منه دئمه وطن سئومه…! / قاسم نوربخش (غزللی)

منه دئمه وطن سئومه…!

اونوت منی- آت منی
داش دیرماندا‌، دامار- دامار دارت منی!
قول ایله‌ییب:
شه‌هر- شه‌هر‌، بازار- بازار
– دولاندیریب سات منی‌،
آمما دئمه: ایش اوشاغین‌، وطن دردین
– اؤتور سئوگیمه گؤره!
آمما دئمه: ائلین – دیلین
درد‌دن بزه‌دیلمیش تاجین
باشدان آتیب
– گؤتور سئوگیمه گؤره

سیندیر اوره‌ییمده‌، سئو مئیخاناسین!
داش‌قالاق ایله روحی‌می قاناسین!
آت جانیمی دمیر یولدا دیدیلسین!
سورگون گؤندر وارلیغیمی‌،
بوز سیبرینین اوراقیلا بیچیلسین!
آمما دئمه: ایش اوشاغین‌، وطن دردین
– اؤتور سئوگیمه گؤره!
آمما دئمه: ائلین- دیلین
درد‌دن بزه‌دیلمیش تاجین
باشدان آتیب
– گؤتور سئوگیمه گؤره!

منه دئمه: وطن سئومه!
منه دئمه: بوش أللرده قابار سئومه!
منه دئمه: اینصاف سئو‌مه!
منه دئمه: دوزلوک سئومه!
منه دئمه: تورپاق سئومه، اورمان سئومه
یاشیل- یاشیل یارپاق سئومه!
منه دئمه: مین اؤزلو اول
منه دئمه: خایینلیق سئو‌، گول- چمنی آیاقلا گئچ!
منه دئمه: پاییز شللاغینی گؤتور
– اولوب- قالان بوداقلارین
یاشیل یارپاقلارینی دؤو!
منه دئمه: کسگین قیشین عدالتسیز کولگین سئو!
منه دئمه: پارانی قاپ، دردی اونوت!
منه دئمه: یاخشینی آت‌، یامانی توت!
منه دئمه: گئجه‌لرده بایقوش اوخو!
منه دئمه: هؤروم‌جک اول:قانادلارا قورقو توخو!
منه دئینن: ساری‌کؤینک!
-قیزیل‌گولده اوخودوقجا عطیرله‌نیم!
غزل اولوم
-واراقلاردا یاشیلانیم سطیرله‌نیم!
منی سئومه: چیسگین اولام- چن یاشایام!
یوخسا گولوم ائله اولسام:
باشدان- باشا یالانچی‌یام:
هئچ سنی‌ده سئومه‌میشم!
هئچ سنی‌ده سئومه‌میشم!

احتیراملار‌و تشککورلر
قاسم نوربخش( غزللی)

ارسال دیدگاه