آرزیدان تامارزییا / رضوان حاجی قاسملو (جانای)

لیلی و مجنون، شرق دونیاسی نین ان سئویملی سئوگی داستانی دیر. بو ایکی عاشق و معشوق ون سئوگی داستانی، عرب اؤلکه سینده اوز وئریبسه ده، بوتون مسلمان خالقلاری آراسیندا یاییلیب و عربجه، فارسیجا و تورکجه نثر و نظم ایله یازییا آلینمیشدیر. آذربایجان ادبیاتیندا دا نئچه – نئچه گؤرکملی شاعیرلریمیز بو داستانی شعره چکیب و اؤز دویغو – هیجانلارینی بو نیسگیل لی عشقدن کاغاذ اوستونه گتیریبلر. آنجاق گنجه لی نظامی نین لیلی و مجنون اثری تامام شرق ملتلری آراسیندا بیر شاه اثر کیمی پارلاییر. سونراکی تورک شاعیرلری بو داستانی نظمه چکمک ایسته دیکده، گنجه لی نظامی نین اثریندن واز کئچه بیلمه میشلر، حتا مولانا فضولی کیمی بؤیبوک و گؤرکملی بیر شاعیر، اؤز درین حؤرمتینی حکیم نظامییه گؤسته ره رم اونون اثریندن ایلهام آلدیغیندا اؤزونو چاره سیز بیلیر.

آنجاق بوگون، ده یرلی شاعیره میز سرکار رضوان حاجی قاسملو – جانای خانیم، اؤز شاعیرانه دویغوسو ایله بو گؤزل داستانی – نظامی نین لیلی و مجنونوندان یارارلاناراق آخیجی و چوخ گؤزل بیر قلم ایله – نثر صورتینده قلمه چکیب و آرزیدان تامارزییا عنوانلی اثرینی یاراتمیشدیر. آرزیدان تامارزییا اثرینی اوخویاندا هم ایکی سئوگیلی نین هیجانلارینی دویور و هم جانای خانیمین ایتی و گؤزل یازیسیندان قه هه له نیر. اوخوجونون گؤزوندن ایستر – ایسته مز یاش آخیر و بو سئوگی نین عظمتی، تمیزلیگی و نیسگیل ایله دولو آنلارینی یاشاییر.

بو گؤزل اثر – ادبی نثر، تورکجه میزده بیر شاه اثر کیمی اؤزونو گؤسته ریر . امینم کی هر اوخویان بو سئگیلی لرله دویغولانیب و سئوگی لذتینی، هیجانی و آجی طالعینی دویاجاقلار. جانای خانیما “اللرینیز آغریماسین” دئییر، اوره یینیز همیشه سئوگی ایله چیرپینماسینی دیله ییر و یئنه  ده ادبیاتیمیزا یئنی اینجی لر باغیشلادیغینیزی آرزولاییریق.

جانای خانیم! سیزه تشک.رلریمیزی بیلدیریب و باشاریلار دیله ییریک.

ارسال دیدگاه