عمران صلاحی

عمران صالحي ۴۰جي ايللرده آذربايجان يازيچيلاري آراسيندان باش قووزايان و طنز يازيلاريلا شؤهره‌ت قازانان شاعر و ساتيريك يازاردير. او يوردوموزون آجيناجاقلي قارما- قاريشيق بير دؤوورونده ياشاييب ياراتدي و خالق ياشامينا يئني تصويرلرله صنعتده جان باغيشلادي.

عمران ۱۳۲۵ ايلينده تهراندا دنيايا گلدي. آناسي باكيلي اولموش و آتاسي اردبيل‌لي. عمران ۱۵ ياشيندا يدي كي آتاسي دونياسيني ده ييشدي و گنج عمراني تك قويدو . عمران بيليم يوردوندا انگيسجه­ني اوخويوب، راديو- تلويزيوندا ايشه مشغول اولدو. عمران اوجابويلو، درين باخيشلي، درين دوشونجه‌لي، عيني حالدا اوتانقاچ ايدي. او، اوشاقليقدان يازيب- ياراتماغا جان آتميش، هله يئني يئتمه چاغلاريندان جيزما- قارالامالاري قالميشدير. همان زماندا ملانصرالدين ناغيلارينا، هابئله لورل- هاردي، چارلي چاپلين و … فيلم­لرينه ده علاقه گؤسته­رير. . .

اؤزو دئميشكن بؤيوك آناسي‌نين ناغيل‌لاري و شعرلري اوندا بؤيوك ائتكي­لر بوراخميش و خالقين شفاهي ادبياتينا علاقه ياراتميشدير. بيز بو اوشاقليقدا اولان علاقه­لري، سونراكي شعرلريندن گؤروروك. اؤزو دئميشكن خالق كولتورو اونون ياراديجيليغيندا و صنعت ياراتما دا اؤز اثريني قويموشدور. گاهدان بير لطيفه ائشيديب گونون سياسي- اجتماعي مساله­لريني اونا چاتديرميش و يوكله­ميشدير.

۱۳۴۵جي ايلده، عمران ياشاييشيندا بير دؤنوش نُطقه يارانير. توفيق درگي‌سيله ايش بيرليك ائديب، فارسجا و توركجه يازيلاريني چاپ ائتديرير و چوخلو يازارلار و شاعرلرله تانيش اولور. طنز يولو ايله خالق ياشاميندا چيراغ يانديريب، يوللاريني ايشيقلانديرير.  شعرلر قوشور، اؤزونه تاي اؤز ايچيني سؤزجوكلرده قوشور. بير ايگيد اولور اينجه روحلو و چوخ جانا سينن. اونون پاك و دورو اوره‌يي گؤزلري­نين پاريلتي­سيندن بللي ايدي. ايچ تميزليگيني گؤزلريندن اوخوماق اولوردو، صفالي گولوشلريله دينله­ييجي‌سينه صميميت ارمغان ائديردي. اوره­ك صفاسيني گؤي قورشاغي­نين آلوانليقي ايله آدامين اوستونه چكيب، بير آنليق دا اولورسا زمانه غميني اونودورسان. آنجاق بونجيب گولوشلرده سانكي بؤيوك بير درد ياتيب، خالقين دردي. عمران عمرونون سون گونونه قده ر بير آذربايجانلي ياشادي و انسان ماهني­سيني ديله گتيردي. بو ماهني­لاردا آنا ديلينه اولان مارغيني گؤرمك اولور و بير انسانين اوره­ك دؤيونتولريني:

سازين سيمي دالغالانير

دالغالار داشا ده­يير

جالانير.

ايندي منيم اوره­ييم

يئلكن­سيز بير گمي كيمي

دالغالارين ايچينده.

بو شعرلر، اونون روح ساغلامليغيني، دورولوغونو و گؤزه­للييني گؤسته­رير.

عمران ايكي ديللي شاعردير. او قدر بو ديللرين ايچينه گيريبدير كي اؤزو آنا ديلينده قوشدوغو شعرلري فارسيجايا چئويرير و گاهدان بيلمير قاباقجا توركجه بو شعري سؤيله­ميشدير ياخود فارسجا! هر حالدا اونون اثرلري ايكي ديلده و بونلاردير:

