويغو و دوشونجه باريشمازين اصيل اؤزه­لليك­لريندن دير. شاعر بونو اينانيركي پيسليك لري، اگري­ليك­لري، خيانت­لري تكجه ساواشلاما قطعيت­له و نفرت­له آرادان آپارماق گره­ك! بونلارلا انسان«باريشماز!».

بلكه ده ائله بوقاطعيت سبب اولموش شاعريميزين شعرلرينده سئومك دويغوسونا آز ميدان وئريليب. سئويب سئويلمك ياساق اولان يئرده نه ائتمك؟:

ايندي كي ياساقدير سئويب – سئويلمك

ياشاماق ايسته­رم نفرته خاطير!

باريشماز ائله – اوباسينا درين محبت بسله­ين بير شاعردير. بو انسان سئوه­ر شاعر، ائل قايغيسيني چكه­رك، ائلي اوياق و داياق ايسته­يير و چاغريلماميش قونلار اثريني بو بند ايله بيتيرير:

ياد ساخلاماز ائل – اوبانين هاواسين

باشا آليب ازديرمه يين آماندير.

ائللر آرا بئلنچي بير مثل وار:

چاغريلماميش قوناق سئلدن ياماندير.

بو اثري ۱۳۵۶ جي ايلده بيتيرميشدير.

شاعيرين ۹-۱۳۷۷ ايللرينده يازديغي اثري «كعبه و قانلي اذان»[۱۰] و باشقا بير منظومه «يارونار»[۱۱] آديلا چاپ اولموشدور. بو اثرينده شاعرين ديني گؤروشلريله اوز- اوزه گليريك.

باريشمازين بوتون اثرلري­نين ترسينه بو ايكي منظومه دؤرلوك­لردن تشكيل تاپميش، كعبه ۱۷۰ بند و «يار و نار» ۴۸ بندير. بو ايكي منظومه­ده شاعر، ديني توپلومدا حاكم اولان عنعنه­لري آراشديرير. بئله شئعرلر چوخ احتمال كي بوندان سونرا باريشمازين توتدوغو يول اولموش اولا. چونكي مولانانين مثنوي معنوي سين ترجمه ائده رك[۱۲] ديني پروبلم لره يئر آچميش، بلكه ده بو يولو داوام وئرسين.

مذهبي شئعرلرين اصيل شيوه­سي، فتوا وئرمك كيمي­دير[۱۳]. بيز بورادا باريشمازي دا بئله گؤروروك، آمما باشقامذهبي شاعيرلرله توتوشدورماق باريشمازا ياراشماز، چونكي بو اثرلرينده ده شاعرين توپلومسال دغدغه‌لري اؤن پلاندا دايانميش و ديلي هميشه‌كي كيمي كسرلي، دولغون و ايتي­دير. شاعر كعبه اثرينده، انسانلارين اولقونلوق يولو ايله كعبه­يه چاتماق هدفيني گؤتورور. آنجاق چوخلاري كعبه عوضينه بوتخانه­يه چاتيرلار. بو اثرده، دوغرودان دوغروسونا شاعرين مذهبي قايناقلاردا درين مطالعه و بوللومعلومات اله گتيرديگيني گؤروروك و هر بندينده بو دونيانين پروبلئم‌لرينه اشاره ائدير. آنجاق بو موضوع دا، باريشماز شعرلريني چتين­لشديريب و آنلاشيلماز ساخلايير. هر بندده آيه، حديث و باشقا مذهبي روايت­لره آرخالانيب، اونلاردان سؤز آچير. بو دونيا ايله تانيش اولمايان اوخوجو، چوخ يئرلرده شاعرين مقصدين آنماياجاقدير. هر حالدا بئله بير عالمده يازيب ياراديرسادا، باريشماز يئنه ده بؤيوك شاعردير و بوساحه ده چاليشان شاعرلرله فرقلي دير. هر بندينده درين فلسفه، دولقون دوشونجه و اينجه سؤزلروار:

بوت ايچينده ياشامان مسخ دگيل

مسخ ليك دير بوته ائيمك گؤزه­ليم.

سن دؤزوم آيتي اول خالقيم اوچون

اوخشاسين باشيني قوي رحمت اليم.[۱۴]

بو بندين آرديجا يئنه دئيير:

بو سيناقدير ياشاماق بُت­لري­نن

ياشا، اودلان گيلا، غمدن تاپدان.

دؤزومون قوي بوتو سالسين درده

سن ده آدم كيمي غمدن اودلان.

شاعر دين و مذهبه چولقالانان قورو و بوش عادتلري، دينه زيان گؤروب بئله سؤيلور:

چئويريلسه قورو – بوش عادته دين

اودلوغوندا اود اولوب، يانديرماز.

يانسيلار حقي، دوشر حقدن اوزاق

تاغي­ني تاغدان ائده‌ر ديبده مجاز.[۱۵]

شاعرين نظريجه دين، انساني حركته گتيره­ن، اويادان دير:

دين دايانديرسا اگر باتلاقدير

ايستر انجيل اولا، قرآن، يا زبور.[۱۶]

بئله بير توپلومدا فقر يارانار. فقر اولان يئرده ده شيطان اليني آراييب تاپماق گره­ك:

فقر، جهلين قويوسون اسنه­ده­جك

گله­جكدير قويولاردان سه­سي­نيز.

         ********

داراشيب هر ياناكيم فقرين اودو

شيطانين اللريني اوردا گزين:

يارادار آلچاق- اوجا، ايري- بوروق

قوزو خايين ساييلار، قوردلار امين.[۱۷]

شاعر، جامعه­ميزده اولان فسادين كؤكونوده تانير و بئله ديله گلير:

قان تؤكوب، پول سووورانلار حاجي دير.

