ارج نامه اوستاد کریمی مراغه ای

سردری مدنیت ائوی ۹۶جی ایلین فروردین آیی نین ۱۴جو گونونده حقیر (م. کریمی) اوچون بیر عزیزله مه مراسیمی قوردو. بو مراسیمده منه هدیه وئره ن عالیملر و دوستلارین چوخو کتابلا منی قارشیلادیلار و ان گؤزل هدیه لری آلدیم. اونا گؤره بو عالیملردن و دوستلاردان درین منتدارلیغیمی بیلدیره رک، بو هدیه لری اوخوجولارا تانیتدیرماق ایسته ییرم.

                                                       م. کریمی

n00232785-t

ارج نامه میرزا حسین کریمی مراغه ای

مدنیت ائوی هر هفته جمعه آخشامی ساعات ۴دن ۷یه قدر سردری مدنیت ائوینده ادبی ییغینجاقلاری قوراراق، بیر چوخلو ادیبلر، شاعیرلر توپلانیب یاراتدیقلاری شعر، مقاله و آراشدیرمالارینی بیرگه پایلاشیرلار. هر هفته ده بیر شاعیر، یازار و عالیمی تقدیره لاییق سئچیب عزیزله ییرلر. اونون حاققیندا دانیشیب اثرلرینی آراشدیریرلار؛ اؤزوندن اؤیره نیرلر. بئله لیکله بیر صنعتکار یا ادیب ویاخود شاعیر اورتایا آلیتیب، اشتراک ائده ن شاعیرلر شعرلرینی و ادیبلر اونون حاققیندا مقاله لرینی اوخویورلار. چکیجی نوکته بوراسی دیر کی تقدیر اولونان  شاعیر یا ادیب حاققیندا اولان مقاله لر و دانیشیقلار بیر یئره توپلانیب کتاب کیمی ده یاییلیر. جناب حکیم قابل نژاد بو بؤیوک ایشی گؤرمکله ادبی تاریخیمیزده بؤیوک بیر رول اویناییب، یارانان اثرلر ابدیله شیر.

   مدنیت ائوی یارانان گوندن داواملی اولاراق بو ده یرلی جلسه لری قورموش و بوگونه قدر نئچه – نئچه کتاب حاضیرلامیشدیر. او جمله دن اوستاد کریمی مراغه ای حاققیندا یازیلان شعرلر و مقاله لر “ارج نامه” عنوانیلا چاپ اولموش و حکیم قابل نژاد اؤزلری اونو مدیریت ائتمیشلر. اوستاد کریمی مراغه ای دن علاوه دوکتور محمدزاده صدیق و حیدر عباسی (باریشمار) اوچون ده بئله ارج نامه لر حاضیر اولماقدادیر.

   اوستاد کریمی مراغه ای نین ارج نامه سی ۸۰۰ صفحه ده نفیس بیر قابیق ایله چاپ اولموش و یاییلمیشدیر. اورادا رهبر معظم آیت اله خامنه ای، حکیم قابل نژاد، باریشماز، جواد دربندی، زضا همراز، نعمت مسگری و بیر چوخلو یازارلار و شاعیرلرین آراشدیرمالاری چاپ اولموشدور، هابئله اوستاد کریمی نین بیر نئچه شعری ده بورادا  اؤرنک کیمی گلمیشدیر. بو کتاب چوخ نفیس بیر شکیلده تکدرخت انتشاراتی طرفیندن چاپ اولموش و ۸۵ مین تومن ایله اوخوجولارین اختیاریندا قویولموشدور.

ارسال دیدگاه