دیوان عمادالدین نسیمی / دکتور حسین اولدوز

 

دوکتور حسین فیض الهی وحید طرفیندن چاپا حاضیرلانام نسیمی دیوانی ایشیق اوزو گؤردو. دکتور حسین اولدوز بیرینجی یازارلاریداندیر کی انقلابین ایلک گونلریندن عمادالدین نسیمی نین دیوانینی چاپا حاضیرلاماقدا جان آتیب و بوگون دوغرودان دوغروسونا ان گؤزل چاپب جامعه میزه تقدیم ائتمیشدیر. بو دیوان، نسیمی نین تورکجه شعرلرینی احتوا ائدیر کی ۸۱۲ صفحه ده یاران یایین ائوی طرفیندن یاییلمیشدیر. بیز، بو گؤزل ایشین باشا چاتماسینی ده یرلی آراشدیریجیمیزا تبریک ائدیریک.

حسين اولدوز

آذربايجاندا چاغداش ديل و ادبياتي اوغروندا جاندان اسيرگه­مه­ين، بوتون وجودو ايله چاليشان سيمالاردان بيريسي ده حسين فيض‌الهي وحيدديركي «حسين اولدوز» آديلا شهرت قازانيب و آذربايجان ادبياتي­نين گليشمه­سي يولوندا بير آن دايانماييبدير. حسين ۱۳۳۱ جي ايلده تبريز شهرينده- آشيق اوستالاريندان ساييلان آشيق علي نين ائوينده دونيايا گؤز آچدي[۱]. آشيق علي تبريزين قوجامان و گؤركملي آشيقلاريندان اولاراق، اوره‌كدن قوپان شعرلريله، آذربايجان داستانلاريني سازي-  سؤزو ايله تبريز ده اولان سايسيز- حسابسيز ماراقلي­لارينا چاتديرميشدير و گؤزه‌ل شعرلر سؤيله­ميشدير. حسين بئله بير صنعت اوجاغي اولان عائله ده بوي آتيب ياشادولور و ايلك چاغيندا آناديلي‌نين وورغونو اولور. مدرسه­يه گئدير، آنجاق آناديليني بوغازيندا بوغوب فارسي اؤيره­نمه­يي مجبوريتينده اولاراق، آناديلينه محبتي گونو گوندن آرتير. دبيرستان دؤوره­سيني ده بيتيريب، افسرليك يونيوئرسيته­سينه داخل اولور. آنجاق آناديلي نين اؤيره نمه سي اوغروندا چاليشديغي اوچون، ارتش ايچينده بير نئچه دوستو ايله برابر بالاجابير گروپ ياراديب، آنا ديلي­نين ديري ساخلاماسي اوغروندا قرارلاشيرلار. بوبالاجا گروپ«اولدوز» آديلا تانينير و اونون ليدئرليگي حسين ين بوينونا دوشور. ارتيشين ايكينجي روكن آدلانان ساواك و ضد اطلاعات طرفيندن توتولور. او زاماندان حسين اولدوز آديلا تانينير. نظامي محكمه‌ده ۱۰ ايل زيندانا محكوم اولاراق ۱۳۵۷ جي ايله قده ر دوستاقدا قالير. آنجاق ايران خالقي­نين بؤيوك نهضتي و قيامي نتيجه­سينده و اسلامي انقلابين غلبه چالديغي گونلر، حسين اولدوز بوراخيلير و خالقي­نين قوينونا قاييدير.

