ائلیمیزین اویون یازاری / م. کریمی

ساعدي آذربايجانين استعدادلي، چاليشقان و دوشونجه­ لي  يازاري­دير كي اونون رولونو بوتون ايران ادبيياتيندا داهاماق اولماز. او، اثرلري نين هاميسيني فارسيجا يازيب دا، آذربايجان ديلي و خالقيني هئچ زامان اونودماميش و نئچه اثري ده آنا ديلينده يازابيلميشدير. آنجاق ۱۳۴۰جي ايللردن سونرا بوتون ايراندا ضيالي دئمك بو معنادادير كي بوتون مسئوليت­لري بوينونا آلمالي­دير؛ هامي بئله دوشونوركي ضيالي هر ايشي گؤرمه‌لي­دير، او اجتماعي، سياسي، اقتصادي و اؤلكه ده تامام چتين‌ليك­لريني آرادان قالديران­دير، هابئله دوستاقلاري چكن ده او دور، چريك گروهلاريني تشكيل ائده­ ن ده اودور!

شوبهه يوخدور كي ۱۳۴۰ دان سونرا ايران فضاسي بوتون سياسي اولموش؛ هر ادبي، هنري بير اثرده يارانيرسا، هامي اوندان سياسي باخيشلار ايسته­ يير و تفسير ائدير. اؤلكه ­ميزه قارا و آغير بير قورخو چؤكموش. هامي بئله گؤزله­ یير كي ضيالي لار، يازارلار قوللاريني چيرمالاييب هرياندا دخالت ائده جك. ايراندا گئده­ن اجتماعي ـ سياسي گئديشلرده بوتون سياسي اولاراق بير آغير پئسيكولوژيك فضا آلميشدير. مدئرن باخيش، سنت­لري سينديرير، آنجاق يئرينه يئني بير زاد قويا بيلمه يير. شاه ايستير «بؤيوك مدنيت» ياراتسين آنجاق مزاحم­لري آرادان قالديرماق گره­ك. بو مزاحم­لرده ضيالي­لار و يازارلارديرلار. بئله­ليكه بير طرفدن شاهين حركت­لري و او بيري طرفدن ضيالي­لارين مانورو بو اون ايلليك­لرين اؤزه­ لليگي ساييلير. شاه ساواكي قورور، ضيالي­لاردا ادبياتا آرخالانيرلار. بئله ­ليكله ادبيات، شاهين بيرينجي دوشماني اولور و يازارلار اونون اصيل مزاحيمي. بو آرادا غلامحسين ساعدي ميدانا چيخير و جادويي رئاليزمي ايله ميدان آچير و شاهين ان بؤيوك مزاحيم‌لريندن ساييلير.

  ساعدي قلمي­ني آچير، داستانلار يازير، اويونلار يازير، فيلم نامه­لر يازير، مونوگرافي­لاري يازير؛ بوتون ساحه­لرده ميدان آچير و بئله ­ليكله تكجه آذربايجان يوخ، بلكه بوتون ايرانين چاليشان و چوخ يازان ضيالي­سي اولور. بو زامان آذربايجاندان چوخلو يازارلار باش قالديريب و مختلف ساحه‌لرده قلم وورورلار. يئرسيز دئييلدير كي آذربايجان، شاه طرفيندن اؤزه­ل بير دوروم صاحبي اولور. او، هله ده ۲۱ آذر گونلريني اونوتماييب، بو دوروم اونون جانينا تيتره­تمه سالير و گله­ جك حركت­لر گؤستردي كي اشتباه ائتمه­ميشدير.

