توزلو سازیم / حلاج اوغلو (پروفسور دوکتور علی اکبر ترابی)

 

توزلوسازیم

اوخومورسان داها بو ائللره آی سوزلو سازیم!
غم لریم دیرمی قونوب تئللره آی توزلو سازیم؟!

بیر عومور گلمه دی بیر کلمه یالان سوز دیلیوه!
سحر- آخشام اوخویاردین نه اوره کدن ائلیوه؟!
نه گولردین اوجا سسله ال آتاندا تئلیوه؟!

سسلیره م بس نیه دینگیلده میسن سوزلو سازیم؟!
داغ کیمی بس نیه جینگیلده میسن توزلو سازیم؟!

سس وئره ردین نه گوزه ل جه، سسیمه، آوازیما،
دوغروسو اقبال ایدین، بولبول ایدین شن “یاز”یما،
آغلاییرسان بیلیره م قلبیده ایندی “یازی” ما،

گیزله نیرسن داها شعریمده منیم، سوزلو سازیم!
گوروسن قیشدی هله، یوخ چمنیم، توزلو سازیم!

اومودوم وار هله ده عشقیمه امداد ائده سن،
باشیوی سینه مه قویماقلاریوی یاد ائده سن،
دینه سن، دیندیره سن، “عاشیق”یوی شاد ائده سن،

بوشلاییبسان هله لیک “زیر له بمی” سوزلو سازیم!
سیلمه ییرسن اوره گیمدن بو غمی، توزلو سازیم!

“حاللاج”-ام پامبیق آتاندا باخ اوره کده هاییما،
بیر تئل ایله هله ده سس وئریر، آلقیش “یای” یما،
باخما او شاختایا، باخ قلبیده کی یاز- یاییما،

قوی گله ایستی گونش، بیر تازا آی، سوزلو سازیم!
سیلکه لن! پارلا! اوخو بیر داها، آی توزلو سازیم!

پروفسور علی اکبر ترابی (حاللاج اوغلو)

نظرات

ارسال دیدگاه