بنؤوشه‌لر چاغیریر‌…!

 

کوچه‌ندن آختاریرام‌، شن اؤتن اوشاقلیغیمی
باهارلا أل-أله‌، گولدن بیتن اوشاقلیغیمی!
اوره‌ک گزیر گینه سوچسوزلوغو‌، بیر اوزلویومو
جیجیک باشارماز‌، آداشلیق سئون اوشاغلیغیمی
یالانچی دان آجییاندا‌، اوره‌ک دولان گونوموز!
کوسنده دوست‌، گؤزو چن‌لن‌نن اوشاقلیغیمی!
سئورلیک آختاریرام‌، های-هارایلی شیلتاغلیق
و ناظیم أللرینه‌، شوو دؤون اوشاقلیغیمی
کیتاب واراقلاریمین عطرینی اومووبدو باهار
بنؤوشه‌لر چاغیریر گول دَرَن اوشاقلیغیمی!
قیزیل‌گول آختاریرام‌، خان‌ننه‌م خاطیرلانیب آه‌…!
بوداق-بوداق آرادیم‌، گول سئچن اوشاقلیغیمی!
قیزیل‌گولون سبدین آل‌، داغیت گونئی‌لریمه
کی آرتیق اینجیمه‌سین‌، گول سَرَن اوشاقلیغیمی!
یازانمیرام آنامی گؤونه‌دیم سطیر-سطیر اووف‌…!
سئل آتدی قایغی‌سینا‌، لاپ دونن اوشاقلیغیمی
اوخول یولوندا‌، گؤز‌ومدن آخان بو سئل آپاریب
گئچنده چکمه‌سی چایدا ایتن اوشاقلیغیمی!

احتراملار‌و تشککورلر
قاسم‌نوربخش( غزللی)

ارسال دیدگاه