ساعدي ۱۳۱۴ ايلي‌نين دي آييندا آنادان اولدو. ملي حكومت زمانيندا، بلكه اوندان نئچه ايل اؤنجه­دن پيشه­وري­نين فكرينه وورولاراق دئموكرات فرقه­ سينين گنج لر بؤلومونه قاتيلير. دئموكراتيك چاغلاردا درگي لر بوراخير و بونا گؤره ده سونرالار دوستاقا آلينير. سونرا تبريز يونيوئرسينه­سينده روان پزشكي بؤلومونده دوكتورا آلير. ۱۳۳۹ ايلينده تهرانا كؤچور و سربازليغيني پادگاندا بير طبيب كيمي كئچيرير. بو زامانلار يازماغا اوز گتيرير. دلگشا دا بير مطب آچير. يوخسوللارا كؤمك ائدمك آماليلا ادبييات دونياسينا دا قدم قويور، سياسته ده قاتيلير. مطبده هم طبابت ائدير، هم ادبي ـ سياسي گؤروشلريني كئچيرير. ۱۳۴۰ دان ۱۳۵۰ يه قدر ساعدي نين ادبي چيچك­لنمه­ دير. چوخلو ده­يرلي ـ اثرلر ـ نمايشنامه، داستان و … بو ايللرين محصولودور. طبيب­ليك­له برابر، گؤركملي بير يازار كيمي چيخيش ائدير. ۱۳۴۶ جي ايلده جلال آل احمد له برابر هويدا ـ ايران صدراعظمي ايله گؤروشور، بلكه سانسور مسئله­سيني حل ائتسينلره آنجاق نتيجه آلمادان، حركت‌لرين سونوجو ايرانين يازارلار اوجاغي­نين شكيل تاپماسينا بيتير.[۱]

ساعدي بوغونتولو و خفقان ايللرينده چوخلو سياسي مبارزلرله علاقه باغلايير، همان مبارزلر كي ياخين گله­جكده شاها قارشي مبارزه­ده، اوسطوره­يه چئوريليرلر: صمد بهرنگي، پرويز پويان، بهروز دهقاني، عليرضا اوختاي، مصطفي شعاعيان و باشقالاري. بونا گؤره ده ساواك ايله ال به ياخا اولور، نهايت ۱۳۵۳ جي ايلده دوستاق اولور. ۱۳۵۶ جي ايلده آمريكا يونيوئرسيته و ادبي ييغينجاقلاري طرفيندن چاغريلاراق، آمريكايا دؤنور و اورادا اؤيره‌نجي‌لر كونفئدراسيونو ايله ايراندا گئده‌ن اشكنجه‌لر و بوغونتولاري افشا ائدير. ۱۳۵۷ ده ايرانا دؤنور. داها بوتون يازارلار و ضيالي­لار شاها قارشي مبارزه‌يه قاتيلميشلار. آنجاق ۱۳۶۰ ايلينده ايراندان ائشيگه چيخماغا مجبور اولور، پاريسه گئدير و ۱۳۶۴ جي ايلين آذر آييندا اوردا دنياسيني دگيشير. آنجاق ساعدي‌ ده‌يرلي اثرلريله تكجه ايراندا يوخ، بلكه دنيا ادبياتيندا ائتكي­لي يازارلاردان اولاراق، تاريخه قاتيلميش و هميشه­ليك قالارقي بير انسان كيمي ياشاماقدا دير. ساعدي قيرخدان آرتيق كتاب يازميش كي اونون ياريسي اويون (نمايشنامه)دير. اويونلاردا «گوهر مراد» تخلوصونو قوللانير. اوچ رومان، ۸ داستان كتابي (۴۰ دان آرتيق داستان بو كتابلاردا توپلانميشدير).[۲]