حسين اولدوز دوستاقدان چيخاراق، آناديلي­نين گليشمه­سي اوغروندا اله قلم آلير و درگي­لر بوراخماقلا اؤز بوينونا آلديغي تكليف­لري يئرينه يئتيرير. ۱۳۵۸ جي ايلين اوّللرينده كوراوغلو در گيسيني بوراخير و بيرسيرا يازيچي و شاعرلري تكجه تبريزدن يوخ، بلكه بوتون آذربايجان شهرلريندن اؤز باشينا توپلاييب، بيرگه ايشه باشلاييرلار. اوچ نمره «كوراوغلو» ياييلاندان سونرا، همان سياقدا و بودؤنه «دده قورقود» آديلا درگيني يايماغا داوام ائدير و ۱۳۶۱ ايلينه قدر ۲۰ نمره بوراخير. حسين اولدوز بو مطبوعات فعاليتي ايله برابر كلاسيك ادبياتيميزدان غافل اولماييب و شاعرلريميزين ديوانيندان سئچيلميش شعرلري بير يئره توپلاييب و آذربايجان كلاسيك اولدوزلاري سيراسيلا چاپ ائتديريب يايير. حسين اولدوز بير طرفدان آذربايجان فولكلورو ايله چاليشاراق، آيري طرفدن گؤزه­ل شعرلر قوشور، ده­يرلي مقاله­لر يازير و درين آراشديرمالار ايره­لي سورور. بوگونه قدر اولدوزونون اونلارجا كيتابي چاپ اولوب خالقيميزين الينه چاتيب و اونلارجا دا كيتابلاريني چاپ ائتمه­يه حاضرلاييبدير.

حسين اولدوز ۱۹۹۲ جي ايلين دكابر آييندا آذربايجان ملي آكادئمياسي طرفيندن ياراديجيليغي طرفيندن دوكتورا درج‌سينه لاييق گؤرولوب و بئله­ليكله تلطيف اولونموشدور. بوگون دوكتور حسين فيض‌الهي وحيد (اولدوز) آذربايجانين آدلي- سانلي اديب، محقق و صنعتكاري كيمي تانينير و اثرلري الدن- اله گزير.

حسين فيض‌الهي انقلابدان سونرا آذربايجانين مختلف شهرلرينده درمانگاهلاري و بيمارستانلاري اداره ائتمكله مشغول اولوب، بير مدّت مرند و سونرا لار تبريزده رازي بيمارستاني‌نين رئيسي اولموشدور. بو ايشيله برابر، داواملي و آرديجيل صورتده ادبي فعاليتينه داوام وئرميش و بوللو- بوللو مقاله­لريله مختلف درگي­لرده چيخيش ائدير. دوكتور فيض­الهي­نين چاپ اولموش اثرلري بونلاردير:

  • كوراوغلو مجله­سي ۳-۱ نمره­لري
  • دده قورقود مجله­سي ۲۰-۱ نمره­لري
  • آذربايجان كلاسيك اولدوزلاري

الف- عمادالدين نسيمي

ب- نظامي گنجوي

ج- حيران خانيم

د- خورشيد بانو ناتوان

ه- مهري خاتون

و- ليلا خانيم

۴) يار بيزه قوناق گله­جك

۵) آذربايجان گولوشي

۶) آتالار سؤزي، عقلين گؤزي

۷) آذربايجان باياتيلاري

۸) اوروزخان حماسه­سي

۹) آيدين سردار روماني

۱۰) آذربايجان فولكلورماهني­لاري (۴ جلد)

۱۱) اللي عاشيق، اللي نغمه

و بوگون ۸۰ جلده ياخين كتابيني چاپ اوچون حاضرلاييبدير. ايندي قيسا بير صورتده حسين اولدوزون ياراديجيليق دونياسينا اؤتري بير باخيشيميز اولاراق، چاپ اولان اثرلريني گؤزدن كئچيردك:

اوروزخان حماسه‌سي

بواثر دده قورقودون ۱۲ داستانيندان بيري ديركي دوكتور حسين اولدوز اونو شعر فورموندا و ۶۴۰ بيتدن عبارت بير منظومه كيمي باشدان ياراتميشدير. كتاب جيب اندازه‌سينده  و هر صحيفه­نين باشيندا بير شكيل ايله چاپ اولموشدور . شكيل­لري چكن اوستاد اورهان و ارهان دوندار جنابلاري اولموشدور. بو اثر ۹۶ صفحه ده، ييغجام شكيلده اوخوجولارين الينه چاتميشدير.[۲]

