گل کؤنلومو سیناما، سیناییرسان قیناما – “جانای”

 

باغچامیزدا نار واریدی، من اونو چوخ سئوردیم، یازین گولن آیی تومورجوقلار سانکی سالخیم چیراغ‌دیر، بئله گؤزل ساللاناردی کی، هله بیرده یارپاقلارین آراسیندا گؤره‌یدین، گؤزلر دویمازدی باخماقدان، سونرا دا نارلار دوگمه‌له‌نردی، گونه بیر جانلاشیب بؤیویردیلر، یارپاقلار یام-یاشیل، نارلار ایسه بوزاراردیلار، پاییز مارشی سسلنینجه یارپاقلارین رنگی آتاردی، سارالیب توشردیلر، آما نارلار او اینجه بوداقلاردا کوفلاناردیلار، گاه ساغا گاه سولا، گؤز اوخشایان بیر سئوگی گلئیلیسی.

دورنالار کؤچنده نارلارین اوزو قیزاراردی، آنام تاپشیراردی: اوزونو آل ساخلا قیزیم، سئون سئومه‌ین بیلمه‌سین ایچینده نه وار.

قیروو گلینجه دای نه یارپاق واریدی نه قوشلار، بویا باشا چاتمیش نارلار بوداق اوسته گلئیلی گئدردیلر، بیلمیرم یئل اونلارا نه پیچیلدایاردی کی سحر-سحر باغچایا باخدیغیمدا گؤرردیم  نارلارین قابیغی یاریلیب، باغریلاری آچیلیب، بیر نئچه نار سانکی آغاجین گؤز یاشی‌دیر توشوب یئره، آنام دئیردی آی قیز باخ، نار نه یئلده توشدو، نه شاختادا نه قاردا، ال اوزادیب قوپارتماسان یئرین تومورجوغا وئریب، دیغیرلانار تورپاغا، ایندی ده گؤردو اوغول-اوشاق گئدیب،  اؤزون بوداقلا تک گؤروب، دردله‌شیب، دینجه‌لیب!

اونلاری دنه‌له‌ییب، بالدیرقان سپیب، کورسو اوسته قویاردی.

جانای

 

ارسال دیدگاه