ساعدي داستان­لا اويون آراسيندا فيرلانير. او، بوتون اثرلرينده ـ داستانلاردا و اويونلاردا ـ توپلومون بالاجا ـ بؤيوك اولايلاري قلمه آلير، ادبييات ساحه­ سينده بير متعهد يازار كيمي توپلومون دردلريني يازير، بير طبيب كيمي ـ روان­پزشك كيمي ـ اولايلاري آراشديرير، بوتون وارليغي ايله يورولمادان چاليشير؛ سؤزو ده چوخدور، دانيشير. مختلف سيمالاري اؤز اؤزه لليك لريله تانيتديرماق ايستير. چاپلوس، يالتاق و قوربان ـ قوربان دئيدن آداملارلا شاهين ظاهري آزادليغيني افشا ائدير. چوخ اويونلاري بو ايكي تيپي آراشديرمادادير. اويونلاردا كي آداملار، توپلومون تانينميش سيمالاري دير و اويون يازان بئله سيمالاري آچيقلاق ايسته­يير و دوغرودان دا موفق دير و اؤزوندن باشاريلار گؤسته‌رير.

«چوب بدستهاي ورزيل»[۳] ساعدي­نين گؤزه­ل اويونلاريندان­دير. ورزيل كندينه دوغوز گلير و كندلري ويران قويور، كندچي­لرين محصولونو آرادان آپارير. كندلي­لر نه قدر چاليشيرلارسا دا اونون قارشيني آلا بيلميرلر، اووچو توتورلار. اووچولاري يئديرديب دوغوزو توتماغي اوندان ايسته‌يير. اووچولار يئمك­دن دويمورلار. ايندي داها دوغوز يوخ، بلكه اووچولارين الينده اسير اولورلار. كندلي­لرين وار ـ يوخو اووچولاري يئديرتمك اوچون الدن گئدير، اووچولار اليندن قورتولماق اوچون، يئني اووچولار گتيريرلر، يئنه غارت باشلايير، ايندي اووچولار بير ـ بيرينه گولله آچماق عوضينه، تفنگ لريني كندلي­لر، چئويريرلر و كندلي­لر مچيده پناه گتيريرلر.

ورزيل­لي­لر، ساعدي­نين بوتون اويونلاري كيمي بير باجادان نئچه دفعه لر سانجيليرلار و يئني بير يول تاپمادان عاجز ديرلر.

ساعدي­نين ياراديجيليغي چوخ گئنيش، درين و گؤزه­ل­دير، آنجاق اوندا اولان تعهدون چوخلوغو، گاهدان اونون ياراديجيليغي اوزه­رينده منفي تأثيرلر بوراخير، چونكي ايستير توپلومون بوتون صنف­لرينين ايستك­لرينه جاواب وئرسين، اونلارا يول گؤسترسين. همين عامل، اونون ياراديجيليغي­ني بوروشدوروب چتين يوللارا سالير.

بيل عزاليلاري[۴]، ساعدي­نين شاه اثرلريندن بيري دير. بو اثر ۱۳۴۳ جي ايلده ياييلميش. بو كتابین ۸ ناغيلي‌وار و اولايلار بيل كندينده كئچير. كندين فضاسي توتغون، بوغوناق و قورخولودور. بيل بير ساده كنددير، كندلي­لري اوندان ساده بلكه جاهل و سفئه؛ چوخ دانيشان و قورخاق؛ بير آچيليش، بلكه فاجيعه‌ني گؤزله­ييرلر. ساعدي­نين جادويي رئاليزمي بورادا آيدينجاسينا اؤزونو گؤسته­رير. بو اثر ائله بؤيوك ائتكي بوراخميشدير كي بيرسيرا يازيچيلار، بيل عزاليلاري­نين ائتكي سيني گابريل گارسيا ماركز و ماكوندوي اثرلرينده اورتايا آتيرلار. ماركز و ماكوندويو ساعدي نين ائتكي­سيندن يارارلانمالاريني قيده آليرلار. هر حالدا، بو اثرده اولان قورخو فضاسي چوخ اؤنملي دير، بيل بير كند يوخ، بلكه بوتون ايران تمثيلي­دير. اونون ۸ ناغيليندان، دؤردونجو ناغيل «اينك» آديندا بير فيلم چكيلدي و بو فيلم ايرانين سينماسيندا ان گؤزه­ل فيلم تانينميشدير.

