کاغاذین بئلی بوکولدو / نیلوفر ملکی (لاچین)

نیلوفر ملکی – لاچین تخلصو ایله گنج بیر شاعیر اولاراق درین دویغولو، اینجه باخیشلی، دولو دوشونجه لرینی شعرلرینده جانلاندیریر. لاچین خانیمین ایلک شعر دفتری اولان کاغاذین بئلی بوگولدو – ۸۸ صفحه ده ۷۳ قیسا شعری احتوا ائدیر.
شعرلر قیسا اولسا دا، شاعیر درین معنالاری سؤیله مه یه چالیشیر و شعر دیلینی تاپماغا جان آتیر. آنجاق بو یولدا باشاریلار الده ائتمیش و گؤزل شعرلر سونا بیلمیشدیر. شعرلرین چوخو لطیف و اینجه دویغولارلا دولودور:
کاغاذین بئلی بوکولدو
غملرین آلتیندا
داها آغیر سؤزلریمی
دووارلارا یازیرام
بیلیرک ائویم ییخیلاجاق.
لاچین خانیمین شعرلری سربست فورماسیندا اولاراق، اوره یه یاتیر، آنجاق ملی و کلاسیک شعر فورمالارینا لاقید قالدیغی اوخوجونو اینجیدیر. بونونلا بئله شعر دیلینی تاپماغا قیزغین فعالیتی سونوجلاناجاقدیر و یاخین گله جکده بوندان داها گؤزل شعرلرینه شاهید اولاجاییق. شاعیره میز اوچون یئنی باشاریلار و سینماز قلم صاحیبی اولدوغونو آرزیلاییریق و اوخوجولاری بو شعر دفتریندن محروم قالمادیقلارینی ایسته ییریک.
کاغاذین بئلی بوکولدی

ارسال دیدگاه