  • گريه در آب – شعر مجموعه­سي، ۱۳۵۳

  • قطاري درمه – شعر مجموعه­سي، ۱۳۵۵

  • ايستگاه بين راه، شعر مجموعه­سي، ۱۳۵۶

  • كتاب مجموعه، توركي شعرلري ۱۳۵۷

  • هفدهم، شعر مجموعه سي، ۱۳۵۸

  • پنجره­دن داش گلير، توركجه شعر مجموعه­سي ۱۳۶۱

  • طنز آوران امروز ايران، ۱۳۷۳

  • شايد باور نكنيد، رومان طنز، ۱۳۷۴

  • از گلستان من ببر ورقي، ۱۳۷۸

۱۰) حالا حكايت ماست، طنز قطعه­لر، ۱۳۷۹

۱۱) آينا كيمي، شعر مجموعه­سي – توركجه، ۱۳۸۰

۱۲) موللا نصرالدين، آراشديرما و لطيفه­لر، ۱۳۸۰

۱۳) پيشگامان شعر معاصر ترك، آراشديرما، ۱۳۸۳

۱۴) آن سوي نقطه چين، ۱۳۸۵

و اونلارجا باشقا كتابلار، سئچيلميش شعرلري وطنز قطعه­لري. [۱]

عمران بير دانيشيقدا دئيير: من طنزلري خالقيميزا گؤره يازيرام، آمما شعرلري اوره­ييمه خاطر.[۲] او، بو سورغو: – “سيز نييه توركجه شعر يازير سينيز”- ين جوابيندا دئيير: – “منيم آناديليم توركودور و ائوده هميشه توركو دانيشاريق. بير سيرا دويغولار وارديركي آذربايجان هاواسيندا اولموش و من اراده ائتمزدن توركوجه شعر دئميشم و بو دويغولاري شعريمده گتيرميشم”. بير باشقا يئرده ايكي ديللي شعرلريندن سؤز گلن ده يازير: «دوستلار دان بيري دئييردي: عمران! سن توركجه شعردئ، سونرا فارسيجايا چئوير!» شاعريميز بو ايكي ديلين شعر حاققيندا بئله ديله گلير: تورك شعري عروضدا دئييل. اونون وزني هيجالي­دير و بو هيجا وزني، وحشتلي بير ظرفيته مالك دير. بو وزن ايله هر زادي سؤيله­مك مُمكُندور. يئرسيز دئييلدير كي بير يازار ناظم حكمت حقينده دئميشدير «او شعر ماكيناسي­دير». بو تورك ديلي­نين اؤزه­لليگي­دير، بو ديل اصالتاً موسيقايي­دير. من بير كلك ده ووردوم و بو هيجالي وزني فارس شعرينه گتيرديم. فارسيجا مجموعه واريم «آن سوي نقطه چين ها» چاپ اولمادادير و همين شيوه دن بو مجموعه­نين شعرلرينده يارارلانميشام[۳]. صلاحي‌نين شعري حقينده دئميشلر «اخوان، شاملو يا حافظين شعرلريني باشقا ديله ترجمه ائده­نده، اونون اينجه‌ليك‌لري آرادان گئدير، اما صلاحي شعرلري بئله دئييل و بوتون گؤزه­لليك­لري ساخلايا بيلير». عمران صلاحي‌نين شعرلري انگليسجه، فرانسيزجا، اسپانيولجا، ايتاليانجا و باشقاديللره ترجمه اولموش، بير سيرا شعرلرينه موسيقي بسته­لنميش و خالق ايچينده ياييلميشدير. اونون اوچ توركجه شعر مجموعه­سي چاپ اولموشدور:

  • مجموعه، ۱۳۵۷ بو اثر صلاحي ايله بيرليكده حبيب ساهر، م. قافلانتي، ح. دوزگون و ب. چاي اوغلونون شعرلري ده گلميشدير.

  • پنجره­دن داش گلير اثري ۱۳۶۱ چاپ اولاراق تكجه ايراندا يوخ، بلكه سرحدلري آشيب كئچيب و باشقا اؤلكه­لرده ده آلقيشلانيبدير.

  • آينا كيمي اثري ۱۳۸۰ دا چاپ اولاراق، شاعر اؤزو طرفيندن فارسي ترجمه­سي ده وئريلييبدير. بو دفترين بيرينجي شعري بودور:

پارچالانديق، سينما ديق!

داش آتانلار بيلمه­ديلر، پارچالانميش آينادا

يير آجادان مين آي چيخار

بير گونشدن مين گونش

بير اولدوزدان مين اولدوز.