بَيَلده شادليق، شنليك‌دن خبر يوخ، چوروموش بير كند، داغيلماغي گؤزله­يير؛ كند باشدان ديبه غارت اولونموش، ائولرين قاپيلاري باغلي، اؤلوم شيهه چكير و كؤچ … بيَلَدن قاچان شهره قاچير، شهر ده كنده تاي، ساعدي­نين داستانلاريندا شهردن بير يئري سئچيب بوتون شهري اورادا سيغيشديرير؛ ايندي بير خسته­خانادير بير شهرين تمثيلي. خسته­خانا بوتون مسموم هاواسيلا؛ يا دا مچيد، توز باسميش عَلَم لريله.

ساعدي موضوع­لاردان چوخ تئز كئچير، هميشه عجله­ده­دير، ساده و قيسسا يازير، آنجاق هر كلمه‌ده و هر جمله­ده بير كتاب سؤزو واردير. يارانان تصويرلر قيسسا، آمما ائتكي­لي، ائله كسگين قلمله يازيركي اوخوجو اؤزونو اورادا گؤرور، دويور و دوشونور. ساعدي اوچون سبك اؤنم­سيزدير. ديله چوخ باغلي دئييل؛ بلكه ده اؤز آنا ديلي اولماديغيندان، ياد بير ديلده يازديغيندان ديله اؤنم بسله‌مير. ناغيلين گئديشي اونونچون اؤنملي­دير. ساعدي اؤز يولونو گئدير، بئله­ليكله ده بلكه اؤزه­ل بير سبك و شيوه يارادير. ناغيل چوخ ساده باشلانير، آنجاق پيتلاشيق دوشور و قهرمانلارين حسياتي و رواني حاللاري باشلانير و اولايلارين سونوجو بير فاجعه يارادير. ساعدي­نين ناغيل­لاريندا، بلكه ده قهرمان يوخ، هاميسي قورخاق،

 بير آدامين چتين­ليگي، توپلومون چتين­ليگينه چئوريلير. آداملار گيجه­لير، مات قالير و سينير. آداملار داغيليرسا، اولايلاي يئرينده قالير.

دنديل[۵] ده بئله بير ناغيل­لار توپلومودور (۱۳۴۵ ده چاپ اولور). دنديل شهرده اولاراق بيل كندي كيمي بوغوناق هاواسي و قورخاق آداملاري وار. غارت ناغيلي­دير. دنديل عقيم انسانلارين يوردو دور. دنديل­لي­لر (ايراني تمثيل ائدير) اؤز ماللاريندان يارارلانما گوجلري يوخدور. تامارا آدلي ۱۶ ياشلي بيرقيز، محله­يه گلير. دنديل­لي­لر استفاده ائده بيلمه­دن بير آمريكالي افسر گليب، كام آلير و باجاريق گؤسته­ره­رك، فاتحانه قاييدير، دنديله هئچ زاد چاتماييب تامارانين سينيق ـ سالخاق دوروم و دنديلين اولور.

ساعدي ۴۰ اينجي ايللرده چوخ يازيب، چوخ چاليشير و خالق ايچينده، اؤزه­لليك­له ضيالي­لار آراسيندا متعهد بير يازيچي كيمي تانينير. ساعدي تكجه اويون[۶] يازماقلار يا ناعيل يازماقلا كيفايتلنمير، بلكه الفبا، آرش و آيري ـ آيري ادبي ـ اينجه صنت درگي­لريني چيخار داراق زمانه نين چاليشقان يازاري كيمي ضيالي­لارين ايچينده ياشايير. او، رئاليزمي ديريلدير، آنجاق اونا جادو دا قاتير.