بورادا اوروز قازان خانين اوغولونون ايگيدليك گؤسترمه داستاني روايت اولونور، دده قوقوددا اولدوغوندان بير آز آزالميش و ساده­لشميشدير. صنعتكار بو اثري ياراتمادا دده قورقود و آذربايجان دبلرينه صاديق قالاراق، چاليشير بوگؤزه­ل مراسيم­لري قلمه آلسين. بورادا قازان خان، ائل رهبري اولاراق قيلينج چالان بير سردار اولاراق، درين دويغولو بير آتادير. اوروز دا لاييق بير اوغولدوركي جنگده اؤز ايگيدليگين گؤسته­ريب و دده قورقوددان آد قازانير. آناسي اوجا بوي بورلا خاتون دا، آنا محبتي ايله بيرگه قيلينج چالان، وطن اوغروندا جاندان كئچن بير قادين دير. اونون سيماسيندا حسين اولدوز، آذربايجان قادينلاري­نين منليگيني تصويره آلماغا چاليشميشدير.

اثرين سون بؤلومونده آذربايجان قهرمانلاري‌نين بير- بير امدادا گلديك­لري بو اثرين ان هيجانلي بؤلوملريندن دير. قازان خان دوشمن آراسيندا محاصره يه آلينديغي بير زامان بورلا خاتون قيرخ اينجه بئللي قيزلارلا هجوم گتيرير، توز – دومان قووزاييب دوشمن اوره­يينه ولوله سالير، اوبيري طرفدن اوروز، قيرخ ايگيدله بيرگه حمله گتيرير، اونون آرديجا قازان خانين قارداشي قارا گون گلير، چوخ كئچمه­دن دلي­دوندار، آرديجا شير شمس­الدين اؤزونو يئتيرير، بئيره­ك اونون آرخاسيندان گلير و سونرا گلن ياغنيق پهلوان گلير، دلي دومرول، امن، دوگر، دوغوز و يوزلرجه اوعؤز قهرمانلاري دادا چاتيب قازان خانا اوره­ك – ديره­ك اولورلار و نهايت كافرلري قاچيريرلار. بو اثرين ايلك باشلانغيجيندان نئچه بيت بيرگه اوخوياق:

يوردومودان هئچ زامان                     آزالماييب قهرمان

 آذربايجان آسلاني                            اونلاري گل سن تاني

آنلي آچيق، باش اوجا                        ووقارلي داغدان قوجا

اوغوز ائلي يورد ساليب                                                            عمر بويو ياشاييب

ايندي ائشيد اونلاردان                                                          شيرين گؤزه­ل بير دستان

سؤز قلمدن داشلاندي                                                           دستان بئله باشلاندي

گونلرين بير گونونده                                                              ائللر تويدا – دوگونده

ائل باشچيسي با يندور                                                         ائله دئميش: دايان، دور

ائل سريلميش يايلاقا                                                             اتلار گلميش اويناقا

بايندرون دامادي                                                               سالور قازان ايميش آدي

  اؤز چاديرين بزيردي                                                         ايپك خالچا دوزوردي

تيكدي چادير، اوتاقليق                                                         وئردي بؤيوك قوناقليق

ائللر آخيب گلديلر                                                               غم اوره گين دلديلر

دوققوز يوزمين جوانلار                                                          بئلده قيلينج – كمانلار

اله قميز آلديلار                                                                  اوخو دولار، چالديلار

قازان باخدي ساغينا                                                             مرهم ياخدي داغينا

بيرده باخدي سولونا                                                            قوت گلدي قولونا

قاققا چكيب هي گولدي                                                        شنليگيني بولدوردي

بير باخاندا قاباغا                                                                 غملر گلدي اويناغا

گولن آغزي يومولدي                                                           گؤزلر ياشيله دولدي

شنليك دؤندي دودي                                                         ديزه چؤكوب بو يوردي

آتا منه وئر جواب                                                               اوره گيم اولدي كباب

نييه باخدين سول- ساغا                                                      گولوش قوندي دوداغا

آمما باخاندا دوزه                                                               قان ياش گلدي گوزووه؟ [۳]

آيدين سردار[۴]

