سایؽلارؽن ماسالؽ

آیپارا دؤرد یاشؽندا ،سارؽ‌شؽن، شیرین‌دیللی قؽز‌ایدی. او چوخ محبت‌لی و اوسلو‌ایدو. آتا و آناسؽ  بو اوْزدن اونو چوخ سئوردیلر. او اوشاق‌باغچاسؽنا گئدیردی، اوردا چوخلو دوستلارؽ وار‌ایدی و هامؽسؽن ‌دا سئویردی.

بیر گئجه آیپارا آخشام‌یئمه‌یین یئدیک‌دن سونرا یاتماق اۆچۆن اوتاغؽنا گئتدی. او گۆلۆ رنگ‌ده چانتاسؽن گؤتۆردۆ ، دفتر- بیتیکلرین سلقه‌له‌ییب و آتاسؽ ناهار چاغؽ اونا گتیردییی بیتییی ده  چانتانؽن ایچینه قویدو، چانتانؽن سی‌ییرمه‌سین چکدی و یاتاغا دوغرو گئتمک ایسته‌دییین‌ده آناسؽن گؤردۆ

– منیم آیپارام، گؤزل قؽزؽم، نه‌دن یاتمایؽبسان؟

– اوخول‌چانتامؽ گلن‌گۆنه آنؽقلایؽردؽم آنام.

– یاشا قؽزؽم، سن یئرین‌ده اوزان من اؽشؽقلارؽ سؤندۆره‌رم.

– باش اۆستۆنه آنام، اللرین آغرؽماسؽن.

آیپارا بئله سؤیله‌یه‌رک یاتاغؽنا گیردی، آناسؽ اؽشؽقلارؽ سؤندۆرۆب ، آیپارانؽن اۆزۆن‌دن اؤپۆب، اوتاق‌دان چؽخدؽ.

آیپارا همن یوخولادؽ. اونون یاتماغؽن‌دان آز زامان کئچمیشدی کی چانتادان غریب سسلر قوْوزاندؽ.

سانکی نئچه نفر اوجا سس ایله بیر-بیرلری ایله دانؽشؽردؽلار و آرادا آنلاشمامازلؽق‌لار اۆزۆن‌دن سؤز-سؤزه گلیردیلر.بو سسلر آیپارانؽ یوخودان اویاتدؽ. آیپارا گؤزلرین آچدؽ؛ بیر آز سسلری دینله‌دی.

 – گؤره‌سن بو سسلر هاردان گلیر؟

اؤزۆنه سوال وئردی. او چوخ ماراقلانمؽشدؽ،کؤنلۆ ایسته‌ییردی کی بیله بو سسلر کیمین‌دی و هاردان گلیر ،پس یئرین‌دن دوردو دقتین توپلادؽ تا بیله سس هانسؽ یان‌دان گلیر. دوغروایدو سسلر چانتا اولان یان‌دان گلیردی. آیپارا چانتایا سارؽ گئتدی، گئتدیکجه سسلر آیدؽنلاشؽردؽ:

– سن ایندی باخدؽن، آیپارا یوخولامؽشدؽ.

– هه ،آرخایؽن اولون.

هیس، سس‌سیز اولون، ایندی اونو اویاداجاقسؽنؽز.

آیپارا اؤز آدؽن اؽشیتدی و آرتؽق دایانا بیلمه‌دی، یاواش-یاواش چانتانؽن سی‌ییرمه‌سین آچدؽ، دقت‌له باخدؽ، ساناق بیتییی ترپه‌نیردی، سانکی سسلر اونون ایچین‌دن گلیردی .آیپارا قولاق‌لارؽن آچدؽ تا سسی داها یاخشؽ ائشیده .

– بیر آز داها ایته‌له‌یین.

– ساغا طرف چکین.

آیپارا همن بیتیکلری جانتادان چؽخارتدؽ. گؤزلرینین گؤردۆیۆ شئیه اینانمایؽردؽ.

– آمان تانرؽم!

– بونلاردا کیم، نه‌قدر ده سایؽلارا بنزه‌ییرلر!

پس گلن سس اونلارؽن‌ایمیش؟

بو ایش نئجه اولا بیلر؟

آیپارا شاشقؽنلؽق‌لا بونلارؽ اؤزۆن‌دن خبر آلدؽ.

سیزجه سایؽلار نه حالدایدؽلار؟!