۱۳۴۶ جي ايلده، شاهين تاج قويما ايلي و حكومتي­نين بينؤره­سيني محكم­لندير مه چاغيندا، ساعدي هاميدان آرتيق ميداندا گزير. ساواك شاها قارشي دورانلاري توتوب، كسير، باسير. قيلينج تيه­سي­نين دال ـ قاباغي كسه­ن بير زاماندا، ساعدي مختلف يازارلارلار سانسورا قارشي آياغا قالخير. ناغيل لاريندا، سانكي شاها اتهام نامه­لر يازير، آنجاق ۱۳۴۹ ده چريك عملياتي باشلايير؛ آذربايجان و شومال اورمانلاريندا، فدايي­لر الينه تفنگ آلاراق شاها قارشي چيخيب ۲۵۰۰ ايلليك شاهليق جشن­لريني شاها زهر ائديرلر. آنجاق ساعدي ياراتمادان دايانمير. بو زامان تعهد اونون ياراديجليغينا زور گلير. ساعدي اثرلريله خالقين انقلابي حركتينه قاتيلير. آمما شاه دا قورخويا دوشوب ساواك قوه‌لريله يازاريميزي دوستاق ائدير. ۵۳ دن ۵۴  قدر ان چتين اشكنجه­لره معروض قالير. نهايت بير ايلدن سونرا آزاد اولور. داها ياراتمادان قالير. ايراندا قالا بيلمه­يير و كؤچور. ۵۷ جي ايلده ايرانا دؤنور تا ۱۳۶۰جي ايل يئني باشدان ياد اؤلكه لره كؤچور. داها ياراتمادان خبر يوخ. بو زامان مختلف خسته­ليك­لرله ال به ياخا اولور. وارليغي ضعفه اوغرايير و قلمي سوسور؛ آمما نئچه ـ نئچه دانيشيقلار آپارير. آنجاق آنا ديلي نين نيسگيلي اوره­يينده قالير. بو دانيشيقلار دا بو نيسگيلي آچماغا جان آتير.

ساعدي مختلف درگي­لرله دانيشيق لار آپارميش و گؤزه­ل سؤزلر ايره­لي سوروب، تاريخيميزي آچيقلاميشدير. او جمله­دن ساعدي­نين آنا ديلينه علاقه وايلگي­سي حقينده معلوماتلار آلماق اولور. ۶۴ جي ايلده دانيشيقدا بئله دئيير: «من بير ايل توركو اوخوموشام، اودا پيشه­وري حكومتي­نين زامانيندايدي. دؤردونجو كلاسي اوخويوردوم. اورادا ماكسيم گوركي­دن ناغيل اوخودوم، چخوف­دان داستان كيتابيميز دا واريدي. توركي مثل­لر، صابردن، ميرزاعلي معجزدن شعرلر واريدي … بونلارين هاميسي كتابيميزدا واريدي. من تكجه او زامان اؤزومه اينانيرديم، كئف ائديرديم كي من ده انسانام، درس اوخويورام» بو سؤزلر هاروارد يونيوئرسيته­سيله دانيشيقدا سؤيلنميشدير. راديو بي بي سي ايله دانيشيقدا دا بئله بير دانيشيق ايره­لي سورولور:

ـ اؤز آنا ديلينيزه ـ توركجه بير اثر يازميشسينيز؟

ـ يوخ، بونا گؤره كي اول قدر منيم باشيما دؤيدولر.

ـ تأسف له نيرم.

ـ يوخ، تأسف يئمه­يين. اول قدر منيم باشيما ووردولار كي مجبور اولدوم فارسيجا يازام.                  آنجاق بير اويون توركجه يازميشام.

ـ اجرا اولدو؟

ـ يوخ، قوردلار اويونو ايدي كي «كتاب ماه»ين ايكينجي ساييسيندا چاپ اولدو و سانسور                  مأمورلاري تؤكولوب اونو ييغيشديرديلار.

