ایکی شعر / رضوان حاج قاسمی (جانای)

کارون، اوی گئجه‌لرین اوغلو ،

سن ده اؤله‌جک ایرماقمیدین!

یاسین‌دا  سس سسه وئردی سنینله خورمالار ،

سارالدی سالخیملار،

آغیلاندی آغ شکر خوزلاری،

قیسیر قالدی بولاقلار،

قیسیلدی سوسوز گلینلر،

بویو بویدا سو قابلاری قاچدی اوشاقلار سو دالیسیجا،

دیزی اوسته کؤچدو آنالار سو یالواریمیندا،

اوزون گیروو قویدو آتا بیر ایچیم سویا،

باخانمادی قیزجیغازین سوسوز گؤزلرینه،

مله‌شیردی جامیشلارین سوروسو،

گئجه‌نین اوغلو کارون سورگون گئتدی نم‌هارا،

خوزلار آسدیلار آسیلدیلار او مؤحتشم کؤرپودن!

دئمک کؤرپونون سون گؤره‌وی بو!

اوی یامان سونلو کؤرپو!!!

قاپی-قاپی دیله‌ییرم گئجه اوغلونو،

یالواریرام کارونو، قوجا اوچون،

اوشاق اوچون، سوتون گؤیه ساغان آنالار اوچون!

آغیسین آغنادیر خوز تارلاسی گنجلرین یاس یاللیسیندا.

    جانای

گئج اولدو آی گئجه اوغلو،

دنیزله گونش کوسدولر یوخلوغوندا،

گوجوندن ایراق یولدولار خوزلوغو،

سام آغیلادی جامیشلارین بول سوتلو امجه‌یین،

بادی‌سیز اوجاق قوردولار خورما قوللاریندان،

هارداسان آی گئجه اوغلو،

باشینی هانسی قول قارالادی؟

یاردی یارالادی؟

هانسی آی‌سیز گئجه‌ده،

هانسی بورولغاندا، هانسی چیرکین ال،

هانسی گؤزو قیرمیزی،

قوپاردیب پای وئردی

یوردونا، یاغیش‌سیز یای وئردی،

گنج‌لرین باغرینا یای وئردی،

سنی سیلمه‌یه اوی وئردی.

اوی گئجه اوغلو

دیزی قوینوندا قالدی آتالار،

بیر آنا سو ایچدی چیرکوودان،

اوشاقلارین یاندیم هارایینا،

هایلاندی گونش ،

قوولدو گونش، دؤیولدو گونش!

بیرداها گل باریشدیر دنیزله داغی،

بایراملیق آپار داغدان دنیزه.

    جانای

ارسال دیدگاه