خئیریز اولسون / سخاوت عزتی (عندلیب)

یچگین ، گولون چیخیر
بوداقلار خئیریز اولسون
آغاجلار گلین چیخیر
آباغلار خئیریز اولسون

یاغیش داغا تلسیر
یاغا – یاغا تلسیر
ائل یایلاغا تلسیر
آداغلار خئیریز اولسون

گولر اوزلر اؤپه جک
آلا گؤزلر اؤپه جک
سیزی قیزلار اؤپه جک
بولاقلار خئیریز اولسون

پرده وورور ، سیم وورور
ووردوقجا نسیم وورور
زمی لر ایلغیم وورور
اوراغلار خئیریز اولسون

عطیر – عطیر قوخویور
قوشلار چلنگ توخویور
مئشه گؤزل اوخویور
قولاقلار خئیریز اولسون

مین چیچک ، گول دیه جک
مئه ووروب ، تئل دیه جک
یایلاقدا یئل دیه جک
یاناقلار خئیریز اولسون

سسیز آغلار چیچیگی
سؤزه باغلار چیچگی
اوخو داغلار چیچگی
دوداقلار خئیریز اولسون

ارسال دیدگاه