بیر دلی کیمی دیر منیم اوره یی / دومان بختیاری

بیر دلی‌کیمی‌دیر منیم اوره‌ییم

هردن اؤزگؤتوروب اؤزون آختاریر

ال‌لری قوینوندا آه چکه-چکه

دومانلی یول‌لاردا گؤزون آختاریر

 

بیر دلی کیمی‌دیر منیم اوره‌ییم

قاچیر کؤلگه‌سیندن قاچیر سسیندن

بوینونا دولاییب ساری دردینی

باغیریر گئجه‌نین حنجره‌سیندن

 

بیر دلی کیمی‌دیر منیم اوره‌ییم

ایسلانیر یاغیشدا اوشویور قاردا

الجک‌سیز ال‌لرین باسیر آغزینا

بیر اولدوز شکیلی چکیر دوواردا

 

اولدوزون نفسی دولور جانینا

دولور یوخوسونا دولور گؤزونه

“بیر گئجه قار قیزی گلر گؤروشه”

بئله‌جه سؤز وئریر اؤزو، اؤزونه

 

بو اورک دلیجه یاشادیر منی

دوداغیم دولوسو گؤزوم دولوسو

باخ دلی کیمی‌دیر منیم اوره‌ییم

سوورولور باشیما سؤزوم دولوسو

دومان-بختیاری

ارسال دیدگاه