حاجي مراد / صا دق هدايت / ترجومه : علیرضا ذیحق

      حاجي مراد چوخ قيوراق حالدا، توكانين سكي‌سيندن يئره يئندي. توزونو آلماق ايچون عبا- قباسيني سيلكه‌له ييب گوموش قئيينجيني بئلينده بركيتدي. أليني خينالي ساققالينا چكدي و حسن آدلي توكان شاگرديني چاغيردي. بيرليكده توكاني باغلاديلار. سونرا گئن- بول جيبيندن بير دؤرد قيرانليق چيخاريب حسنه وئردي. اودا ممنونيت‌له آليب فيشقا چالا- چالا گئت‌-گل ده‌ اولان جماعتين ايچينده ايتدي. حاجي‌مراددا ساري عباسيني‌كي قولتوغونا ويرميشدي چين‌نينه سالدي و دؤرد بيريانا باخاراق ساللانا- ساللانا يولا دوشدو. هر آدديم آتديقدا اونون تازا آياق قابي‌لاري قيژها قيژ سس وئريرديلر. يول اوستونده كي توكانچي لاردان چوخودا اونو سلاملاييب كئف- احوال ائديرديلر:

–           «حاجي‌ سلام، حاجي‌كئفين نئجه‌دير، يوخسان هئچ. تاپماق اولمور… »

      حاجي‌نين قولاغي بوسؤزلردن دولوايدي. آمما اونلارين «حاجي – حاجي» دئمك لري اونا مخصوص بير كئف وئريردي. بونا گؤره‌ده اؤزونه شيشيردي و بؤيوك لوك ساتا- ساتا معنالي بير گولوشله سلام‌لا را جواب وئريردي. حاجي ليق اونا بير لقب كيمي ايدي نييه‌كي مكه‌يه گئتمه مه گيني اؤزو ياخشي بيليردي. تكجه اوشاقليق دا، آتاسي اؤلندن سونرا، آناسي دده‌سي نين ائتديگي وصيته گؤره، اونلارين بوتون وار- يوخلاريني ساتيب سووور و هامي پول‌لاري قيزيلا تبديل ائده‌ركن يئرلي- كؤكلي كربلايا كؤچورلر. بير- ايكي ايل دن سونرا پوللاردا قورتولور و أللري بوشا چيخاركن دوشورلر يولچولوقا. بو آرادا ايسه تكجه حاجي ائله‌يه بيليركي بير تهر جان قورتارا و اؤزونو همداندا عمي سينه يئتيره. اونون شانسين دان دا عمي‌ سي اؤلور و چون آيري واريثي يوخ ايدي  بوتون مال – دؤولتي اونا يئيترير. عمي سي نين بازار دا حاجي آديله مشهور اولدوغو ايچون، حاجي لقبي ده توكان لا بير ليكده بيله سينه ميراث قالير. اونون بوشهر ده كيمسه سي‌ يوخ‌ايدي. نئچه يول ‌دا آنا باجيسيني آختارماق ايسته ‌ميشدي كي اونلاردان هئچ بير خبر توتانماميشدي. ايكي ايل اولاردي كي حاجي ائولن‌ميشدي. آمما آرواددان ساري اؤزونو خوشبخت حس ائتميردي. نئچه واخت‌ايدي كي أر- آرواد آراسيندا، هميشه دعوا ايدي. حاجي هرزادا دؤزه بيليردي آمما اونون آجي- آجي دانيشيقلارينا و ووردوغو ديل يارالارينا دؤزه‌‌نميردي. آنجاق آروايندان آجيق آچماق ايچون، عادت اوزره اونو هي دؤيوردي. گاهدان‌دا بو ايشيندن پشمان اولوردي. آمما هرحالدا چوخ چكميردي كي بير- بيرلري‌نين اوزونو أوپوپ باريشيرديلار. بيرزادكي حاجيني چوخ اينجيديردي، او ايدي كه هله اوشاقي اولماميشدي. نئچه يولدا دوست- تانيشلار اونو باشقابير آرواد آلماق ايچون نصيحت ائتميشديلر. آمما حاجي او بونون سؤزونه آلدانان ديئيل‌دي. بيليردي كي آيري‌بير آرواد آلماقلا اونون بدبخت چي‌ليگي‌نين داها چوخ آرتماسي بيرگه‌دير. بونا گؤره ايسه، بئله‌نكي سؤزلري بوقولاقدان آليب او قولاقدان وئره‌ردي. بونلار هله بير طرفده، آروادي هله گنج و گؤزه‌ل ايدي. نئچه ايل ايدي بير تهر بير- بيرلرينه عادت ائتميشديلر و پيس- ياخشي بير يئرده كئچينيرديلر. حاجي اؤزوده هله جوان ايدي و آللاهين ايسته‌يي اولسايدي سونرالار اوشاقي اولايدي. بوناگؤره ده حاجي، آرواديني بوشاماق ايسته‌ميردي. آمما بو عادتده اونون باشيندان  چيخميردي. آرواديني دؤيوردي و آرواد دا شيطان آتيندان يئنميردي. آغزينا گلني دئييردي. مخصوصاً كي دونن گئجه‌دن آرالاري برك ديميشيدي. حاجي قووورلي قارپيز توخوملاريني آغزينا آتا- آتا و اونلاري چيرتلاياركن قابيق لاريني يئره تؤكه- تؤكه، بازار آغزيندان ائشيگه چيخدي. او يازين ئيني هاواسيني‌ كؤكسونه آلاراق‌يادنيا دوشدو ائوه يئتيرمك همين، يئنه دئيشمه‌ك باشلاناجاق. بيرين بو دئيه‌جك ايكيسيني او و آخيري دا ديلخور لوغا چكه‌جك. سونرا دا كوسولو حالدا شامي يئييب بير- بيرلرينه آغيز بوزه- بوزه ياتاجاق‌لار. جمعه‌ آخشامي‌ايدي. بوفيكيرلر خاطيريندن كئچيردي و گئده- گئده او أل بو أله باخاركن آروادي‌نين سؤزلري يادينا دوشوردي:

–           «گئت ايتيل يالانچي نين بيري يالانچي! سن ياني‌ حاجي‌سان! سن نئجه حاجي‌سان كي آنا- باجين ديله‌نه- ديله‌نه رسوا اولوبلار؟! گناه منده ايدي‌كي مشهدي حسين صراف كيمي ائلچي‌ني اؤتوروب گلديم سنه.»

       نئچه يول ديل- دوداغيني ديشله‌دي و خاطيريندن كئچدي كي اگر آرواديني ايندي گؤرسه‌ ايدي يقين‌كي اونون قارنين سؤكه‌ردي.

      بو آنلاردا يئتيرميشدي «بين‌النهرين» خيابانينا و ندنسه چاي قيراغيندا بوي آتميش سؤيودآغاجلارينا باخاركن فكرينه گلدي ياخشي دي كه ائله ساز- ياراقي جورله‌ييب يار- يولداشلار لابيرليكده صاباح جمعه‌ني «مراد بي» دره‌سينه چالديرماغا گئده‌لر. بو ايشين ياخشي‌ليقي اوردا ايدي كي ائوده قالما قلاهم اؤزونه و هم آروادينا بدكئچمزدي. ائولري‌نين ياخين ليقيندا اولان كوچه‌يه- يئتيريب يئتيرمه‌ميش، بيردن بيره اونا ائله‌گلدي كي ائله بيل آروادي اونون يانيندان كئچيب گئتدي و اونو سايمادي. هم يئريشيندن و هم چاديراسي‌نين آغ اته‌ييندن اونو تانيماغا شبهه‌سي قالمادي. اونون اؤز آروادي اولدوغونا ايناندي. آمما حاجي‌دان اجازه‌سيز گونون بو واختي نه ايچون ائشيگه چيخماسي‌ بللي دئييل دي. توكاناساري‌دا گلمه ميشدي كي  دئيه‌ك ايشي وارايدي. پس هارا گئتميشيدي؟

حاجي آدديلماريني يئيين لتدي. گؤردوكي سهو ائتمير اؤز آروادي دير. آمما اونون ائوه‌ساري گئتمه‌مگي حاجي‌ني لاپ تعجب‌لن ديردي. حيرص‌لندي. قاباغيني آلانمادي و اختيارسيز سس‌لندي: – «شهربانو»

او آرواد دالي‌يا دؤنوب باخاركن سانكي قورخودان ديكسه‌نيب يئيين‌لشدي. حاجي داها اؤزونو ايتيردي. حيرصي- حيرصين كسيردي. پيچاق وورسايدين قاني چيخمازدي. آروادي اجازه‌سيز ائشيگه چيخيب هئچ، اونو آدام يئرينه قويماييب هئچ، بيرده سايماز- اوتانماز يولونا دوام ائديردي! غيرت داماري توتدو و قاني جوشاركن يئني دن سسله‌ندي:

–           «آهان سن نه‌نم: بوواختاجان هاردايدين؟ دايان گؤر نه‌دئييره‌م! سن نه نم.»