دؤكتور فيض­الهي­نين عرفاني بير روماني اولاراق، حيبی قطعينده، ۹۶ صحيفه­ليك بير اثر ديركي ۱۳۷۶ جي ايلده چاپدان بوراخيلميشدير. يازيچي اؤن سؤز ده يازديغي كيمي بير عرفان حيكايه يازماغا چاليشاراق، بير سيرا عرفاني اصطلاحلار و سمبوللار يارارلانيب و باجارديغي قدر نثر ساحه سنيده اؤز قلم گوجونو سيناميشدير. بو حيكايه­ني يازماق اوچون شهاب الدين سهروردي، عطار نيشابوري، امام محمد غزالي، جامي و ابن­سينانين كتابلاريندان يارارلاناراق، آذربايجان ادبيياتيندا بوشلوغونو دولدورماق هوسيله چاليشميشدير. اؤزو دئميشكن بو حيكايه، آيدين سردارين ايچه­ري دنيايا سفري دير، انسانين اؤز وارليغيندا آختاريشي­دير. بوسفر، نفس امّاره­دن نفس لوامه و سونرا نفس مطمئنه­يه اوزون و بوروشوق بير سفردير. هامي بوسفره چيخابيلمز، آنجاق بوسفري سونا چاتديران كيمسه، انسان مقامينا و تانري­نين وصالينا چاتميش اولور.

شُبهه يوخدور حسين اولدوز بو حيكايه‌ني يازماق اوچون آذربايجان عارفلري‌نين و فيلسوفلاري‌نين اثرلرينه‌ مُراجعت ائده‌رك، بير سيرا تاريخي شخصيت‌لري‌ده اونوتماميشدير او جمله بانوخورشيد ناتوان اؤز غزللريله بو حيكايه­ده چيخيش ائدير. يازيچي باجارديغي قدر ديلين گؤزه­لليگين، آخيجيليغي و اوره­ک اوخشايان اولدوغو اوچون چاليشيبدير. باياتيلار[۵] دوكتور حسين فيض‌الهي آذربايجان فولكولورو توپلاماغي اوغروندا دا چاليشمالاري اولموش و باياتيلاردان نمونه لر توپلاماغا بئله فكريني گؤسترميشدير. بورادا خالقين آغزيندان ييغيشديرديغي باياتيلاري الفبا سيراسيلا رديفله‌ييب و ۹۶ صحيفه جيب كتابي چاپ ائتديريب ياييملاميشدير. حسين اولدوزون هميشه كي چاليشملاري كيمي، بورادا نئچه- نئچه آذربايجان قهرمانلارينا و ادبياتينا عاييد شكيل­لري ده، كتابين اورتاسينا سپه­له­ميشدير.

آتالار سؤزو، عقلين گؤزو[۶]

بو كتاب آذربايجان شفاهي خلق ادبياتي‌نين ان گوجلو وزنگين بوداغي اولان آتالار سؤزوندن بير نومونه لر ديركي دوكتور اولدوز اونلاري توپلاييب و مستقيل بير كتاب كيمي اوخوجو لارين الينه چاتدير ميشدير.

يار بيزه قوناق گله­جك[۷]

اللي عاشيق، اللي نغمه[۸]

بو كتاب، شعر مجموعه‌سي اولاراق، مختلف شاعرلردن، آ شيقلاردان توپلانميش شعرلري احتوا ائدير. انجاق باشقا ملت­لرين و دونيا خالقلارين شعر نمونه‌لري ده گلميشدير.

بورا ۶۲ شعر اولاران ۶۲ شاعرين سؤيله‌‌ديگي اولاراق ۱۱ صحيفه ده توپلانميشدير. اولدوزون اؤز شعرلريندن ده بورادا نمونه‌لر واردير. آنجاق تورك خالقلاري او جمله‌ـدن ايران، آذربايجان، توركيه، توركمنستان، اوزبكستان، قزاقستان، تاتارستان، مغولستاندان باشقا ژاپون، چكسلواكي، انگليستان، فرانسان، گورجستان، يونان، هندوستان، آمريكا و … اولكه‌لريندن شعرلر گلميشدير باشقا بير سؤزله دئسك دنيا شعريندن نمونه‌لر گتيرميشدير.

باشقا اؤلكه‌لرين شعرلريني آذربايجانا چئويرمه‌لردن كؤچوئرموشدور، آنجاق اولدوز بيگين دونيا گؤروشلو بير انسان اولدوغونو گؤسته‌ره‌رك، اونون كؤنول ايسته‌ديگي آذربايجان خالقينا بير يئني پنجره آچماق دئمك دير. اولدوز بيگ بئله ايستيركي خالقيميزين باخيشي گئنيش اولاراق، شاعير گؤزو ايله دونيا يا باخسين.

