نئچه شعر / پروفسور دوکتور ترابی (حلاج اوغلو)

ائل دایاغی:

                    شانلی تبریز

اوجابویلو داغلارین وار،

گولر اوزلو باغلارین وار،

سینه دولو داغلارین وار،

          باشی اوجا شانلی تبریز!

سویکنیبسن ائل داغینا،

ائینالی یا ائل داغی نا،

بو ایلهاملار قایناغینا،

          باشی اوجا شانلی تبریز!

یازیلمیشدیر تاریخ لرده،

نه دوزوم وار سنده درده،

هئچ یئنیلمک یوخدور مرده،

          باشی اوجا شانلی تبریز!

آختار سالار چنلی بئلی،

گوستر آشیب – داشان سئلی،

سویله بو دور ستار ائلی،

         باشی اوجا شانلی تبریز!

سنین گوزه ل “ائینالی”ن وار ،

پارلاق تاریخ – احوالین وار،

شیرین دیل بو شان بالین وار،

         باشی اوجا شانلی تبریز!

رنگ آلیر گول یاناغیندان،

بال سوزولور دوداغیندان،

بوی دئییر ائل دایاغیندان،

         باشی اوجا شانلی تبریز!

وورغونویام ایگید ائلین،

فرهاد ییام شیرین دیلین،

پولاددان دیر قولون – بئلین،

        باشی اوجا شانلی تبریز!

قارینداشیق ائللر هامی،

اونوتمارام سن آنامی،

سندن آلدیم پاک ایلهامی،

        باشی اوجا شانلی تبریز!

           ع.ا.ت (حاللاج اوغلو)

تبریزین چیرپینان قلبی:

                    ارک قالاسی

ارکیم آی سنگریم آی، مردانالیقلار

بناسی !

آی ایگیدلیک آتاسی، عشق و محبت

آناسی !

قلعه نین دندنه سی، کرپیچی نین هر

داناسی !

تازا بیر “پند” وئریر انسانا آی شانلی

قالا !

عکس اولور هر اویودون دوورانا آی

شانلی قالا !

بویلانیبسان باخیسان ائل_ اوبانین

داغلارینا ،

قاش_قاباقلی بولود، هئچ آغلاماییر

باغلارینا ،

شعریم ایله سپه ره م سو او اوره ک

داغلارینا ،

سینه سینده یارایا باخمایان آی

شانلی قالا !

یاناراق گوز یاشی سی آخمایان آی

شانلی قالا !

سنه میراث دی بو یانماق دده، یا خود،

بابادان ،

بوی دئییرسن بیزه بابک دئییلن اود

بابادان ،

نه قده ر اودلو سوزون وار هله قورقود

بابادان ،

همتین تک اوجادیر قامتین آی شانلی

قالا !

قوی یاییلسین داهادا شهرتین آی شانلی قالا !

چوخ دومانلار یاناشیب شاختا گلیبدیر

باغینا ،

ضربه لر ائندیر یلیبدیر دوشونه، سول_ ساغینا ،

نئیله یر داش_دگنگ قاف کیمی ایمان

داغینا ،

اگه بیلمز باشیوی وور سالار آی شانلی

قالا !

داش آتیب باشیوی سیندیر سالار آی

شانلی قالا !

سن قوناق ساخلامیسان ستاری نه

حورمت ایله !

حق سوه نلرله گلیبدیر ائویوه عزت

ایله !

ظالیمین سنگرینی تاپدامیسان دقت

ایله !

قوی شاخا “ایلدیریم” اول زیروه ده

آی شانلی قالا !

“ارشد” ی تاپدایا تا گیروه ده آی

شانلی قالا !

باخیرام زیروه ن اوجا عرشلر همسایه

سی دیر ،

او اوجا قامتین ائل همتی نین سایه

سی دیر ،

گئدیسن بو گئدیشین “مر سحاب” آیه

سی دیر ،

“ائینالی” ن تک داها زنگین یاشا آی

شانلی قالا !

بوینووی شاخ توتاراق مین یاشا آی

شانلی قالا !

سنسن آی ائل دایاغی !ائل داغی! آی

شانلی قالا !

“حاللاج” ین ایلهامینین قایناغی آی

شانلی قالا !

پروفسور دکتر علی اکبر ترابی (حاللاج اوغلو)

شیرین دیل، کسگین شعر

آنامدان یادگار: آنجاق گوزه ل شیرین دیلیم واردیر،

دئییب: فرهادسان اوغلوم! شیرین بو

دیل _ دوداق لاردیر.

اودور یازماق میزین: سیندان، قلم: چککیش، دمیردن: سوز،

یانار کونلون: کوره، بو وزن شعرین تاپداماق لاردیر.

سوزون اعماق قلبیندن کوز اودلار تک چیخیب پارلار،

اونو سانما کیچیک بیر اود، یانار داغ دیر، اوجاق لاردیر.

دمیرلر: بو یانار سوزلر، شکیل تاپدیقدا سوولانمیش،

دویوشلرده قیلینج لاردیر،بیچین لرده اوراق لاردیر.

اودور میصری قیلینج: شعرین، اونون تک حق سوزون کسگین،

بو سوزلر، هر ظالیم بیلسین، سیلاح لاردیر، یاراق لاردیر.

ولی بونلار بیزیم ائلده، عدالت، حق سئون یئرده،

اوراق لاردیر، چاپاق لاردیر، کولوک لردیر، ناجاق لاردیر.

ظولوم، ظالیم، عداوت اولمایان سیاره ده، سوز سوز،

نووه، بومبا، فوزه، خمپاره، مصرف سیز، چوماق لاردیر.

سیلاحلی قال قارانلیقدا پاریلدیر گوزلری قوردون،

قودوز قوردلار: بو ظالیم لر، آداملیقدان اوزاق لاردیر.

نه دیر ” حاللاج! ” سوزو سازین؟ دئییر “چنلی بئله” بیر باخ،

قارانلیقلار قووولدوقجا، اوفوق آیدین شافاق لاردیر.

امین اول شن صاباح، ظالیم، یاوا، موفته یئین یوخدور،

قالان عشق و محبت دیر، قوچاق لیق دیر، قوچاق لاردیر.

پروفسور دکتر علی اکبر ترابی (حللاج اوغلو)

نظرات

ارسال دیدگاه