تاریخدن / اسفندیار حاجیلو

مین ایکی یوز دوخسان یئددی

سیزیلتیلار عرشه یئتدی

اورمودا سوی قیریم گئتدی

گؤیه چیخدی سیزلامالار

سونگویه کئچدی بالالار

 

بیری جانی، بیری میزی

قیردیلار اوغلانی، قیزی

ایتیرمیشیک حاقّیمیزی

آرتیق یوز ایل اؤتدو یئتر

یوز ایللیگی یئتدی یئتر

 

بیریسی کورد، بیری جیلو

قیرماغا گمیریر جیلوو

جنایته گئدیر سینوو

سیمیتقوسو، مارشیمونو

سوی قیریم ائتدی اورمونو

 

اورمیه¬نی تالادیلار

باش اوسته باش قالادیلار

اؤلکه¬یه قان جالادیلار

مظلوم قالان وطنیم اووووی

باشسیز قالان بدنیم اووووی

 

قوجالارین چیخدی آهی

اوشاقلارین یوخ پناهی

دئ لا اله الااللهی

سولدوز اولدو قان دنیزی

کیمدی یاردیم ائده بیزی؟

 

نه گؤزلو نه کور قالمادی

نه قادین نه ار قالمادی

مزارلیقدا یئر قالمادی

سالماسا قان آخیتدیلار

دارماداغین داغیتدیلار

 

یوز اللی مین گوناهسیزی

الی یالین سلاحسیزی

کیمسه¬سیزی، پناهسیزی

قیریب خزل ائیله¬دیلر

دؤنوب رجز سؤیله¬دیلر

 

یوردوموزو چؤل ائتدیلر

سینه¬میزدن یول ائتدیلر

قبرستانی بول ائتدیلر

اورمیه، سولدوز، سالماسا

کیمدی بیزه قولاق آسا

 

یوز اللی مین سلاحسیزین

یوز اللی مین پناهسیزین

یوز اللی مین گوناهسیزین

انتظار گؤزو بیزده¬دیر

خوراساندا تبریزده¬دیر

 

سیمیتقو ائتدی جنایت

جیلولار یاراتدی دهشت

باسدیریلدی مدنیت

انسانلیقلار یالان اولدو

مدنیت تالان اولدو

 

مظلوم قالان وطنیم اوی

باشسیز قالان بدنیم اوی

ارسال دیدگاه