حسين اولدوز بير آشيقلي و سازلي- سؤزلو عائله‌ده آنادان اولموش و بئله‌‌بير كؤلتور ايله بوي آتميشدير. الينه قلم آليرسا، آشيقلاري و آشيق نغمه‌لريني اونوتماياجاقدير. اللي آشيق- اللي نغمه‌ده بو روحيه‌دن آخيب‌گلن بير اثردير. اولدوز بيگ، بو اثرينده اوخونجونو اللي آشيق ايله تانيش ائده‌رك نغمه‌لريني ده اوزه چكير و نهايت آشيقلار ادبيياتيندا بير آدديم گؤتورموش اولور.

شوبهه يوخدوركي بواثري ياراتمادا، اولدوزون آتاسي نين رولو هاميدان آرتيقدير. اولدوزون آتاسي بير ساز شاعري دير و اولدوز بئله بير آتانين قوجاغيندا بؤيويوب ياشادولوب و آتاسي‌نين سازي- سؤزو ايله تربيت تاپيبدير. بو اثري يازماقدا، آتاسي­نين هُنريندن تكجه بير گوشه‌سيني گؤسترمه‌يه ‌ان كيچيك عمل دير. يازيچيميز بو اثري توپلاماقدا، هم شفاهي يارانان و بوگون خالقيميز ايچينده ديري اولان ادبياتيميزدان اؤرنك وئرميش، هم ده بو هونرين گليشمه­سينه و داها جانلانما سينا اثر قويموشدور. اونون سئچديگي و تانيتديرديغي آشيقلار و اؤرنك گتيرديگي شعرلرده اؤنملي و ده­يرلي دير.

آذربايجان كلاسيك اولدوزلاري

بو عنوان آلتيندا حسين اولدوزدان نئچه-نئچه كتاب الده­دير و نئچه لر كتابي‌دا حاضرلاميشدير. بوگونه قدر نظامي[۹]، نسيمي[۱۰]، حيران خانيم[۱۱]، خورشيد بانو ناتوان[۱۲]، ليلا خانيم[۱۳] و مهري خانيمين[۱۴] سئچيلميش اثرلري چاپ اولوب و ياييليبدير. شبهه يوخدور ايراندا بوكيتابلارچاپ اولماييب و بيرينجي چاليشمالار دوكتور فيض الهي­يه عاييددير. اينقلابين ايلك گونلريندن نسيمي ديوانينا و ياشاييشينا مقاله يازان و اونو تانيتديران اولدوز بيگ اولموشدور. نسيمي­نين سئچلميش تركي شعرلري بير سرين و دورو سو كيمي سوسوز خالقيميزين جانيني ديريلتدي. اولدوزون ايكي ديلده توركجه و فارسيجا- يازديغي مقدمه­لرده دؤنه-دؤنه اوخوندو. نظامي­نين دا توركو شعرلري- فارسيجادان چئوريلميش- خالق ايچينده سئوه- سئوه اوخوندور. خورشيد بانو ناتوان و حيران خانيمين شعرلريني آذربايجان ادبياتينين ماراقلي­لاري ايلك دفعه حسين اولدوزون اثرلريله اوخويوبلار.

بوسيرا كتابلار و شعرلري توپلاييب، اوخوجولارين اللرينه چاتديرماق تكجه اوره­يي خالقينا، ادبياتينا يانان كؤوره‌ك اوره­كلي بير يازار اولمالي­دير. حسين اولدوز دا همان اوره­يي‌يانان و ياخود كؤوره­ك اوره­كلي يازيچيميز دير. بيز اونو احساسلا و درين دويغولارلا، دؤنه- دؤنه سؤزلريني تكرار ائتديگي اؤن سؤزلريندن حسّ ائديريك.

