آذربایجان چاغداش ادبیاتی

آذربایجان ادبیاتی گئنیش و درینلیگیله برابر عئینی حالدا چوخ ده یرلی و زنگین بیر ادبیات دیر. بورادا شئعر، حیکایه ایسترسه دوز یازی و ایسترسه ده منظوم حالدا یارانیر. بو موضوعا توخونان کتاب ۹۷۰ صفحه ده م. کریمی طرفیندن ناشره تاپشیریلیب و تبریزده نباتی یایین ائوی اونو یایمادادیر.

chagdash

چاغداش شعريميزين ان اؤنملي اؤزه لليگي، اونون محتوا و معنالانما يؤنو دور. بو اؤزه لليك بوتون قالان اؤزه‌لليك­لرين اؤنونده گئده­رك، شعريميزين اؤنجولچوسو اولور. بوشعرده، توپلومسال ليريزيم ايله اوز- اوزه گليريك و فولكلوريك شعريميزين صميمي­ليگي ده اوندا ياشايير و بيرطرفدن ده خاليقيميز و ضياليلاريميزين ان يوكسك ايستك­لري – آرمانلاري بونلاردا لپه له نير. حبيب ساهر، سهند، مفتون، شهريار، عليرضا اوختاي، باريشماز، زهتابي، هادي قاراچاي و اونلار جا باشقا- باشقا درين دوشونجه‌لي، خالق سئوه­ر و يورد سئوه­ر شاعرلريميزين اثرلري بو ادبياتي ياردانلاردان ديرلار. بونلار كلاسيك شعري، فورم و محتوا يؤنوندن بوتوولوكله ده‌ييشيب، انساني تفسير ائتمه يه چاليشيرلار، شعريميزين آرمانلار داليجا اولدوغو، چاغداش دورومدان آسيلي­دير. بو دوروم، آذربايجانين وارليغي و خالقي­نين ديلي‌‌‌‌‌­نين دانيلماسيندان ايره­لي گلميشدير، ديليميزي ثبوتا يئتيرمك، سانكي بؤيوك چاليشيق‌‌‌‌‌‌‌‌‌‌‌لارا سبب اولموش و روحيه­ميزي ده همين حركت ياراتميشدير. بير ديله حرمت­سيزليك، او ملتين وارليغيني داهاماق و آلچاقلانديرماق معناسيندا و اونون قارشيندا عكس‌العمل گؤسترمك دوغال بير حركت دير.[۱] بو حركت بير يؤندن اعتراض علامتي و بير طرفدن اؤز كولتور و ديلينه آرخالانماق و باغلي­ليغي معناسيندا دير. آذربايجان شعري بوگون بو اؤزه­لليگي اؤزوايله داشيير و اؤزونو قوروماق اوچون ده بوتون خالقين ايستك‌لريني ايفا ائتمه زوروندادير و باجارديقي سخاوتله، الي آچيقليق‌لا هاميني دؤورونه توپلايا جاقدير. هر حالدا ديليميزين ياساقلانماسي و كولتوروموزون سورگون ائديلمه­سي، شعريميزين تنقيدي و اعتراضلي حالا چئوريلمه­سينه سبب اولموش و انقلابي بير روحيه ايله ايره­لي گئدير.

توپلومسال شعر، توپلومون درديندن يارانان بير شعر دير و هميشه اوياق، اعتراضي و تنقيدي بير شعر اولور. آذربايجان شعري ده بئله ايسته­نيلمز دورومون قارشيندا دايانيب و اؤزوندن مدافعه ائده­رك، گاه وارليغيندان قوروماق حالينا گلير و اعتراض سسيني قالديرير، گاهدان دا قانونا آرخالاناراق اؤز حقّيني ايسته­يير. هر ايكي حالدا، آذربايجان شاعري آياق اوسته دايانيب مبارزه حاليندادير. بئله بيرحال اونون اويناقلي، چاليشقانلي اولدوغونا بير دليل ساييلا بيلير و چاليشير بلكه اللريندن قانداللاري يئره آتسين.

