آشار داشار / حبیب محسنی اعلاء (یاری)

سردری مدنیت ائوی ۹۶جی ایلین فروردین آیی نین ۱۴جو گونونده حقیر (م. کریمی) اوچون بیر عزیزله مه مراسیمی قوردو. بو مراسیمده منه هدیه وئره ن عالیملر و دوستلارین چوخو کتابلا منی قارشیلادیلار و ان گؤزل هدیه لری آلدیم. اونا گؤره بو عالیملردن و دوستلاردان درین منتدارلیغیمی بیلدیره رک، بو هدیه لری اوخوجولارا تانیتدیرماق ایسته ییرم.

                                                       م. کریمی

آشار داشار / حبیب محسنی اعلاء (یاری)

تبریزین گؤرکملی شاعیر، رسان، خطاط، پیکر یونماق و ادبیات معللیمی اولاراق تانینمیش بیر انساندیر. بو دَیرلی صنعتکار اونلارجا ال قلمی ایله پُرتره لر یارادیب، او جمله دن اوستاد شهریار، اوستاد یحیی شیدا، مونالیزا و باشقالاری نین شکیل لرینی یارادیب و تبریزین “خانه شطرنج” تالاری نین دووارلارینی بزه میشدیر. بونلار یانیندا یاری جنابلاری ده یرلی بیر شاعیردیلر ده.

   یاری جنابلاریندان بوگونه دک اوچ جیلد شعر دفتری چاپ اولموشدور: دان اولدوزو، شوریده، آشار داشار. یاری جنابلاری نین منه پای وئردیگی اثر آشار داشار قوللوغونوزا تانیتدیریلیر: بو کتاب ۴۸۰ صفحه ده مختلف قونولارا سؤیله دیگی تورکجه و فارسجا شعرلری احتوا ائدیر. بورادا یازیلان شعرلر مختلف قونولاردا، ژانرلاردا و قالیبلاردا سؤیله نن شعرلردیر.

   یاری ۱۳۱۵جی ایلده تبریزده آنادان اولموش و مدنیت ائوی نین فعال عضولریندن ساییلیر. اونون مهربان و گولر اوزو گنجلریمیزی شعر و ادبه ساری ماراقلاندیریر. گؤزل دانیشیغی، مهربانلیقلار گئدیشی و حاضیر جوابلیغی هامینی اؤزونه چکیر. یاری نین شعرلری چوخ گؤزل، مکحم و اوره ک اوخشایان دیر. غزل اوستادی اولدوغو حالدا، حیدربابایا سلام اثرینه بنزه تمه لر یازمیش، او جمله دن گورگور بابا آدلی اثری بیر مستقل شعر دفتری کیمی ده یر صاحیبی دیر؛ هابئله سهندیه سایاغیندا یازدیغی شسعر و منظومه لری ده اونوتماق اولماز. یاری، اوستاد شهریارین وورغونلاریندان اولاراق، اونا درین حؤرمت بسله میش و اوستاد شهریارین شعرینه بنزهع تمه لرله اؤز اخلاصینی گؤسترمیشدیر. اونودمایاق کی اوستاد یاری نین شعرلرینده اونون باشقا صنعت لریندن یارارلانماسینی دا یاد ائده م. دوغرودان دا اونون شعرلرینده، شاعیرین رساملیق هنری اؤزونو گؤسته ریر و شاعیر عئینی حالدا تنصویره آلدیغی صحنه لرده بو هنریندن و استعدادیندان دا یارارلانیر.

   ب. کتابدا مختلف شعرلرله برابر گوگور بابا و نصاب الرجال اثری نین اولدوغونو آیریجا قئیده آلماق لازیمدیر. گورگور بابا ۱۲۶ بندلیک بیر اثرزدیر کی بیز بورادا اوندان سونونجو بندینی اؤزنک گتیره رک سؤزوموزه سون قویوب، اوخوجولاری کتابین اوخوماسینا توصیه ائدیریک:

یاری، سنین شعرین سو تک رواندیر

جانسیزلارا جاندیر، داماردا قاندیر،

اؤزون قوجالسان دا طبعین جواندیر

     دولوب سنین شعرین ایله بو دیار

     بونلار قالار ائل – اویادا یادگار.

نظرات

ارسال دیدگاه