كوراوغلو و دده قورقود مجله لري[۱۵]

اسلامي انقلاب غلبه چالديقدا، حسين اولدوز او معدود ضيالي­لاردان­ديركي توركجه درگي چيخارماقلا اؤز بورجونو آنا ديلينه اؤده­مه­يه چاليشدي. حسين اولدوز «اولدوز» آدلي شاها قارشي مبارزه ائده ن و تورك ديلي­نين احياسينا چاليشان بير گروپون باشيندا اولماقلا توتولوب و ۱۰ ايل زيندانا معروض قالميشدي، ۷ ايلدن سونرا ۱۳۵۷ جي ايلده دوستاقدان آزاد اولور و ايلكين گونلردن تورك ديلي‌نين گليشمه­سي اوغروندا فعاليته يول آختارير. ۱۳۵۸ جي ايلين ايلك آييندا «كوراوغلو» آديندا ۲۴ صحيفه­ليك مجله ياييلير. مقاله لرين چوخونو حسين اولدوز يازميشدير و بیرده قلم دوستلاری[۱۶] اولموشدور. مجله آيليق اولاراق، ايكينجي و اوچونجو ساييلاري دا بوراخيلير، آنجاق يازيچيلاري­نين سايي ۱۰ نفره چاتمير، آمما ايستك­لي­لر طرفيندن آلقيشلانير.

كوراوغلو اوچ سايي­دان آرتيق دوام تاپمير. چونكي بير طرفدن يازيچيلاري­نين باشلاري شولوغ اولاراق واقت تاپميرلار و هاميدان مهم مالي چتين­ليك­لري اونون آيليق يايماسينا امكان وئرمير. آيلار دولانيرو داها كوراوغلودان خبر چيخمير. آنجاق حسين اولدوز وار گوجونو بير يئره ييغيب ۱۳۵۹ جي ايلين شهريور آييندا مجله­ني «دده قورقود» ۲۰ سايي آز- چوخ منتظم صورتده چاپ اولور و اونلارجا يازيچي ايرانين باشا باشيندان: تبريز، تهران، اصفهان، اورميه، خراسان و باشقا باشقا شهرلردن آرخاداشليق ائده­رك مقاله و شعرلري چاپ اولور. آشاغيدا آدلاري چكيلن شاعر و يازيچيلارين اثرلري بو درگيده چاپ اولوردو: حميد تئليم خاني، ائل اوغلو، م. نقابي، فريدون حاصارلي، ح. م. ساوالان، بهرام ائلچين، اصغر فردي، ح. ساهر، ه. ترلان، قافلانتي، ح.صديق،ح. فرشباف،ح. بابك، ح. آلپاميش، ح. ايلديريم، م. شيمشك، صمد ايلقار، ستار گول محمدي، صمد سرداري نيا، آشيق بشير، عليرضا حميده‌خو، حميد پارلار و …

درگي­نين اصل موضوعو آنا ديليميزدان مدافعه، ديليميزين گؤزه­لليك­لريني- گوجونو تانيتديرماق، كلاسيك و معاصر ادبياتيميزي يايماق، ديليميزين دوشمنلريني تانيتديرماق اولموش  و آشاغيداكي موضوعلاردا درگيده طرح اولوردو:

۱) آمريكا اؤلكه ميزين، خالقيميزين و انقلابين اصلي دوشمني اولاراق، مختلف كاريكاتورلاريلا تنقيد اولوب و گاهدان امام خميني­نين سؤزلري بو بارده ده قيد اولونوردو.

۲) درگي نين اوست قابيغي و گاهدان دال قابيغي­نين شكيلي آذربايجان قهرمانلاري و بؤيوك شخصيت­لري او جمله­دن بابك، كوراوغلو، عمادالدين نسيمي، فضولي و دده قورقود داستانلاري­نين قهرمانلاري اولوردو. ايلك ساييلاريندا بونلاريدي، گئت گئده ضد آمريكا كاريكاتورلار اونلارين يئريني توتدو.

۳) جنگ موضوعو و صدامين كاريكاتورلاري، صدامين جنايت­لري­نين آچيقلاماسي و صدامي آمريكا اويونچاغي كيمي تانيتديرما، درگي­نين دواملي موضوعلاريندان اولوردو.