آیپارا بیتییی گؤتۆردۆیۆن‌ده ،بیر-ایکی و اۆچ بیتییی ایته‌له‌دیکلرینه گؤره ، بیتیک‌دن آسلانمؽشدؽلار، قالان سایؽلار دا چانتانؽن ایچین‌ده قالمؽشدؽلار. آیپارا سایؽلار دۆشمه‌سین دئیه بیتییی یئره قویدو. سایؽلار گیزلنمک ایسته‌ییردیلر ،اما آرتؽق گئج اولموشدو، اونلاردا آز-چوخ آیپارادان قورخموشدولار.

آیپارادا ،اونلاردا دونا قالمؽشدؽلار و بیر- بیرلرینه باخؽردؽلار. آیپارا چکینه‌رک سوروشدو:

– سیزده کیمسینیز؟ – نه ایش گؤرۆرسۆنۆز؟

سایؽلار ترتیب له بیر-بیرلرینین یانؽن‌دا دوردولار. اون نۆمره دئدی بیز ساناق بیتییین ده اولان سایؽلارؽق. و آردؽنجا سایؽلار باشلادؽلار اؤزلرین تانؽتدؽرماغا.

من سایؽلاردان بیر، من ایکی، من اۆچ ،… و ان سون سایؽلاردان اون اۆزۆن تانؽتدؽردؽ. آیپارا بو اولایی سئومیشدی، سایؽلارؽدا. آنلامادؽغؽ تک بیر شئی وار‌ایدی، اودا بو کی سایؽلار نئجه دانؽشا بیلرلر. اۆزۆن توتدو سایؽلارا و دئدی :

– من ده آیپارایام. فقط سیزدن بیر سورغوم وار سیز نه‌جۆر دانؽشا بیلیرسینیز ؟ آخؽ سایؽلار دانؽشمازلار.

اوْن سایؽ‌سؽ هامؽدان بؤیۆک اولدوغو اۆچۆن جوابلامایا کئچدی، او دئدی:

– چوخ قورخونج بیر اولای اولدو و بیز دانؽشا بیلدیک.

– نه اولایی؟

اون دئدی : – نئچه گۆن بوندان اؤنجه بو بیتیک کیچیک بیر قؽزؽن‌ایدی، آتاسؽ اونا یئنی آلمؽش‌دؽ تا او سایؽلارؽ اؤیره‌نه. آتا بیتییی آلان گۆن بیز چوخ سئوینمیشدیک، ائله سانؽردؽق کی اونون یانؽن‌دا دینج و موتلو بیر یاشامؽمؽز اولاجاق.

 سونرا اوْن  اۆزۆنتۆدن باشؽن آشاغا سالدؽ .و اۆزۆله‌رک سؤزۆنۆن دالؽن توتدو:

– بیز کیچیک قؽزؽ سئودیک و هر گۆن آرزؽ ائدیردیک کی بیزی اوخوسون و بیزیم ایله آرخاداش اولسون، اما او بیتییی الینه آلؽب و بیزه باخمایؽردی . نه‌دن‌سه بیزیم ایله تانؽشماق و بیزی اؤیرنمک ایسته‌مه‌دی اما بیز هئچ زامان اومودوموزو الدن وئرمه‌دیک، تا کی بیر گۆن او قؽز آتا سؽنا دئدی من بو بیتییی سئومه‌دیم ،اونو چؤپه آتماق ایسته‌ییرم، بیز چوخ اۆزۆلدۆک .

اوْن درین بیر آه چکدی و دئدی: اونو آتاسؽ بیزی بیر تلیسین ایچینه آتدؽ،بیز چوخ قورخدوق و او جۆر اولدو کی دانؽشماغا مجبور قالدؽق.

آیپارا اۆزۆله‌رک دئدی:

– سیزین آدؽنؽزا چوخ اوْزۆلدۆم.