–           آرواد داياندي و چارشاب آرديندا گيزلن‌ميش اوزونو اونا توتاراق اوجادان ديلله ندي:

–           – «بيه‌ دللك سن؟ سنه نه؟ ميتيلين بيري ميتيل! تولودونون بيري آغزي‌نين سؤزون بيلمير. جماعتين ناموسونا نييه توخونوسان؟ ايندي سنه قانديررام نه وار نه يوخ! آهاي جماعت گلين گؤرون بو كئفلي گئده منيم جانيمدان نه ايستير …  خيال ائله مه شَهُر قانونسوز دور؟! ايندي سني وئره‌رم «آژان» ين ألينه تا …  آهاي آژان …»

       ائولرين قاپيسي بير- بير آچيلاركن جماعت اونلاري دؤوره‌ ليرديلر و گئتديكجه ده چوخاليرديلار. حاجي‌نين اوز- گؤزو قيزارميشيدي و آلين له بونيونون دامارلاري حيرص‌دن شيشميشدي. پيسي ده اوراسي ايدي ‌كي اونو تاني‌ييب- تانيمايان جماعتين بعضي‌سي ده : «آي آژان … آهاي آژان ….» سسله‌ييرديلر.

بونا گؤره ده حاجي نين حالي يامان توتولدي و دونيا گؤزونه قارالاركن اوأل بو أل ائتدي و وار گوجو ايله چاديرا اوزه‌ريندن بير سيلله آروادا ووردي و حيرص‌ايله دئدي:

– «هئچ هئچينه … موفته‌ يئرينه سسيني  ده‌ييشمه. من سني ائله لاپ گؤره‌ن كيمي تانيديم! صاباح … ائله صاباح سني بوشوياجاغام. آياغين كوچه‌يه آچيليب هن؟! اوتانمازين بيري اوتانماز … قويما آچام صانديقي تؤكه‌‌م پامبيقي؟!‌ جماعت شاهيد اولون…  شاهيد اولون كي من بونو بوشوياجاغام. نئچه واخت ايدي كه ائله بيله سينه شبهه‌لي ايديم. ديليمي قارنيما قويوب دينميرديم. آمما بوقره او قره‌له‌ره بنزه مز، سيز شاهيد اولون جماعت، منيم آرواديم نانجيب اولوب. صاباح … ائله بو صاباح …»

آرواد دا سؤزدن قالماييب جماعته خطاب غضبله‌ باشلادي كي:

–           «غيرتيز هارا گئديب….  سيز نييه به بير سوز دئميرسيز؟ قويمايين بو آبيرسيز گئده جماعتين آروادينا آغزينا گلني دئيه! اگر مشهدي حسين صراف بوردا اولسايدي سيزه‌لره بيلديره‌ردي نه وار نه يوخ! بيري يوخدور بو آلچاقدان سوروشاكي اصلاً سن كيم سن! نه دئييرسن.  گئت … گئت آداميني تاني! ايندي سنه ائله بير دده يانديريم كي عؤمور بويو ياددان چيخارتمي ياسان! آهاي آژان …. »

ايكي- اوچ نفر اونلاري آرالاماق ايسته ييب حاجي‌ ني كنارا چكديلر. آمما قال- ماقال هله ياتماميشدي كي بير آژان يئتيردي و حاجي آقانان بيرليكده چارشابلي آروادي و ايكي – اوچ نفر باشقا آدامي شاهيد كئچمك ايچون نظميه يه ساري آپاردي. يولدا يئنه همان سؤزلرايدي كي حاجي‌نان آرواد بير – بير لرينه دئييرديلر و جماعت‌ده اونلارين دالينا دوشه ركن، ايشين هارا چاتماسيني دايانمادان گؤزله‌ييرديلر.

       حاجي يامان ترله‌ميشدي و نظميه مأمورونون يانيجا گئده‌ركن، جماعت آراسيندان اوتانا- اوتانا كئچيردي و چتيني‌ده  اوراسي ايدي كي بالا- بالا اؤز ائتديگي ظنه‌ده شبهه‌لن ميشيدي. نييه كي بو آروادين چارپازلي باشماق‌لاري و گئيديگي جوراب‌لاري، باشقا جوره ايديلر. آروادين مشهدي حسين صراف‌دان وئرديگي نشانلاردا هاميسي دوز‌ايدي و تازا آنلاميشدي كي ائله بيل سهو  ائديب كير يخيب دير. آمما چوخ گئژ آنلاميشدي. سويون شيريلتي سيندان نگران ايدي و ايشين هارا چاتديغينا قالميشدي.

