سس دوشوب شهره

 

علی زارعیان – “شاملی” تخلصو ایله گنج شاعیرلریمیزی بیریسی دیر کی تبریزدن باش قالدیریب و اومورام کی تئزلیکله آدی و سانی گؤزل شعرلرینه گؤره بوتون ایرانی چولقایاجاقدیر. شاملی نین ایلک شعر دفتری “سس دوشوب شهره” عنوانی ایله ۹۰ صفحه ده تکدرخت یایینلاری طرفیندن یاییلمیشدیر. بو شعر دفترینه دؤکتور صدیق اؤن سؤز یازماقلا اونون شعرلری نین ده یرلی اولدوغونو گؤسترمیشدیر.

بورادا اولان شعرلری اوخودوقدا، شاملی درین دوشونجه لی، عرفان باخیشلی و دیلیمیزه حؤرمتله توخونان بیر گنج شاعیر اولدوغونو اینانیریق. او، بو ایلک دفترینده مختلف شعر فورمالاریندان یارارلانمیش، غزلدن توتوب، قوشما، گرایلی و سربست شعرلر یازماغا گوجلو بیر شاعیر اولدوغونو اثبات ائتدیریر. قیسا شعرلری ده آز دئییلدیر. او دئییر:

قارا گؤزلرین

عشق کعبه سی نین حجرالاسودی. . .

طواف ائتمه لی یم او گؤزلری

عؤمور بویو احرام باغلامیشام.

گؤرونور شاملی نین شعر دیلی آخیجی، معنا باخیمیندان دوم – دورو و سؤزجوکلر ده یونتالانمیش دیر. باشقا قیسا شعرینده یئنه دئییر:

گؤزومو آچمادان

دان یئلی سوپوردو منی آیاقلارینا

سجده لریم نیّتیمی قاباقلاییب.

اونون غزللرینده یئنیلیک لر وار؛ گؤزل بنزه تمه لر، استعاره لر، ایکاژلار و تعبیرلر واردیر. گلن بیر فرصتده اونلارا توخونمالی ییق. ایندی شاعیره باشاریلار دیله ییب، شعر سئورلری بو شعر دفتری نین اوخوماسینی توصیه ائدیریک.

www.qizilqelem.ir کتابخانا بؤلومو

سس دوشوب شهره

ارسال دیدگاه