              ***

پارچالانديق آينا كيمي

چوخالاريق

چوخالداريق ايشيغي.[۴]

بو بالاجا شعرده، شاعرين دنيا گؤروشو، قلبي­نين تميزلييي وشن روحو اؤزونو گؤسته­رير. شاعرين اينجه دويغولاري ساده سؤزجوكلرده قانادلانيب گؤيلره قالخير. عمرانين شعرلريندن اوره­يه ياتان نه­دن­لردن باشليجا ديلي­نين ساده­ليگيني سايماق لازم، او عمي­سينين اؤلوم نيسگيلي­ني گؤر نه ساده ديل و گؤزه­ل تصويرلرله سؤيله­يير:

آغلا، آغلا ساوالان

لاله لر اوره ييني اودوور، داغلا ساوالان!

سينه ده كي يارالاري دومانلارلا ياخشي باغلا

ساوالان!

هامي بير- بيريندن آيري دوشوبلر

قارداش – قارداشدان

داغ – دره، داشدان

فكرلر باشدان.

***

مشه سهراب اؤلنده

(شام اسبي) ده آغاجلارين بئلي بيردن بوكولدو

يئل لر پنجه سالديلار

بولودلارين كؤينك­لري سؤكولدو

دنه- دنه- دوگمه كيمي، يئره اولدوز تؤكولدو

مه شه سهراب كيم ايدي؟

قهرمانليق چيراغيني يانديران

قارانليقدان چيراغي دولانديران

آخير دفعه، من عميمي گؤره‌نده

قيش ايدي

(سرعين)ين سولاري كيمي قايناشيب

شام اسبي دن تهرانا گلميش ايدي.

دولو بولودلار كيمي

قوجاقلاشديق، آغلاشديق

بير چترين آلتيندا

كوچه­لري دولانديق

يئل اًسنده، گوجو بيزه چاتميردي

سويوق – شاختا، ديشي بيزه باتميردي.

***

مشه سهراب كوچه­لرده منيم آتام مي بوللاني

يادا ساليب آغلادي

باشيميزين اوستونده چتير، آمما

چتيرين آلتيندا ياغيش ياغيردي!

***

ساوالانيم ايندي حسرت چؤلونده

گؤزلريمده ياغيشدان پاي

ديليمين اوستونده اي واي

اته­گيمده آجي چاي.[۵]

عمران صلاحي كئچميشي ياددان چيخاردان دئييل، اونون كؤوره­ك اوره­يي هجران، آيريليق، اؤلوم – ايتيم آجي­سيني اونوتمايير، هابئله شيرين­ليك­لري ده ياددان چيخاردان دئييل. دبلري ده اونوتمايير:

قهوه خانادا اوتوردوق

 قليانلا شديق، چايلاشديق

محبتي قويدوق ميزين اورتاسينا، پايلاشديق!

***

باياتي­لار

آيران كيمي داماغيمدا داد وئردي.

***

چاي اوغلويا دئييره‌م

بلبللرين سه­سي خوش

بوردا هر شئي وار، آمما

آشيقلارين يئري بوش![۶]

عمرانين شعرلرينده گوللرين قوخوسو، چيچيك­لرين اييي­سي و آلما – هئيوا، قوشلارين دا قوخوسو گلير. آنجاق بونلار هر زمان خوش دئييل، گاهدان نيسگيل قوخوسو وئرير، گاه بو عطر كيمي قوخويان قوشلار دووار داليندا گؤزدن ايتيرلر، هاوا توتغوندور، اوچماغا هوس يوخ!:

غنچه، معطل قاليبدير

باهاريئلي اونا دئيير:

گنج اولار، بير آز تله‌س!

***

هاوا ائله آغير ديركي

قوشلار اوچماق ايسته­مير

آچيق قالسادا قفس!

شاعرين بو ساده ديلينده، درين معنالي رومانلار اوخوماق اولور. اوزون داستانلاري فقط سطرلر آراسيندا بؤلونن تك تك سؤزجوكلرده:

پنجره­لر آچيق

قاپيلار آچيق

سفره لر آچيق.

***

محبت

آشيقلارين سازيندا

چالينيردي.

***

قوناقلار

بير به بير

گلديلر

قالديلار.

***

بيزلري، او آچيق قاپيدان

ائشيگه سالديلار

ائويميزي اليميزدن آلديلار![۷]

گؤردويوموز كيمي، عمران شعرلرينده داستان دا سؤيلور، بونلاردا تاريخيميزي آچيقلايير، باشيميزا گلن لري آراشديرير. عمران تصويرلر يارادير، هر سؤز جوكدن بير تصوير، هر بير تصويرده بير داستان و هر شعرينده اوزون بير تاريخ. آنجاق بو سؤزجوكلر، تصويرلر، شعرلر و تاريخلر دويغودان دالغالانير، جالانير.