۴) ساتيرا، يومور و طنز دده قورقود درگي­سي­نين اصلي موضوعلاريندان ساييليردي و اجتماعي مسأله‌لر، طنز يولو ايله تنقيد اولوب و اونون يازيچيلاري مستعار آدلارينان او جمله­دن: يورقان علي، دووشان جعفر، ج.جه باقر، جاواد نعره، توسباغا جاوادو باشقا آدلارينان تانينيردي. آشيق ادبياتي­نين اؤزه­ل بير يئري واريدي. حسين اولدوزون آتاسي آشيق علي­نين دواملي اولاراق اؤز يئري واريدي، بلكي ده بونا گؤره او بيري آشيقلار اوچون يئر وئريلميشدي. آشيق قشم، آشيق عبدالعلي، آشيق بشير و باشقا آشيقلارين شعرلري و داستانلاري يازيليردي.

۶) كلاسيك ادبياتيميزين اؤز يئري واريدي. ايلك ساييلاريندا عمادالدين نسيمي، فضل الله نعيمي نئچه ساييدا تانيتديريلدي و سونرالار كلاسيك شاعرلريميزي يئري هئچ زامان بوش قالمادي.

۷) اويون و ياخود نمايشنامه­نين اؤزونه مخصوص يئري واريدي. حسين اولدوزون اؤز باجاريق و علاقه­سيندن آسيلي اولاراق بو هونرين يئري واريدي. فيلم تنقيدي ده نئچه ساييدا اؤزونه يئر آچدي.

۸) فارس شووينيزمينين عليهينه مقاله­لر يازيليردي.

اوست اوسته دده قورقودون ديلي ساده، آخيجي و تبريز لهجه­سيله يازيليردي و گئت به گئت ادبي ديل اؤزونو گؤستردي و مجله ادبي بير ماهيت قازاندي. دده قورقودون سون ساييسي ۲۰ جي سايي ۱۳۶۱ جي ايلين ارديبهشت آييندا ياييلير. اوز قابيغين طرحي بير كاريكاتور اولاراق صدامي بئله گؤسته‌ريركي آمريكا بو بؤلگه‌يه قويوب و آمريكاني دا اسرائيل حيمايه ائدير. دال قابيغيندا امام خميني تصويري گلميشدير و بير سؤزو: «آذربايجان منيم اوميديم دي مخصوصاً تبريز». بو سايي ۴۰ صفحه اولاراق ياييلميش و بو مقاله لر اوندا گئتميشدير: باش سؤز- ادبي ديل و ولايتي لهجه لر، اوغوزنبي حاققيندا دؤردونجو مقاله، ميرزا عبدالرحيم طالبوف حاققيندا بير مقاله، عندليب قراجه داغي تانيتديرماغا بير مقاله، سازو سؤز اوستادي گونئيلي آشيق قشم ياشاييشينا و شعرلرينه حصر اولموش اوچ صحيفه­ليك مقاله، نئچه طنز مقاله: يورقان علي­نين جبهه احوالاتي(حيكايه)، قوناق دؤيوشو(طنز شعر)، بوغاز دردي(طنز شعر)، او اولماسون بو اولسون(طنز فيله­تون) و … سونرا نئچه صفحه ده شئعرلر و …

مجله‌نين[۱۷] اوّللرينده هئچ تاريخ قويولموردو مثلا” بيرينجي، ايكينجي و اوچونجو؛ دؤرد و بئشينجي ساييلارين اوستونده تاريخ يوخدور. اوچونجو سايي­ني بير اؤتري باخيشلا واراقلاساق او بيري ساييلارين دورومونو آچيقلاميش اولوروق. اوز قابيغيندا كوراوغلو آت اوستونده بولوت اميدين اثري گلميش، دال قابيغيندا هجر خانيم ين شكلي آت اوستونده دير. هر ايكي تصويرين آلتيندا بير دؤردولوك توركجه شعر  گلميشدير. بو سايي­نين اساس موضوع و مقاله­لري بونلاردير: باش سؤز، آذربايجان و تورك اساطيرلريندن ساري گول باش، قديم آذربايجان ديلي و ادبياتي حقينده بير نئچه سؤز، گلچين ادبيات آذربايجان، آذربايجان  نقاشلاريندان: بولوت اميد، آشيق حمايل خانيم- آذربايجان آشيق و شاعر قادينلاريندان، كلاسيك ادبياتيميزدان:  ركن­الدين مسيحي، شفاهي ائل ادبياتيندان: آشيق بستي، صمد بهرنگي­نين ايل دؤنومو: قارانقوش خاطيره­سي، آذربايجان ديلي­نين دوشمن‌لري: كسرويزم- كارنگيزم، آذربايجان كلاسيك شاعرلري­نين شعرلريندن نمونه‌لر:  نسيمي، ختائي، ليلا خانيم، نظامي، حيران خانيم و سونرا نئچه صفحه چاغداش شاعيرلريميزين شئعرلري. بوساييدا اوشاقلار باغچاسي آدلاناراق اوشاقلارا دابير صفحه آچيلميشدير.

