بایاتی لار / حمید آرش آزاد

دوْستوم ائشيتجه‌ك: كتاب

احوالي اوْلور خراب

چون‌كي بو بئچارانين

يادينا دوشور كباب!

***

دوْستوم، ماشينا ميندي

كتاب ائوينده يئندي

يئددي ساعت آختاريب

تاپدي بير «فالِ هندي»!

***

دوْستوم‌دا وار چوْخ هُنر

ياخشي كتاب بگه‌نر

دئيه‌ر: «كاش موْبول كيمي

بوندادا اوْلا فنر»!

***

دوْستوم عالّمه بنزه‌ر

گئديب، بازاري گزه‌ر

جيلدي گؤيچه‌ك كتاب‌لار

آليب، دئكورا دوزه‌ر!

***

دوْستوم باش اگمه‌ز پولا

دئيه‌ر «كتاب چوْخ اوْلا»

آنجاق صفحه‌سين آچماز

قوْرخار رنگي پوْزولا!

***

دوْستومون وار اوْيونو

سئوه‌رم حال- خويونو

ايسته‌سه كتاب آلسين

اؤلچه‌جك ان- بوْيونو!

***

دوْستوم، قهرمان دوْستوم!

سؤزومو اينان، دوستوم!

بو كتاب‌لار اوْلانماز

فاطي يا تومان، دوْستوم!

 

 

ارسال دیدگاه