آذربايجان ديلي‌نين ياساغليغي بيرينجي مساله­ديركي بوتون شاعرلريني اؤزونه چكير و اونو اؤز دورومونو اؤلچمه­يه چاغيرير. بوشاعرلر، حاكم نظامين حركت‌لرينه‌ده هميشه ايكي گؤزلو باخيب، شبهه­لي حاليني ساخلايير. حاكيم ديل، اؤزونو اوستون گؤرور، آذربايجان ديلي محكوم ساييلاراق بير قارشيلانماسي احتمالي نظردن آتماماق گره­كير. بوناگؤره ده آذربايجان شعرينده عشق، سئوينج يئريني چوخ يئرلرده نفرت و اعتراض توتموشدور. بو نفرت و اعتراض، چاغداش شعريميزده بير مكتب اولماغا چئوريلديگيني سؤيله سك يانيلماميشيق. بو دوروم، شعريميزده رومانتيزمين آزليغينادا سبب اولموش و عاشقانه شعريميز اولماديغي قدر تانينماقدادير. اونا گؤره ده آذربايجان شعرينده يالتاقليق، اينجييب- كوسمه، عشوه و ناز و بئله- بئله لوس ادالاردان ايراقدير و اونون يئرينه، حتا عاشقانه شعرلريميز ريتم وآهنگ ده حماسي و خشن بير حال تاپير. هادي قاراچاي، محمدرضا لوايي، حميد شهانقي، حسين رزمي، توكل كياني اصل، آتيلا كيشي­زاده و باشقالارينين شعرلرينده بونو گؤرمگ چتين دئييلدير. كئچن  اون ايلده، بودوروم داها استقامت تاپميش و تثبيت اولموشدور.[۲]

چاغداش شعريميزين اؤزه­لليكلري روحلودور و برابر‌ليك آختاران، حاكيم و محكوم نظامينا اعتراض قالديران و اؤزونو حاكيم سانانلارين قارشيندا دايانان بيرشعردير.

بو شعر: گئتيديكجه قوميت­دن چيخاراق بوتون دنيا خالقلاريندان حمايه ائده­ن بير شعره چئوريلير و گئت گئده بشريت ايستك‌لريني دينله‌‌ين بير شعر اولور. بو شعرين باشلانغيجيني اوختايين شعرلرينده گؤروروك، سون اون ايلين شاعرلرين اثرلرينده قاباريق شكيلده گؤرمك ممكندور. بو شاعرلريميزي بير دويؤشكن و هميشه دؤيوش اوچون حاضرليغي اولان شاعرلر گؤروروك و دوغروسونا آذربايجان خلقي‌نين روحيه­سيني اوخشايان شاعرلر اولموشلار.

شعريميزين بوگونكو اؤزه­لليگيني آراشديرماق  ايسته‌ييرسك، ايلك اؤنجه اونون ناسيوناليزمه و بلكه ده پان توركيزمه متهم اولدوغونو آراشديرمالي اولوروق. بوتون شاعرلريميز شعرلرينده آنايوردلاري آذربايجانی اؤيوب وطن، آناديل و بئله بئله موضوعلاريني هاميدان آرتيق يارارلانيب تعريف ائديرلر. هانسي شاعريميز آذربايجانا و يا آناديلينه شعر سؤيله­مه­ميش؟ حتا «حيدربابايا سلام» كيمي عاطفي بير شعر، يوزلرجه شاعرلريميزه اؤرنك اولاراق، يازديقلاري بنزتمه‌لرده حماسي و ائپيك بيرديل ايلن يئرلي داغلارا، آبيده­لره خطاب ائده­رك ائلين- يوردون درديني سؤيله ميشلر. هر آذربايجان شاعري قلم اله آليب ايلك شعريني عاشقانه يازيرسادا، ديلينه ائلينه اولان ظلمدن ده دانيشماسي حتمي بير اولاي دير. دوغرودور آذربايجان شعري­نين ايلك و اورژينال اؤزه لليگي وطندن، ديلدن و ائلدن مدافعه ائتمك­دير. آنجاق تازا شعره اوز گتيره‌ن شاعرلريميز آپ- آيدين آچيق ‌جا دئيه‌رك، اقتدارلي شاعرلريميز اونو هنر پالتاريندا و بلكه درين معنالاريلا شعره گتيرميشلر.

۱) م. کریمی، هویت ایرانی و زبان ترکی، زنجان، ۱۳۷۷، ص ۱۶٫

۱) م. کریمی، روشنفکران آذربایجان، ص ۲۸۲٫

ارسال دیدگاه