کتاب تانیتیمی – اربابان بشریت

اربابان بشریت

بوکتاب لاپ یئنی و اوچ گون بوندان اؤنجه چاپخانادان چیخمیشدیر. اونون یازاری بؤیوک عالیم پروفسور نوام چامسکی دیر.کتاب یئددی مقاله و دانیشیقدان عبارت اولان بیر مجموعه دیر. کتابین ترجمه سینی گؤرکملی عالیمیمیز پروفسور محمد حریری اکبری جنابلاری انگلیسجه دن فارسیجایا چئویرمیشلر. اونون ناشری و یایماسینی تبریزده قالان یورد انتشاراتی بوینونا آلمیشدیر.

کتابی تانیمادان اوّل ایکی عالیمی – یازاری و دیلماجی تانیماق لازیمدیر. بیرینجی سی پروفسور نوام چامسکی و ایکینجی سی پروفسور حریری اکبری.

پروفسور چامسکی ۱۹۲۸ ایلینده آمریکادا دونیایا گلمیش و بوگون ۹۲ یاشیندا اولاراق هله چوخلو جوانلاردان فعال و یارادیجی دیر. چامسکی گونوموزون اجتماعی – سیاسی و علمی ایشلرینده فیکیرلر داشی ییب و ده یرلی سؤزلریله جامعه نین نخبه و روشنفکرلری نین دقتینی جلب ائدیر.او، ایللر بویو دانشگاهلاردا تدریس ائتمیش؛ چوخلو کونفرانسلار کئچیرمیش و بوگونوموزده ده مختلف سیاسی – اجتماعی اولایلارا نسبت موضع توتماقلا، دونیا عرصه سینده حرکت یارادیر. او بیر دیلچی دیر؛ حقیقت ده دیلچیلیک یئنی بیر علم دیر و عمرو هله ۱۰۰ ایله چاتمامیش؛ آما چامسکی اؤز نظریه لرینی اثبات ائده رک بو علمده بؤیوک ده ییشیک لیک و انقلاب یاراتدی. او بو نظریه لریله شوونیست لرین آغزینی باغلادی و انسانلارا حؤرمت قازاندیردی. اونون بو گؤزل باخیشی دونیامیزدا غرور یارادان، انسانیتدن حیمایه ائده ن بیر باخیش دیر.

عئینی حالدا چامسکی اجتماع و جامعه شناسی علمینده نظر صاحبی دیر و بیلگین لر آراسیندا باشدا دایانیر. آنجاق او اولایلاری علمی باخیشلار باخاراق فلسفه یه دایانیر و ایشلرینی علمی سویه ده ایره لی آپاریب و نظریه لر وئریر. بوگون دونیا بیلگین لری، دونیا عدالت خواهلاری و مظلوم ملت لر اونون بشری فیکیرلریندن یارارلانیرلار، چون چامسکی بیر عدالت پرور، ظولمه قارشی دایانان و انسان سئور بیر مبارزدیر و دوشونجه لری علم لره دایانیر و هر بیر رفتار – سیاست – اخلاقی دوزگون صورتده بیان ائدیر. چامسکی سیاست دونیاسیندا چوخ اؤنملی سؤزلر صاحبی دیر. اؤزو آمریکالی اولاراق آمریکانین بؤیوک تنقیدچیسی دیر. او بشریته خوش باخیشلا باخیرسا دا، آمریکا و اونون تای – توشلارینی دونیا و انسانلاری نابودلوغا ساری چکن ساییر. آمریکا سیاستچی لری نین هر حرکتینی ایزله ییب، یانلیش گئدیشلرینی تنقید ائدیر. چامسکی نظرینده اوچ صنف بوگون اولمالی دیر:

نخبه لر، سیاست اونلارین الینده دیر.

روشنفکرلر – نخبه لرین خدمتینده دیرلر

بیلگین لر – علمی ایره لی آپاریرلار و یئنی دونیایا یول تاپمادا چالیشیرلار.

چامسکی بیر اومانیست ، باریشچی، بشرز حقلری نین مودافیعه چیسی و هر جور ساواش، خشونت و جنگ ایله قارشی دیر. او دونیایا خوش باخیرسا دا اینانیر کی انسانی کمالا و جامعه نی ایره آلا چاتدیرماق اوچون انسانلارین فطری ایستک لرینه دقت یئتیرمک و اونلارین خدمتینده اولماقلا مومکوندور.

ایندی مترجم – دیلماج پروفسور دو.کتور محمد حریری اکبری جنابلارینا گله لیم. حریری جنابلاری بؤیوک بیلگین و عالیم لریمیزدن دیر. بو عالیم وطنیمیز ایران و آذربایجانی اؤز علمی ایله دونیایا تانیتدیرمیش. ایللر بویو آمریکا و اوروپا اؤلکه لرینده تدریس ائتمیش، چوخلو علمی کونفرانسلار کئچیرمیش و علمی ییغینجاقلاردا فعالجاسینا اشتراک ائتمیش و وطنیمیزین آدینی یوکسلتمیشدیر.

پروفسور حریری آذربایجان ادبیاتینا بؤیوک خدمتلر ائتمیش، اونقلابدان اؤنجه دده قورقود کتابینی انگلیسجه دن فارسیجایا ترجمه ائده رک ایلک دفعه کئچمیش فرهنگیمیز له بیزی باریشدیرمیشدیر. حریری جنابلاری فعال صورتده یازیر – یارادیر. همین بو ایل – ۱۳۹۹ – نئچه کتابی چاپدان چیخمیش او جومله دن هفت مقاله سی آذربایجان ادبیاتی نین گؤزه للیک لرینی علمی باخیشلا آراشدیرمیش و تانیتدیرمیشدیر. حریری انگلیسجه، تورکجه و فارسیجا اثرلر یارادیب و سون گونلرده بو گؤزل کتابی – اربابان بشریت – اثرینی ترجمه ائتمیشدیر. مقاله لرین سئچمه سی جامعه میزین نیازلارینی نظرده توتاراق بو عالیمین الیندن گلن ایشدیر.

اونون آخیجی قلمی، علمی باخیشی و وطنیمیزین – خالقیمیزین لازیمی اولان سؤزلری بو کتابین یارانماسیندا گؤرونور.

کتاب تبریزده قالان یورد انتشاراتی طرفیندن بوراخیلمیش و امینم کی اونون اوخوماسیلا حقیقتده عالیمیمیزین قدرینی بیلمک معناسیندادیر. چون اونون ایسته یی خالقیمیزین سعادتی دیر. سیزه سعادت دیله ییرم.

***

ارسال دیدگاه