ائله بئله

ائله بئله

ائله بئله عنوانلی کتاب، کاظم شهابی آزاد – “سئور” تخلصو ایله تانینان گنج شاعیریمیزین ایلک شعر دفتری دیر. سئور شهابی چاغداش گنج شاعیرلر آراسیندا گؤزل ایفالاری، باجاریلی آپاریجیلیغی و دویغولو شعرلریله تانینمیشدیر. بو دفترده سئورین ۶۰ شعرینی اوخویوب لذت دویوروق. بو اثری ۱۰۰ صفحه ده “آذر تورک” یایینلاری تبریزده چاپ ائتدیرمیش و یایمیشدیر. بو اثره اؤن سؤز یازان بؤیوک اوستادیمیز دؤکتور صدیق جنابلاری اولموشدور.

   سئور، ائله بیر شاعیردیر کی سینه سی شعرلرله دولو اولاراق، هر زمان ایسته دیگی حالدا بوتون شعرلرینی ازبر اوخویور. تکجه اؤز شعرلرینی یوخ، بلکه چوخلو آذربایجان شاعیرلرین – او تایلی – بو تایلی، شعرلرینی بیلیر و گؤزل سسیله اوخویور. اونون هوشلو – دقتلی اولدوغوندان علاوه، اوره یی اینجه دویغولو، بئینی ایتی و قلمی آخیجی اولدوغونو ایلک گؤروشده بیلمک چتین دئییلدیر. شعرلرینده دالغالانان گؤزل دوشونجه لر دیله گلیر و اوخوجو اوچون یئنی پنجره لر آچیر. بونلارین یانیندا سئور جنابلاری نین شعرلری نین اؤزه للیگیندن دانیشماق ایسترسک اونون گوجلو – عئینی حالدا شاعیرانه دیلی قاباریق شکیلده اؤزونو گؤسته ریر. او دیلیمیزه دقتله یاناشیر، سؤزجوکلری یونتالاییر، اونلاری بزه ییر و سونرا دوزگون صورتده جمله لرده دوزور.

   اونون شعرلری دوشونجه باخیمیندان دا دَیَرلی دیر. او، توپلومدا اولان دردلره قیدسیز قالماییر، انسانلارین دردلرینی اؤز دردی کیمی بیلیر. بیر شعرینده بیر آتانین “ام اس” نوخوشلوغو اولان قیزی اوچون بؤیره یینی ساتماغا چالیشیر!؟ بو غیرتلی آتا، تاسوفلرله، جامعه میزین بیری دیر و شاعیر بئله طینیف لره اورَک یاندیریر؛ دردلی انسانلارین دردلرینی یازیر. بو نوع شعرلر گؤسته ریر کی شاعیر انسان سئور بیر شاعیردیر و انسانلار اوچون شعر یازماغا اوز گتیرمیشدیر. شاعیر، اورَک آرزولارینی خالق آرزولاریلا باغلاییر. بیر شعرینی بیرگه اوخویالیم:

دیل – دوداقدا ذیکر دئییب

واراقلاری قاتیر کیشی.

دوشوندوکجه ام اس قیزین

بانمایا پول آتیر کیشی.

حریف باشدا نقشه چکیر

گیزلیجه بیر واراق اکیر

سککیز – دوققوز چکیر

یاتاقلیغا باتیر کیشی.

جان شوشه سین سونور دئوه

اوتانجیندان دؤنمور ائوه

عاییله سین سئوه – سئوه

خیاباندا یاتیر کیشی.

سحر – سحر دوشور یولا

باخیر ساغا، باخیر سولا

باخیشلاری دولا – دولا

بؤیره یینی ساتیر کیشی.

اونون شعرلرینی آراشدیریب، شاعیرین شعر هنریله برابر شعر دوشونجه سینی باشقا مقاله لرده داوام ائده جه ییک.

ارسال دیدگاه