وای بیزه / صمد روزبه (نیر اوغلو)

یئتمیشه هفتاد دئیروک وای بیزه
«سکسنه» هشتاد دئیروک وای بیزه

تورک اوشاغی تورکو دیلین آنلامیر
«یاردیما» ایمداد دئیروک وای بیزه

دووشانیمیز خرگوش اولوب، ایتده سگ
«آوچویا» صیاد دئیروک وای بیزه

اؤزگه کؤکون اؤز کؤکوموز بیلمیشوک
ریشه میزه یاد دئیروک وای بیزه

قیز کیمی دایم بزه نن عاشیقه
تیشه لی فرهاد دئیروک وای بیزه

اؤلدو «سلیم» چولقادی کیم منبرین؟
هر کسه اوستاد دئیروک وای بیزه

آخشاماجاق تئلگرامی سئیر ائدن
«آزقینا» آرواد دئیروک وای بیزه

آنلامادیم قوربان اولوم آروادا
دیلبره هر زاد دئیروک وای بیزه

بیزلری ده معتاد ائدیب تئلگرام
اؤزگیه معتاد دئیروک وای بیزه

اؤز ائویمیز زیندان اولوبدور بیزه
«دوستاغا» آزاد دئیروک وای بیزه

هر کس اؤلور وار یوخو تاراج اولور
بدعته ارشاد دئیروک وای بیزه

اؤلکه نی ویرانه قویوب اوغرولار
ویرانا آباد دئیروک وای بیزه

زیرناچی نین زیرناسی اولسون گرک
دایمی پرباد دئیروک وای بیزه

اورتادا یوخدور آدی هئچ تولکونون
آسلانا شیاد دئیروک وای بیزه

تولکویه کی شیر دئیروک خرلنیر
میلچگه پهباد دئیروک وای بیزه

هر ناشی نقاشدا بیزی رنگ ائدیر
«بایتالا» بهزاد دئیروک وای بیزه

ایندی «نیراوغلو» یاتاغان شاعیرین
شعرینه فریاد دئیروک وای بیزه

ر.ص.نیراغلو
۱۶/آبان/۹۷

ارسال دیدگاه