نظميه‌يه يئيترجك جماعت ديشاري داقالاركن  اونلاري ايچري آپارديلار. حاجي نان آرواد بير اتاقاكي ايكي يوكسك منصب‌لي ‌آژان ميز داليندا اوتورموشدولار كئچديلر. اونلاري گتيره‌ن مأموردا ايشين نه اولدوسونو سؤيله‌ييب سونرا گئتدي قيراقدا دوردي.

رئيس حاجي‌يا باخيب دئدي:

–           آديز ندير؟

–           نؤكريز آقا، سيزين كيچي‌ييزه‌م. من حاجي مرادام. بوتون بازار مني تاني‌يير!

–           نه ايش گؤره‌سيز؟

–           بو ياقچي‌يام، بازاردا توكانيم وار. امريز اولسون!

–           بودوز دوركي سيز بو خانيما دولاشيب و وروب سوز؟

–           نه دئييم واللاه! من ائله بيلديم كي اؤز آرواديم دير.

–           نه ايچون بئله فيكر ائله ‌ديز؟

–           چاديراسي‌نين اتگي آغ‌ايدي.

–           چوغ غريبه سؤزدور. مگر آرواديزين سسيني تانيميرسيز؟

حاجي اوره‌كدن بير آه چكيب دئدي:

–           آخي سيز بيلمير سيز كي منيم آرواديم نه اودپارچاسي‌ دي؟  او بوتون قوردقوشون سسيني چيخاردا بيلر. حامامدان چيخاندا بوتون آروادلارين سسي‌نن دانيشيب اونلاري يانسيلار. من ائله بيلديم كي ايستير مني آلداتسين و اونا گؤره سسيني عوض‌لير.

آرواد، حاجي‌نين سؤزونو آغزيندا قويوب دئدي:

–           نه ده‌ديل تؤكور. دئيه‌سن باياقكي آدام دئييل … ياخچي دي بو آژان قارداش اؤزو گؤردو كي جماعت ايچينده نئجه منه أل آچدي. نه يازيق ليقا ووروب اؤزون!  دئيه سن همانكي آدام دئييل فيكر ائليركي شَهُر باشينادي. مشدي حسين بيلسه دده‌ن يانديراجاق …

رئيس : –  خانيم داها سيزليگ‌ايش يوخدور. سيز بويورون گئدين!  بيز ايندي حاجي‌نين حسابينا يئتيرريك» دئيير. حاجي‌دا : « واللاه آنلاماميشام. من بيلمه‌ديم. ده ييشيك توتدوم. آخي منيم جماعت ايچينده آبيريم وار…. » سؤيله‌يير.

      رئيس بير زاد يازير وئرير مأمورون ألينه و مأمور حاجي‌ني باشقابير ميزين قاباغينا آپارير. حاجي‌نين أللري أسه- أسه پوللاري ساييب جريمه ايچون ميزين اوستونه قويور. سونرا آژان‌لا بير ليكده گئديرلر نظيمه اداره‌سي‌ نين  حيه‌طينه.

       جماعت أت‌دن دووار چكميشيدلر و اهمال- اهمال پيچيلدا شيرديلار. آژن‌لاردان بيريسي ألده قامچي يئتيردي. حاجي نين ساري عباسيني چين‌نيندن گؤتوروب اونون يانيندا دوردو. حاجي حرص و غضبدن بيلميردي نئيله سين. أللي شاللاق دال با دال اونا گوپسه‌‌ن سه‌ده  هئچ اؤزونه آلمادي. قا‌مچي‌لار وورولوب قورتولاندان سونرا أل آتدي جيبينه و بؤيوك ايپك سيله‌جه‌گيني چيخاراركن، باش- گؤزوندن سوزه‌ن تري سيلدي. سونرا عباسيني چييني اوسته آتاراق، پوزقون حالدا ائوه ساري يوللاندي.

عباسي‌نين اتگي ائوه يئتيره‌نه جك ، يئر ايله سورونوردي و ندنسه چاليشيردي كي آياقلاريني ائله اهمالجا يئره قويسون كي يئني جه آلديقي آياق قابلي‌لار‌ي‌نين قيژ‌يلتيسي بير يوللوق كسيليب خفه‌لن سين.

ايكي گون سونرا حاجي آرواديني بوشادي.

ارسال دیدگاه