《اوغرو》/ خسرو باریشان

 

شعر بیر اوغرودور.
یعنی اوغرونون یادینا داش سالما.
یعنی گؤزلریمه یاش سالما.

سن چئویرمکده‌می اوزمانسان!؟
سنین گؤزلرین شاعیردیر دئمک.

پولیس‌لره سؤیله سئوگیلیم
هر گئجه شه‌هری آلت-اوست ائدیب
شیرین یوخولاری گؤزلردن پوزماسینلار
بیز باخیشارکن، من
سینماییم دئیه
بو سایکوپئت حیاتی
بوینوما کراوات ائتمیشم.
آجیمدان
قارنیما یوخ،
اوره‌ییمده‌کی سؤزجوک‌لرین آردینا
داش باغلاییرام،
یوخ، داش آغلاییرام!
سیرداش…
یولداش…
وطنداش…
سئوگیداش…
یالقیزلیقداش…

من گیزله‌دیلیرمکده‌می اوزمانام؟
منیم گؤزلریم شعردیر دئمک.

هئ‌ئ‌ئ‌ی… یازدیقلاریمدان هویوخوب
ائو-ائو منی آختاران‌لار؛
هر ۲۴ ساعاتدان بیر
گوندوز منیم قارامی گئییب گئجه اولور!
اینسان دئمه‌دیک‌لریندن اولوشور؛
دئدیک‌لریندن‌سه گؤروشور.
منی سؤزجوک-سؤزجوک
شعرلریمده تاپین.

شاعیر: خسرو باریشان
۱۴۰۰/۴/…

ارسال دیدگاه