آذربایجان باشین ساغ اولسون – آشیق غافار ابراهیمی حیاتا گؤز یومدو

عؤمورلوک سئودا نمونه‌سی عاشیق قافار

ادبی خبر

اینسانلارین کیم اولدوغون و نه اولدوغون، اونون یاشامی و حیاتدا گؤردوگو ایشلر ایله قضاوت ائتمک ان دوغرو تثبیت اولار دئسک یانیلمامیشیق. آذربایجان مدنیتی تاریخی و آذربایجان عاشیق صنعتی تاریخی صفحه‌لرینده بیرچوخ عالی درجه‌ده صنعت اوستادلاری واردیر، آدلاری صنعت صفحه‌لریمیزین بزه‌گی اولان اوستادلار ایچره بلکه بارماق ساییسی قدر اوستاد واردیر کی سؤزون تام آنلامیندا متعهد اینسانلار اولموشلار، اوستاد «عاشیق قافار ابراهیمی» او دئدیگیمیز متعهد اینسانلاردان بیری‌دیر و عاشیق موسیقی‌سی و آذربایجان مدنیتی اوغروندا بیر عومور جانلا باشلا چالیشمیش و داها دوغروسو بو یولدا عومرونو قویموشدور. آذربایجان عاشیق موسیقی‌سی اونونچون اویانیش فلسفه سیدیر، اوستاد مدنیتیمیزن دیرچه‌لیشی و جانلانماسی اوچون عاشیق موسیقی‌سی امکانلاریندان یارارلاناراق خلقی آیدینلاتماغا و اینسانی دیرلری یایماغا چالیشمیدیر. اوستاد هر زامان وطنه و آذربایجانا اورکدن باغلی اولموشدور. اصلینده او آذربایجانا قلبینی وئردی و بلکه ده ان دوغروسو وطن اونون اوچون بویوک بیر عشق‌دیر، بو عشقی ایللر بویو قلبینده یاشاتدی و اینسانلارا وطن و اینسانلیغی اویرتمگه چالیشدی. ایللر بویو شخصی امکانلاری ایله فرد اولاراق بیر جمعیت و انجمنین ایشین گوردو، اونون یاندیردیغی اوجاغین ایستی‌سیندن و ایشیغیندان یوزلر نفر فایدالانیب بهره‌لندی…

اوستاد «عاشیق قافار ابراهیمی» گونش ایلی ۱۳۳۳-ده آذربایجانین گؤزل گوشه‌سی اولان قاراداغ بولگه‌سی‌نین مئشه پارا ماحالیندا دونیایا گؤز آچمیشدیر. چوخ گنج چاغلاریندان عاشیق صنعتی و موسیقی‌سی ایله ماراقلانیب بو صنعت ده فعالیته باشلامیشدیر. اوستادلاریندان «عاشیق رسول قربانی»، «عاشیق حسن غفاری» و «عاشیق علسگری» ساناماق اولار. حیاتی بویونجا بیر چوخ ادبی محفل‌لرده فعالیت گؤسترمیش و بعضی ادبی انجمن‌لرین ده موسس‌لریندن اولموشدور، اوستاد اوروپادا سوئد و سوئیس کیمی اولکه لرده عاشیق موسیقی‌میزی لاییقینجه تمثیل ائتمیشدیر، تورکیه ده و آذربایجان جمهوریتینده دفعه‌لرنن عاشیق سمپوزیوملاریندا اشتراک ائتمیشدیر. باکی‌دا عاشیقلار بیرلیگی‌نین عضوو و ایراندا عاشیقلار ائوی‌نین عضوو و آغساققالی اولاراق مختلف استانلاردا سمینار و کنگره‌لرین اشتراکچی‌سی اولموشدور.

اوستاد ۲۵ کیتابین یازاری‌دیر و اونلاردان ساده‌جه ۴ دنه‌سی چاپ اولونوب و ایشیق اوزو گؤرموشدور. «ائل قوشمالاری»، «سئوگی مقدس‌دیر» و «داغلار منیم اولدو من ده داغلارین» کیتابلارین ساناماق اولار. اوستادین ادبی ارثی‌نین قورونوب ساخلانیلملسی دا عایله عضولری‌نین و شاگیرلری‌نین بورجو کیمی دورور و اینانیریق کی بو ایشی لاییقینجه یئره یئتیره‌جک‌لر…

سؤز یوخدور کی آذربایجان میللی مدنیتی اوغروندا فداکارجا چالیشان اوستاد «عاشیق قافار ابراهیمی» چکدیگی زحمتلردن دولایی تقدیره لایقدیر، امید ائدیریک خالقیمیز اونون مراسیم لرین اونا لاییق کئچیره‌رک اونا اولان بورجوموزو اؤده‌مه‌یه چالیشسین.

«یازاردیم»

یارادان وئرسئیدی منه اختیار

دونیانی باش‌باشا الوان یازاردیم

قویمازدیم بیر گولون رنگی سارالسین

هرگوله بیر دنه باغبان یازاردیم

شیطانی توتاردیم قارنین سؤکردیم

اختلاف بوخجاسین بیر یول بوکردیم

تامام مسلک‌لره قلم چکردیم

بیر باشدان هامینی اینسان یازاردیم

گؤزل قسمت‌لری بوتون بشره

هئچده فرق ائتمزدی آغ ایله قره

اوزو آغ گلردی هامی محشره

عدالت قوراردیم میزان یازاردیم

خیانت ائتمزدی دوست دوستونا

بشر گئیینمزدی گونده یوز دونا

شادلیقلا عمرونو ووراردی سونا

بیر-بیره مهریبان مهمان یازاردیم

اینسانلار آتاردی فقرین داشینی

اوجالداردی ائللر ایچره باشینی

 آخیتمازدیم یئتیمین گؤز یاشینی

بوتون مشکول‌لری آسان یازاردیم

فیکیر یاراداردیم بئیین‌لر دولو

اینسان دوز سئچردی ساغ ایله سولو

معنالی سؤز شاعیرلرین محصولو

جانیمی قانانا قوربان یازاردیم

اینسانلار وارلیغی خلقتدن بری

شهرت تاپیب اولوب دیللر ازبری

قوینوندا بسله‌ین قوچ ایگیدلری

دونیا بیلیر آذربایجان یازاردیم.

🌺🌺🌺

روحو شاد، یولو داواملی اولسون

ارسال دیدگاه