شاعیر / مهدی کاووسی

شاعیرین دهریده یوخ بیرجه قارانلیق زامانی
خیالی دوپ دورودور ذره جه یوخدور دومانی
گاه بمی گاه دا چالار زیل ده اولان تار کامانی
سوز ایله بوسه وئریب سئوگی دن او کامین آلار
سینه دن جوشا گئلیب تانری دان الهامین آلار

شاعیرین هر سوزو دیل ده هوسی لن یازیلار
گوجو یوخ بیلگی سی یوخ پاک نفسی لن یازیلار
اورگین ده داشیلان غم شله سی لن یازیلار
قلم و دفتر ایله لعل نیشان جامین آلار
سینه دن جوشا گئلیب تانری دان الهامین آلار

او دنیزلر سایاقی دویغو درین بیر دیبی وار
آتش وولکانا بئنزر سوزونون مین تبی وار
اولمییب اولمیجک دنیا بویو مکتبی وار
زیروه لر تک اوجالیب عصر دن او نامین آلار
سینه دن جوشا گئلیب تانری دان الهامین آلار

چون کی حق عالمینه غیب دن او وصل اولونوب
حقه یانماق آلینی آدلی نیشان اصل اولونوب
عرفا دن پای آلیب هر دم اونا مثل اولونوب
مرغ حق دن وصال آ دیل دن اوجا آمین آلار
سینه دن جوشا گئلیب تانری دان الهامین آلار

جگری فیلسوف سقراط کیمی سم ایله شان شان اویولا
حق ایله قانه باتیب آدینا مرتد قویولا
چون نسیمی دریسی باش دان ایاقه سویولا
مکتب حرف و حروف دان میم ایله لامین آلار
سینه دن جوشا گئلیب تانری دان الهامین آلار

 

گاه یانیب گاه کوزریب گاه اویولوب گاه کول اولار
ایشارار کن قورویوب گاه جوشولوب بیرسیل اولار
گاه شیرین گاهدا آجی گاه دادی یوخ بیر دیل اولار
اوز اوز ایله دانیشیب شعر دن او تامین آلار
سینه دن جوشا گئلیب تانری دان الهامین آلار

گاه شیرین فرهاد نان عشقه مثال داغ قازیری
لیلی مجنون سایاقی چول ده قالیب یول آزیری
گاه اوزو عاشق اولوب معشوقونا سوز یازیری
چاتماقا معشوقونا ویس دن او رامین آلار
سینه دن جوشا گئلیب تانری دان الهامین آلار

 

یادا دوشدوک جه اورک آغری سی نین نغمه لری
قلبه دئیدیکجه فیکیر سانجیسی نین طعنه له ری
یولداشین دوشمنه اوخشار وئریلان زخمه له ری
شعرینه ظامین اولوب یازماقینا وامین آلار
سینه دن جوشا گئلیب تانری دان الهامین آلار

۱۴۰۰/۰۳/۲۳

مهدی کاووسی

ارسال دیدگاه