اوْن سؤزۆنۆن آردؽن توتدو : – اوردا چوخلو بیتیکلر وارایدی، بیز نئچه گۆن اوردا قالدؽق، سویوق و قارانلؽق‌ایدی، اوردا قاچماق ایسته‌دیک اما قاچا بیلمه‌دیک، گۆنلردن بیر گۆن بیز یوخودای‌کن قؽزؽن آتاسؽ بیتیک تلیسین بیر آداما ساتمؽشدؽ، بیز او بیری بیتیکلرین سسینه یوخودان دوردوق، اونلار بیزه دئدیلر کی سسی دینله بو کیشی بیزه باشقا بیر آداما ساتؽب ،بیز سئویندیک ،دئدیک بلکه آلان بیزی اوخویا ،آنجاق بیتیکلر بیزه دئدیلر سیز سهو ائدیرسینیز، بو آدام بیزی قایتارما زاوودونا آپاراجاق،اوردا بیتیکلری پوزاجاقلار و بیزدن باشقا شئیلر دۆزه‌لده‌جکلر. بیز چوخ قورخدوق ، نه ائده‌جه‌یینیزی شاشؽردؽق. آتا و آدامؽن آلؽش- وئریشی بیتدی. آدام تلیسی گؤتۆردۆ و بیر آرابانؽن ایچینه قویدو، تلیس بیر آز ایریلدی و ساناق بیتییی آرابانؽن آیاق‌آلتؽسؽنؽن اۆستۆنه دۆشدۆ، او آن‌دا من دئدیم بو بیزیم قورتولوش یولوموزدور، یاواشجاسؽنا بیتیک‌دن چؽخاجایؽق و بیتییی آرابانؽن گؤرسنمه‌ین یئرینه ایته‌جه‌ییک، لیز بیتیک‌دن چؽخدؽق و بۆتۆن گۆجۆمۆزۆ توپلادؽق و او ایشی گؤردۆک. آرابا دوردو ، دئمه‌لی زاوودا یئتیشمیشدی، آدام گلدی تلیسی آرابادان گؤتۆردۆ و زاوودون یییه‌سینه وئردی، سونرا آرابایا میندی و یولا دۆشدۆ . یولدا سنین آتانؽ گؤردۆ ، اونو میندیردی تا گئتدییی یئره یئتیرسین، اما یولدا آز قالؽردؽ باشقا بیر آرابایا توققوشسون کی برک‌دن ایله‌جی( ترمز) چکدی. بیتیک گیزلی یئرین دن زوودو و گؤز اؤنۆنه گلدی، آتان بیتییی گؤردۆ، گؤتوْردۆ و آداما وئردی، آدام بیتییی آلدؽ هر طرفینه باخدؽ و بو بیتییین نه‌دن اوردا اولدوغون آتانا تعریف‌له‌دی، سونرا دا دئدی اگر سنین کیجیک اوشاغؽن وارسا آل بونو اونا آپار، آتان سئوینه‌رک بیتییی آلدؽ و دئدی:

 – هه، منیم کیچیک بیر قؽزؽم وار کی بیتیکلری چوخ سئور.

سونرا میننت‌دارلؽغؽن بیلدیردی و بیتییی چانتاسؽنا قویدو. بیز سنین بیتیکلری سئومه‌نه چوخ سئویندیک و دئدیک بو قؽز بیزی چؤپه آتؽب یا دا ساتماز، بیز اونونلا دوستلوق ائده بیله‌جه‌ییک و ناهاردان بویانا دا سنین ائوینده قوناغؽق.

آیپارا گۆلدۆ و دئدی : من ده بیتییی گؤردۆم چوخ سئویندیم، هله ایندی سیزی گؤردۆم و سیزین له تانؽش اولدوم داها دا چوخ سئویندیم. من سیزه سؤز وئریرم بیتییی اوخویاجاغام و سایؽلارؽ، توپلامایؽ، آزالتمایؽ، هندسی شکیللری اؤیره‌نه‌جه‌یم . صاباح سیزی اوشاق‌باغچاسؽندا دوستلارؽما دا گؤرسه‌ده‌جه‌یم تا اونلاردا سیزی اؤیرنسینلر.  فقط من بیلمه‌دیم نییه چانتادا سس سالمؽشدؽنؽز؟

اون دئدی: ایسته‌ییردیک ساناق بیتییین اؤنه طرف چکک تا سن ایاک اون گؤرۆب و اونو اوخویاسان.

آیپارا بو سۆزۆ ائشیتدییین ده گۆلدۆ،  سایؽلار دا سئوینج‌دن گۆلدۆلر.

 آیپارا دئدی: – دوستلار منجه ایندی یاتماق زمانؽ‌دؽ ، ایندی یاتاق، صاباح دوروب بیرلیک‌ده اوخولا گئده‌ریک. سایؽلار قبول ائتدیلر.

آیپارا اونلارا دئدی بیتییین ایچینه گئتسینلر و سونرا بیتییی یئردن آلدؽ و چانتانؽن ایجینه قویدو ، یاتاغا گئری دۆندۆ و هامؽسؽ یاتدؽلار

بئله‌لیک له بیزیم ده ناغؽل سونا جاتدؽ

ائلمیرا رضازاده هیر

ارسال دیدگاه