بئله بير يئرده و زماندا حقي آلماق اوچون رشوه وئريلير و دورومون عمومي وصفي بئله دير:

ائوي­نين سورگونو دور ايندي بشر

دوو دوشوب بير نئچه دانقاز – كونه­زه

آنا تورپاق بو حميل ييرغالانان

بئشيك اولموش بشره بير «ربذه».

       ********

حق نه دير سؤزده قالان كؤپلو قارين

دوز ياشير سؤزده داغارجيق يئلي­دير

قولتوق آلتيندان آلير رشوه قودوز

اينصافين يوللارينا داس هئلي­دير.[۱۸]

آنجاق شاعر، منظومه­نين سونوندا«قانلي اذان» چكمه­يه گليب چاتير و تكجه يول بونو بيله­رك بئله تكليف ائدير:

كعبه حسرتله گودوردو يولومو

آنلاديم ايندي «بلال» اولمالي­يام.

بير داها قانلي اذان چكمك ايلن

شيغاييب ظولمون توكون يولمالي­يام.

        **********

امينم باتماياجاقدير نفسيم

يئره سس پايلاياجاق قانلي اذان

يولاجاقدير سوكوتون ساچلاريني

بير داها تاپماياجاق بوتلر امان.[۱۹]

        ********

ظولم اؤنونده دوغولان نفرتيميز

بُتلره وئرمه­يه­جك بير ده امان

ظالمه داغدان آغير نفرت­دير

بوتلري درده سالان سس­سيز اذان.

بوتون بئله شعرلرين عادتي اولاراق، باريشمازدا، منظومه­نين سونوندا اؤزوندن آد آپاريب، يولونون قطيت­له سئچديگي­ني سؤيلر:

ظولمونن هاردا «باريشماز»ليغيميز

بير داها قانلي اذان اولمالي دير.

قان ايچيب شيش گتيره­ن «مترف»لر

ييخيليب بوش دره­لر دولمالي دير.[۲۰]

بواثرين ايكينجي منظومه­سي «يار و نار» دير. بو اثري، اوخوجويا مفتون اميني­نين عاشيقلي كروان اثريني خاطرلادير. بورادان نئچه بند نمونه گتيره‌رك كفايت­له­نيريك:

عدالت چرخي يارب، دوشدو توودان

ايچه‌ري ايشله يير بو قانلي نوودان

عدالت دونيانين ارليك قيزي دير

گؤتوردو باش، قاچيرتدي، دوشدو هوودان.

          ********

سورو باغلير ايلاهي قان سورانلار

يازيلي كؤينه يه دؤنموش قورآنلار

بلالين دينله ديك قانلي اذانين

قانيني آلديلار بيزدن اويانلار.

      *******

اوشاقليق گونلريم اي سن ملك لر

سيزي سين سين گزه ر، روحوم ايمك لر

بؤيومزديم اگر بيلسئيديم اينسان

اؤيونر، اؤزگه دن كس سين چؤره‌ك‌لر.

و نئچه تك بيت لر:

بيريني اؤلدوره ن آدلاندي قاتيل

ولاكن مين قيران آدلاندي سلطان!

       ********

شوشه نين دايه­سي داشدير عزيزيم

آخيدار شيشه­نين قانين هميشه.

[۱]) يحيي شيدا، ادبييات اوجاغي، تبريز، ۱۳۶۴، ص ۲۵۳٫

[۲]) حيدر عباسي (باريشماز)، چاغريلماميش قوناقلار، چاپ دوم، تهران، نشر اوحدي، ۱۳۸۳، ص ۱۲٫

[۳]) همان، ص ۱۵٫

[۴]) همان، ص ۱۴٫

[۵]) حيدر عباسي (باريشماز)، چاغيريلميش قوناقلار، چاپ اول، تبريز، نشر لاله، ۱۳۶۲؛ چاپ دوم، تهران، ۱۳۸۲، نشر اوحدي.

[۶]) حيدر عباسي (باريشماز)، نغمه داغي و استعمار، تبريز، نشر تلاش، ۱۳۶۳٫

[۷]) حيدر عباسي (باريشماز)، اودوملو ديره‌ك، تبريز، نشر شفق، ۱۳۶۷٫

[۸]) حيدر عباسي (باريشماز)، شرح انور، تهران، نشر هما، ۱۳۸۱، جيلد ۱ و ۲٫

[۹]) حيدر عباسي (باريشماز)، اودوملو ديره‌ك، چاپ دوم، تهران، ۱۳۸۳٫

[۱۰]) باريشماز، كعبه و قانلي اذان، تهران، نشر هما، ۱۳۷۹٫

[۱۱]) باريشماز، يار و نار، كعبه اثريله برابر چاپ اولموش، تهران، نشر هما، ۱۳۷۹٫

[۱۲]) حيدر عباسي (باريشماز)، شرح انور، جيلد ۱ و ۲، تهران، نشر هما، ۱۳۸۱٫

-) مثنوي معنوي‌نين توركجه سي، چئويره‌‌ن باريشماز، تهران، نشر هما، ۱۳۸۱٫

[۱۳]) همت شهبازي، نقد شعر معاصر آذربايجان، تبريز، نشر اختر، ۱۳۸۳، ص ۲۴۷-۲۱۳٫

[۱۴]) كعبه، همان، ص ۸٫

[۱۵]) كعبه، همان، ص ۲۲٫

[۱۶]) همان، ص ۲۴٫

[۱۷]) باريشماز، كعبه، ص ۲۵٫

[۱۸]) همان، ص ۳۵٫

[۱۹]) كعبه، همان، ص ۵۴٫

[۲۰]) همان، ص ۵۷٫

ارسال دیدگاه