دده قورقود درگي سي چوخلو اوخوجولارين طرفيندن آلقيشلاندي و يازيچيلاريميزدا اوندان حيمايه ائتديلر. خالق ايچينده اؤزونه يئر آچدي. دده قورقودون سه­سي مرزلردن آشيب اوتايا كئچدي. پروفسور ميرزايف «آذربايجان» درگي­سي­نين ۱۹۸۱ جي ايلده ۴۰ صفحه­سيني دده قورقود آراشديرماسينا اختصاص وئرميش و اونون مختلف ساييلاريندان شعر، مقاله و سؤزلريندن سئچيب گتيرميشدير.

[۱]) يحيي شيدا، ادبييات اوجاغي، تبريز، ۱۳۶۴، ص ۷۴٫

[۲]) حسين فيض‌الهي وحيد ، اوروزخان حماسه‌سي، تبريز، ۱۳۷۶٫

[۳]) اوروزخان جماسه‌سي، همان، ص ۶٫

[۴]) دكتر حسين فيض‌الهي وحيد، آيدين سردار، تبريز، ۱۳۷۶٫

[۵]) باياتيلار، توپلايان حسين فيض‌الهي وحيد، تبريز، انتشارات تلاش، ۱۳۶۱٫

[۶]) آتالار سؤزو، عقلين گؤزو، حسين فيض‌الهي وحيد، تبريز، ۱۳۶۶٫

[۷]) ياز بيزه قوناق گله‌جك، حسين فيض الهي وحيد، تبريز، انتشارات ياران، چاپ سوم، ۱۳۸۰٫

[۸]) اللي عاشيق، اللي نغمه، حسين فيض‌الهي وحيد، تبريز، ۱۳۷۴٫

[۹]) نظامي گنجوي، سئچيلميش اثرلري، حسين فيض‌الهي وحيد، تبريز، انتشارات ياران، ۱۳۷۰٫

[۱۰]) عمادالدين نسيمي، سئچيلميش اثرلر، حسين فيض‌الهي وحيد،، تبريز، انتشارات ياران، چاپ سوم، ۱۳۸۳٫

[۱۱])حيران خانيم، ديوان، حسين فيض‌الهي وحيد،، تبريز، ۱۳۷۰٫

[۱۲])خورشيد بانو ناتوان، ديوان، حسين فيض‌الهي وحيد، تبريز، انتشارات ياران، ۱۳۷۰٫

[۱۳]) ليلا خانيم، ديوان تبريز، ۱۳۸۲٫

[۱۴]) مهري خانيم، ديوان، تبريز، ۱۳۸۳٫

[۱۵]) بورادا، حسين اولدوزدان كوراوغلو و دده قورقود مجله‌لري‌نين كوپوسونو منه وئرديك لريندن اوز تشكورلريمي بيلديريرم. شوبهه يوخدوركي آذربايجان مطبعه‌لريني آراشديرمادا، بو ايكي درگي‌نين يئري آيدين دير.

[۱۶] بونلارندان بیری ده بو سطرلرین یازاری دیر.

[۱۷]) حسين اولدوز حاققيندا و بو درگي‌لري آراشديرما ساحه‌سينده، باكي عاليمي ميرزايف «آذربايجان» درگي سينده بير مقاله يازاراق بو درگي‌ني تانيتديرميشدير:

-) آذربايجان درگي‌سي، نمره ۹، ۱۹۸۰٫

ارسال دیدگاه