شاعرين شعرلري قيسسا و بالاجا اولورسادا، بالاجا حجمده دولقون معنا واردير:

چيراق يانير اوزاقلاردا

اولدوز يانير چيراقلاردا

هر اولدوز دا بير سئوگي وار

هر سئوگي ده بير دسته گول

هر عطرده بير كپه­نك

هر كپه­نك ده بير شاعر!

شاعرين عمر شوسه­سي ۱۳۸۵جي ايلين مهر آييندا (۱۱ ده) دولدو، آنجاق ياشي ۶۰ ي دولدورماميشدي[۸] (دوغموم گونو ۱۰ اسفند ۱۳۲۵).

عمران صلاحي خالق شفاهي ادبياتيندان باجارديغي قدر فايدالانير. بير طرفدن خالق ديليني قوللانير و همان ساده­ليك، آخيجي‌ليق و تكلّف­سوزلوق شعرلرينده لپه­له­نير، او بيري طرفدن خالق ديلينده اولان دئييم­لر، ماهنيلار، باياتيلار اونون مختلف شعرلرينده يئر ساليب قالارقي اولار[۹]. خالق باياتيسي اولان:

بوردان بير آتدي گئشدي

آتين اويناتدي گئشدي

گون كيمي شفق سالدي

آي كيمي باتدي گئشدي

دؤرد مصرعه بؤلوب و بير دؤرد بندليك شعرده بئله گتيرميشدير:

بير جيبينده فشنگ

بير جيبينده نوغول

بير گؤزونده زهه‌ر، بير گؤزونده بال

«بوردان بير آتدي گئشدي».

***

ميدان چيخيبدير آيا

آي انيبدير ميدانا

توزلو آيين ايشيغيندا

«آتين اويناتدي گئشدي».

***

گولله سه­سي خوروزلاري اوياتدي

بير اوجا باغيرتي گؤيده داغيلدي

قان داياندي ائيواندا

«گون كيمي شفق سالدي»

***

كهنه صانديقلار دا، كهنه كتابلاردا

كهنه كيتابلاردا، كؤهنه ناغيل­لار

كهنه ناغيللاردا، قديمكي اوره­ك

«آي كيمي باتدي گئشدي».

گؤردويوموزكيمي، بورادا شاعر، بير قديمكي باياتيني پارچالاييب، نئچه بند شعره قاتماقلا مودئرن شعر ياراديب و اوندان درين معنا ايشه آپاريب. بو صنعت تكجه بورادا يوخ، بلكه باشقا شعرلرينده ده گؤرمك اولور. «سن گلنده» شعرينه بيرگه باخاليم:

سن گلنده، پنجره­لر آچيلير

يئل اوينايير پرده­لرين تئلينده

«پنجره­نين ميل­لري»

آچير قيزيل گوللري».

***

سن گلنده، هاوا بيردن تازالانير

آينالار تميزله­نير

ريحانين عطري اوينايير

سو اوخويور.

***

سن گلنده، دن تؤكولور ائيوانا

گؤيرچينلر گؤيه ريرلر.

***

سن گلنده، ياغيشلاري چاغيريرسان

دالغالاري چاغيريرسان

يئلكن لري آچيرسان

سن گلنده…

بوردا «آي بري باخ» آدلي خالق ماهني سينا اشاره اولونور و اوندان يارارلانير. نه دئييم؟ حتا او بيري كيتابي نين آدلي «پنجره­دن داش گلير»[۱۰]، ائله همين ماهنيدان آلينميشدير و اورادا  دا فولكولوردان يارارلانميشدير.

[۱]) آذري مجله‌سي، نمره ۱۳، ۱۳۸۵٫

[۲]) آذر تورك مجله‌سي، نمره ۲، مارس ۲۰۰۷، ص ۱۶۶-۱۵۶٫

[۳]) آذري، همان.

[۴]) عمران صلاحي، آينا كيمي، تهران، نشر نگاه امروز، ۱۳۸۰، ص ۹٫

[۵]) عمران صلاحي، آينا كيمي، تهران، ۱۳۸۰، ص ۱۵٫

[۶]) همان، ص ۲۲٫

[۷]) آينا كيمي، همان، ص ۹۷٫

[۸]) آذري فصلنامه، سايي ۱۳، ۱۳۸۵٫

[۹]) م. كريمي، عمران صلاحي ياراديجيغينا بير باخيش، بهار زنجان هفته‌ليگي، ۱۳۸۲٫

[۱۰]) عمران صلاحي، پنجره‌ده داش گلير، تهران، آذربايجان، مدنيت جمعيتي، نمره ۱۱، ۱۳۶۱٫

ارسال دیدگاه