رحيم رئيس نيا آذربايجان يازاري بئله ايضاح ائدير كي «پرندگان در طويله» يا همان «پنج نمايشنامه از انقلاب مشروطيت» كتابيندا، ۱۳۴۵ جي ايلده «قوردلار» متني توركجه چاپا يئتيشيبدير. آنجاق يازار بونو دا آرتيرير كي صمد بهرنگي ممقاندا اولان زامان ۴۵ يا ۴۶ جي ايلده بو اويونو صحنه­يه گتيرميشدير.

[۱]) ساعدي حاققيندان بوگونه‌ قده‌ر اونلارجا كيتاب يازيليب و اثرلري آراشديريليبدير. اونون ياشاييشي دا اونلارجا مقاله‌لرين عنواني اولموشدور. بو يازار حاققيندا آشاغيداكي اثرلري آد آپارماق اولار:

الف) عبدالعلي دست غيب، غلامحسين ساعدي، تهران، ۱۳۵۲٫

ب) كورش اسدي، غلامحسين ساعدي، چهره‌هاي قرن بيستمي ايران، دفتر پنجم، تهران، ۱۳۸۱٫

ج) سعيد سلطانپور، نوعي از هنر، نوعي از انديشه، تهران، ۱۳۴۹٫

د) خسرو گلسرخي، نوگرايي و حقيقت خاكي، تهران، ۱۳۵۸٫

هـ) باقر مؤمني، درد اهل قلم، تهران، ۱۳۵۶٫

[۲]) ساعدي نين نئچه اثري بونلاردير:

الف) ايلخچي، ۱۳۴۲٫                                 ب)  حيا و يا مشكن شهر، ۱۳۴۳٫                   ج) گور و گهواره، ۱۳۴۵٫

د) آي با كلاه، آي بي كلاه، ۱۳۴۶٫   هـ) آرامش در حضور ديگران، ۱۳۴۶٫             و) اهل هوا، ۱۳۴۵٫

ز) ترس و لرز، ۱۳۴۷٫                                 ح) واهمه‌هاي بي نام و نشان، ۱۳۴۶٫               ت) فصل گستاخي، ۱۳۴۸٫

ي) تاتار خندان، ۱۳۵۳٫                                ) غريبه در شهر، ۱۳۵۵٫                                ) بازي تمام شد، ۱۳۵۶٫

) دايره مينا، ۱۳۵۶٫                                      ) الفبا درگي سي، ۶ جيلد ده، ۱۳۵۳-۱۳۵۶٫

) شب نشيني با شكوه، تهران، ۱۳۳۹٫

[۳]) گوهر مراد، چوب به دستهاي ورزيل، تهران، انتشارات نيل، ۱۳۵۲٫

[۴]) غلامحسين ساعدي، عزاداران بيل، تهران، ۱۳۴۸٫

-) غلامحسين ساعدي، بيل عزاليلاري، چئوره‌ن: نگار خياوي، تبريز، ۱۳۸۵٫

[۵]) غلامحسين ساعدي، دنديل، تهران، ۱۳۵۰٫

[۶]) ساعدي، ايرانين اويون يازارلاري آراسيندا بيرينجي موقعي قازانير و اونلارجا اويون كيتابلاري شؤهره‌ت قازانميشدير. او جمله‌دن بو اثرلري آد آپارماق اولار:

الف) گوهر مراد، ديكته و زاويه، تهران، ۱۳۴۷٫  ب) گوهر مراد، لال بازيها، تهران، انتشارات پيام، بي تاريخ.

ج) گوهر مراد، آي با كلاه، آي بي كلاه، تهران، ۱۳۴۶٫                         د) گوهر مراد، بامها و زيربامها، تهران، ۱۳۴۰٫

هـ) گوهر مراد، هنگامه آرايان، بو گونه قدر چاپ اولماميش.

و) گوهر مراد، پنج نمايشنامه در انقلاب مشروطيت، تهران، ۱۳۴۹٫

ز) غلامحسين ساعدي، گؤزه گؤز، تبريز، ترجمه محمد رحيمي، ۱۳۸۳٫

ارسال دیدگاه