زینب پاشا / مجید رضازاد عمو زین الدین

سردری مدنیت ائوی ۹۶جی ایلین فروردین آیی نین ۱۴جو گونونده حقیر (م. کریمی) اوچون بیر عزیزله مه مراسیمی قوردو. بو مراسیمده منه هدیه وئره ن عالیملر و دوستلارین چوخو کتابلا منی قارشیلادیلار و ان گؤزل هدیه لری آلدیم. اونا گؤره بو عالیملردن و دوستلاردان درین منتدارلیغیمی بیلدیره رک، بو هدیه لری اوخوجولارا تانیتدیرماق ایسته ییرم.

                                                       م. کریمی

عمو زین الدین

زینب پاشا / مجید رضازاد عمو زین الدین

زینب پاشا مشروطه انقلابی نین گؤرکملی سیمالارینداندیر. او، تاریخیمیزده قویدوغو اثرلر و ائتکی لر اساسیندا اؤز گؤزل آدینی قادین و انقلاب دونیاسیندا قالارقی آدلار آراسیندا ساخلاییر. اونون آدی دیللر ازبری اولاراق خالق اونا شعرلر قوشود. بو شعرلر هر یاندا اوخونور. بیلیریک مشروطه انقلابیندا تبریزده تکجه ستارخان و باقرخانا یوخ، بلکه بیر چوخلو ایگیدلره شعر قوشولوب اوخونوردو. بونلارین آراسیندا ان اوزون شعرلر و ماهنی کیمی دیللر ازبری اولان بایاتیلار زینب پاشا آدینا اوخونور. زینب پاشا انقلابین قادینلار حرکتینه اؤنجو اولاراق مشروطه نین غلبه سینده، اؤزه للیکله تنباکو حرکتی نین باشاریسیندا بؤیوک رول اوینامیشدیر.

بو کتابین یازاری گؤرکملی گنج یازاریمیز مجید رضازاد عمو زین الدین اولموشلار. بو درین دوشونجه لی یازار، زینب پاشانین یاشاییشی، اونون تنباکو حرکتینده رولو، تبریزده گؤردویو ایشلر، نهایت زینب پاشانین خالق ایچینده اولان حؤرمتی و ایشی نین عاقبتی نی آراشدیریر. بو کتاب دؤرد بؤلوم و هر بؤلوم نئچه فصلدن عبارتدیر. کتاب ۱۴۴ صفحه ده سومر نشر طرفیندن ۸۵۰۰ تومنه یاییلمیشدیر و یاییلما ایلی ۹۴جی ایل اولموشدور.

مجید رضازاد عمو زین الدین ۱۳۴۹جو ایلده تبریزده آنادان اولموش و بوگونه قدر اونلارجا گؤزل و قیمتلی کتابلار، اونلارجا مقاله لر مختلف درگیلرده یازمیشلار. یازارین درین علمی باخیشلاری و علمی آراشدیرمالارینی اوخویوب اؤیرنمه لی ییک. یازار اوچون باشاریلار آرزیلاییب، اوخوجولاریمیزا بو اثرین اوخوماسینی توصیه ائدیریک.

ارسال دیدگاه