سارماشیق / رضوان “جانای” حاجی قاسملو

یازین سون گونلریدی باغچامیزداکی قیرمیزی توت آغاجی گؤزل بار گتیرمیشدی، آنام یئره بؤیوک اؤرتوک سالیب، توتو سیلکه‌لتدیردی، سونرا دا منه دئدی: قونشولارا پای آپارام. آنام بوشقابلارا قالاییردی، من ده آپاریب، وئریب، قاییدردیم. بیزدن یئددی قاپی اویانا اولان قونشوموز باغچادا یاپیشقان سارماشیق اکمیشدی، سارماشیق دا بوی آتیب اوتای-بوتای ائولره بوداق وئرمیشدی، بیزیم حیه‌طه ده گلمیشدی، آما منیم آچیشقاما هله ایکی قالیردی الی چاتسین؛ اونلارین سیراسی گلنده دئدیم یورولدوم دا آنا قالسین سونرا آپارارام، گولومسه‌ییب، دئدی:
– قاداسی بو ایل ده اولماسا گلن ایل سنین آچیشقانا چاتاجاق بو سارماشیق، آپار گؤزونه دؤنوم.
آنامین مهریبان دانیشیغی همشه اولدوغو کیمی منی یوموشالدیب، یوللاندیردی. قاییداندا آنامدان سوروشدوم:
نییه بو سارماشیق آغاجی بئله بؤیویور؟ نییه اوبیری آغاجلار کیمی دئییل قالا اکیلدیگی یئرده؟
آنامین اللری، منیم اوزوم توت بویاسینا الوان اولموشدو. دئدی من اللریمی یویوم سن اوزونو، گل اوتوراق توتلاری قیشا حاضیرلایاق، من ده سنه سارماشیغین نییه‌سین دانیشیم.
آللاهدان او گونومون پایی گلمیشدی، تئز اوزومو یویوب، اتگیمله قورولاییب، گلدیم آنامین یانینا، آنام دا بئش-آلتی شوشه گتیرمیشدی، اوتوردوق اونلاری دولدورماغا، آنام دئدی:
چوخ اسگی زامانلار بیر باغدا، مهریبان خانیم یاشاریمیش، باغین ایچینده بولاق دا واریدی، بولاغین سویو آز اولدوغونا خاطیر، کیچیک سویولو دوزلدیب، آغاجلارین یانیندان سووشدوروب، باغدان ائشیگه ساری چیخارتمیشدیلار. او باغدا چوخلو آغاج واریدی، سویا خاطیر ده او ماحالین باغلاری گؤزل اولاردی، ایللرین بیرینده قوراخلیق اولار، نه پاییزی، قیشی یاغینتی اولار نه یازدا! بولاغین سویو گونه بیر آزالار، ائله اولار کی دا باغدان ائشیگه سو چیخماز! کندین آدامی سودان ساری قالارلار باخا-باخا! باغلار قورویار، او مهریبان خانیم پاییز اولونجا مئیوه‌لری دریب، هر قونشویا بؤیوک قوطو پای وئرر. بیر گون بولاغین یانیندا اوتورموشویموش ندنسه باشی گیجلله‌نیب، توشر بولاغین یانینا. صاباحیسی گون گؤررلر او مهریبان قونشو اؤلوب، بولاغین یانیندا اونو تو پاغا باسدیرارلار. یازدا او مزاردان یاپیشقان سارماشیق گؤیه‌رر، دئیرلر اؤنجه بو آغاجدان یوخویموش، ایلک سارماشیق ائله او خانیمین تورپاغیندان گؤیه‌ریب.
بودا سنین ناغیلین. ایندی قاچ ایشقابدان شکر گتیر، من ده بو توتلارین اوستون شکرله باسدیراق، دئسینلر به قاردی، یوخلاسینلار، قیشدا داماق دادیندا یئیه‌ریک.
جانای
🥀🥀🥀🥀🥀

ارسال دیدگاه