شیطان لیق / علیرضا ذیحق

حکایه

بیر پارا آداملاری تانیماق چوخ چتین دیر . زامان گئچمه زسه ، کیمسه نین ایچ اوزو، و نه جور آدام اولدوغو بیلینمه ز . گنج لیک دوستلوق لاریندان توت تا گئت هر او آدام کیمی اونو بت کیمی سیتاییش ائدیرسن . بیری کی زامان اونون نه قدر آنلاییش لی و مهربان قلبلی اولدوغونو گؤستر میش دی بیر گون منه دئدی : ” بیری اؤلمه یینجه و یا ، یاشلانمایینجا اونون حاققیندا کسین قضاوت ائتمه . آدام لار تئز عوض اولورلار . ” بو سؤز ائله بئنیم ده ایدی کی بیر گون چوخ سایقی دَیَر ساندیغیم بیری نین منه نه قدر خائین جه داورانماسینی آنلادیم . اورتا مکتب ده تحصیل آلدیقیم ایللر فارس ادبیاتی معلیمی بیزه بیر یازیلی امتحان تکیلفی وئریب دئمیشدی کی ” هر نه خصوص دا ایسته رسه نیز اینشا یازین . ” من ده او گون ندنسه دیل دن یازدیم . اینشام کی فارسجا یازمیشدیم بئله نکی جومله لر له دولو ایدی :

” بیر بولبولون گؤزل لی یی اونون نغمه سینده دیر . نغمه کار لیقی دیل آچینجا آناسیندان اؤیره نیب چح چح وورماقی اونونلا مشق ائدیب دیر . سئحیرلی حنجره سی نین اعجازی دا ائله بوندان دیر . بوتون دونیادا اولان قوشلار و حیوانلار دا بئله دیلر . آما اینسانلار ندنسه فرقلی دیلر . بیرپارا اؤلکه لرده آنادان اؤیره نیلن دیلی گؤزدن سالماق ایستیرلر . پاییزین ایلک گونو کی مدرسه لرین آچیلیش واختی دیر اونلارا ایشکنجه یه دؤنور . آدام گوجلو ذکاسی له اوخویور اؤیره نیر و حتتا بیر نئچه باشقا دیل باشاریر آما آنا دیلی نین لذتی آیری بیر شئی دیر . اؤزه ل لیک گؤروری باشقا دیل لری راحاتجا یازیب اوخویا بیلیر آما اؤز دیلینی نه کی باشارمیر بلکه دانیشاندا دا اونا اؤزگه دیلی قاتیر . بونا گؤره من نئچه سری یوخودا گؤرموشم بیر بولبول اولسام دا ، سئرچه سسی چیخاردیرام . حتتا سسیم سئرچه سسینه ده دوز عاغیللی بنزه میر. بو ایچین ده آنا دیلده دانیشمایینجا ، کیتاب اوخومایینجا ، ماهنی دینله مه یینجه  ، فیلم گؤرمه یینجه و شعر لر ازبرله مه یینجه آدامین لال لیقی داها یاخشی دیر . ..”

یادیما گلیر بو دویغولارلا اینشامی یازیب بیتیرمیشدیم . دوز اون ایل اوستوندن گئچمیشدی و بیر نئچه دفعه سورغو سوآلا چکیلسه م ده سببینی آنلامیردیم . آیدین آچیق دانیشمیردیلار و هئی سوآل ایدی کی سوروشوردولار . تا کی بیر گون ایستیخدام اوچون چتین لی یه دوشوب منه صلاحیت وئرمیردیلر . هر یانا باش چیرپیپ جان آتسام دا و ایران عراق جنگینده داوطلب بیر عسگر کیمی ایشتیراک ائتسه م ده ، یئنه ایشیم دوزه لمیردی . تا کی بیر گون منه محترم بیراینسان محرمانه حالدا دئدی سنین هئچ موشکولون یوخدور تکجه امنیت اداره سینده بیر ال یازین وار کی سنی بیر ناسیونالیست کیمی تانیتدیریر . چوخ دوشونسه م ده عاغلیم بیر یانا چاتمادی . من بیر اینسان سئوه ر آدام ایدیم و سوی اوستونلویونه هئچ اینامیم یوخ ایدی . نامازیم دا نیازیم دا یدیم و سیاست له هئچ ایشیم یوخ ایدی . اؤلکه میز ایرانین اوغروندا حتتا نئچه یول جنگ ده اؤلوم دن قورتولموشدوم . بیر ایپ اوجو دالیجایدیم کی گؤره م هازامان بئله بیر یازی یازمیشام کی خبریم یوخدور . چوخ چالیشیب شیکایت لر ائتسه م ده بیری کی جیبهه  ده منله یولداش ایدی و ایش باشیندا یدی مختصر حالدا بیله مه آنلاتدی کی اؤنملی بیر شئی دئییل بیر اینشا دیر کی اون ایل اؤنجه کیلاسدا یازیب سان و معلیمیز بیر گوذاریش له بیرلیک ده امنیت ایداره سینه وئریب دیر . انگل لر گؤتور لن مک ده دیر واؤنملی اولان سیزین ایندی کی دوروموز دورکی بیزه قبول دور  . بو آندا آنلادیم کی ایش کیمین ایشی ایدی و نئجه بیر معلیم اؤزونه ایجازه وئریب کی شاگیردلرین معصوم دویغولارینان اویناسین و حتتا اونلارین گله جه یینی شیطانلیق لا خطره آتسین . چوخ چکمه دی منیم ایستیخدام ایشیم جورلن دی آما او معلیم کی، گؤردوک ده اَییلیب احترام ائده ردیم گؤزوم ده ائله کیچیلدی کی او دوستوما حق وئردیم کی دئییردی زامان اؤتمه یینجه اینسانلار حاققیندا قضاوت ائتمه . هئچ کس دن بیر بّت دوزه لتمه . آدام لار واردیلار کی دونن لری بو گون له فرقلی دی لرو حتتا اونلارلا اولان اورتاق  خاطیره لر ده سونرا لار آدامی اذیت ائدیرلر .

ارسال دیدگاه