اؤیکولرده ادبی آخیم لار

کتابین مقدمه سیندن بیر تیکه:
اؤن‌سؤز
چالیشدیغیم کومپانی‌نین “بیتیک ائوی”سینی آراشدیریب، هئچ بیلمه‌دیگیم بیر بیتیک آختاریردیم. اؤنجه توپلوم‌بیلیم بیرده یؤنَتگی ‌ ایله ایلگی‌لی قایناق یاپیت‌لار اؤزنه‌ م‌دن کئچیردی. اؤتک قونولو بیتیک‌لری ده دوشونوردوم. بیر یئنی اؤیکو اولسایدی داها گؤزل! آما بوردا تورکجه‌سی یوخ دئیه، گؤزوم، یازاری “دکتر حسین پاینده” اولان “داستان کوتاه در ایران” آدلی اوچ جیلدلیک دَیَرلی بیر یاپیتا دوشدو. دورمادان ایلک جیلدین آردیجا ایکینجی‌ هابئله اوچونجو جیلدین ده آلیب، اوخومایا باشلادیم. سایین دوقتور حسین پاینده “ادبی قورام ایله ائلئشدیری” قونوسوندا دوقتوراسینی بریتانیادا بیتیرمیش -فارس ادبیات اوزمان‌لاریندان بیری اولاراق- یازدیغی بو اوچ جیلدلیک بیتیک‌ده سیراجا “گرچکچیلیک”، “دوغالچیلیق”، “یئنیجیلچی‌لیک” هابئله “یئنیجیلچی‌لیک‌ اؤته‌سی” ادبی آخیم‌لاری، آیری-آیری بؤلوم‌لرده تانیتیملاییب، اؤزل‌لیک‌لرینی آچیقلاماق‌لا یاناشی هر بؤلوم‌ده تارتیشدیغی آخیم‌ ایله ایلگی‌لی چاغداش فارس ادبیاتیندان بیر نئچه اؤرنک‌لر گتیریب، بیرده اونلاری ائلئشدیریرکن اؤیکولرین بوتون اینجه‌لیک‌لرینی اوزه چیخاریبدیر. بو یاپیتی اوخویوب باشا چیخدیقدان سونرا، اوخشار بیر یاپیتین بیزیم دیلیمیزده-ادبیاتیمیزدا اولمادیغی نیسگیلی منی بیرآز سارسیتدی. آنجاق اؤز پاییمدا، بو یاپیتین ادبی آخیم‌لار ایله ایلگی‌لی بؤلوم‌لرینی گئنل اولاراق تورکجه‌یه چئویریب، قلم‌داشلاریم‌لا پایلاشماغی اؤزومه سؤز وئردیم.
ألیمیزده اولان بو بیتیک، داها دوغروسو سایین “دوقتور حسین پاینده‌نین “داستان کوتاه در ایران” آدلی اوچ جیلدلیک بیتیگی‌نین “اؤزت چئویری” ‌سی‌دیر. آنجاق فارس ادبیاتین یوخ، گئنل اولاراق “ادبیاتی” گؤز اؤنونه آلاراق اونون آدی “اؤیکولرده ادبی آخیم‌لار” اولسا داها اویغون اولار دئیه دوشوندوم. دوغروسو، اینسان بئله بیر بیتیگی یازماغا باشلایاندا بیلیم‌سل دیلین نه اولدوغونو آنلاییر. ادبیاتیمیزدا بئله بیر یاپیت‌لارین آز اولدوغو بلکه ده اولمادیغیندان دولایی، ادبی تئرمین‌لره اؤز دیلیمیزده قارشیلیق تاپماق أن بؤیوک سورون‌دور. دئمک اینسان چئویرمن‌لیک‌دن داها چوخ، دیلچیلیک ایله اوغراشمالی‌ اولور. بو بیتیک‌ده، اوخوجو تورکجه چوخلو یئنی تئرمین‌لر، سؤزجوک‌لر هابئله یوزوم‌لارلا قارشیلاشیر. بو قونو، ایلک باخیشدا بلکه‌ بیرآز آشیری‌لیغی اوخوجویا أسینله‌سین آما قاچینیلماز بیر گرچک‌دیر. تئز-گئج بو یولو گئتمه‌لی‌ییک!. بونو دوشونه‌رک، اوخوجو هؤروتو اوخوماقدا چتینلیک چکمه‌سین دئیه هر یارپاغین آلت یازی بؤلومونده آچیقلاما وئریلیب هابئله سون بؤلوم‌ده بیر قیسا سؤزلوک یازیلیبدیر. بو قیسا سؤزلوک‌ده، سؤزجوک‌لرین آماج ائدیلمیش آنلام‌لاری فارسجا آچیقلانیب. بونلارین هامی‌سینین دوز اولدوغو یوخسا ادبیات اوزمان‌لاریمیز وَریندن آلیندیغی سؤز قونوسو دئییل. آماج، یالنیز بیر ایلک آددیم آتماق‌دیر. رحمتلیک صمد بهرنگی دئمیشکن: “یولا دوشدوک‌ده، قورخوموز تؤکولر”. بلکه‌ده بو آخساق یازی‌دان دولایی اوستادلاریمیز داها آرتیق چالیشیب، بو یئنیش‌لی- یوققوش‌لو یولو بیزه هامارلادیلار.
سایقی‌لارلا – پوزغون توفارقانلی

ارسال دیدگاه