دیوان جاذب

   محمد کاظم خوئینی زنگانین ۱۵۰ ایل بوندان اؤنجه اوچ دیللی عالیم، شاعیر و ماهیر خطاطی دیر کی ایلک دفعه اولاراق دیوانی بو عالیمین اؤز خطی ایله یازیلان نسخه سی اساسیندا چاپ اولدو. بو دیوان م. کریمی توسطی ایله ۱۳۷۶جی ایلده حاضیرلانسا دا، ۱۳۹۴جو ایلده تبریزده مجوزر آلیب، چاپ اولور. جاذب بیر عالیم کیمی هر اوچ دیله دریندن واقف اولاراق، دیوانیندا بو اوچ دیلی بیر – بیرینه قاتیب و ان گؤزه ل بیر دیوان یارادیر. بورادا اوچ دیللی ملمع لر هر اوخوجونو اؤزونه چکیر. او، بو یولدا باشقا همولایتلی لری اولان شهاب الدین سهروردی، مولانا عتیقی و مولانا همتی انگورانی نین داوامچیلاری کیمی تانینیر او اونون یولونو دا حکیم هیدجی چوخ مهارتله داوام ائتدیریر.

   جاذب دینی بیر معلم اولاراق زنگانین حوزه ی علمیه سینده تدریس ائدیر و چوخلو طلبه لر تربیت ائدیر. او، زمانین علم لریله تانیش اولاراق، دیوانیندا چئشیدلی علملردن مطلب لر توپلاییر. اونون آدلیم اثری جنگ المهمات دیر کی اونلارجا علم لردن اؤرنک لر توپلامیش و اونلارجا شاعیرلرین اثرلریندن نمونه لر گتیرمیشدیر، او جمله دن زنگانین ۷۰۰ ایل بوندان اؤنجه ایکی دیللی شاعیری اولان مولانا عتیقی نین غزللیندن ۵۰۰ بیتدن آرتیق اورادا توپلامیشدیر. جنگ المهمات اثرینی اؤز خطی ایله بزه میش و یوزلرجه قونو اوندا یازمیشدیر. نجومدان توتوب جفره قدَر، ریاضیاتدان توتوب طب، فقه، حکمت، شعر و لطیفه لر اوندا یازیبدیر.

   الیمیزده اولان جاذب دیوانی، خوئینی نین شعرلرینی احتوا ائدیر و بورادا ان چوخ شعرلری ایکی دیللی غزللردیر.  بو کتاب ۱۵۲ صفحه ده، رقعی قطعده چاپ اولموشدور.

ارسال دیدگاه