دؤكتور حميد نطقي (آیتان) آذربايجان چاغداش ادبياتيندا ده يرلي و گؤركملي سيمالارداندير كي رولونو معاصر شعريمیزده، هابئله ديليميزده اونوتماق اولماز. نطقي «آيتان» تخلوصوايله شعر يازميش و شعرلرينده بؤیوک شاعرلریمیز: رفعت و ساهرين ايزيني گئتميشدير. آيري بير سؤزله دئسك مدرن شعرده اوچ سيما بير خطي توتوب ايزله ميشلر: رفعت، ساهر، نطقي.
دؤكتور نطقي‌ني شاعرليكدن آرتيق، ادبياتيميزدا آراشديرمالاري، يازي قايدالاريميزي ساهمانلاماق و ادبي نظريه لر اورتايا قويماق اوچون ده يرلنديرمك دوزگون اولار. دؤكتور نطقي ۱۲۹۹دا تبريزده آنادان اولدو، تبريزده تحصيليني دپيلوما قده ر داوام وئريب، همان چاغلاردا مقالهلر يازدي. سونرا توركيه‌يه گئديب حقوق دوكتوراسيني الده ائتدي. بو زامانلار دوكتور نطقي دوكتور هئيت ايله برابر ياشاييب، دوستلوق ائديرديلر. نطقي دوكتوراسيني آلاراق ايرانا دؤندو و آباداندا نفت شركتينده ايشه باشلادي. لياقتلري اساسيندا، دوكتور نطقي «عمومي علاقه لر» ساحه سينده دريندن تحقيق و تدقيقلر آپارماق اوچون انگيلیس و آمريكايا گؤنده ريلدي. ۱۳۴۱جي ايلدن تهرانا گليب، نفت شرکتینده ايشينه دوام وئرهرك، «دانشكده ي ارتباطات عمومي» ده تدريس اوچون دعوت اولوندو، ۲۵ ايل بورادا اوستادليق ائديب بو دانشکدهنين رئيسي اولدو.
۱۳۵۷دن سونرا ديليميزه آزادليق گله رك، دوكتور هئيت ايله برابر «وارليق» درگيسيني يولاساليب و نطقي جنابلاری اونون باشيازاري كيمي فعاليت گؤستردي و دهيرلي مقالهلرله چيخيش ائتدي. بورادا ديل قايدالاري و توركولوژي مسئله لرينه عايد مقاله لر مطرح ائدهرك يازيچيلار، عالملر، شاعرلر و علم آداملاري آراسيندا اؤزونه يئر آچدي. دؤكتور نطقي تورك ديلينه عاشيق اولاراق، چوخ اينجهروحلو، دموكرات، آزادليق سئوه ر و مستقل فكرلي بير انسانايدي. نهايت ۱۳۷۸جي ايلده تير آيي‌نين ۲۵ده ناتينگهام خسته خاناسيندا وفات ائديب و جنازه سي استانبولدا قويلاندي.
علی اصلانی جنابلاری بو اثری کؤچوروب اوخوجولارا تقدیم ائتدیکده اؤز تمیز دویغوسونو و پاک دوشونجه سینی گؤسترمیش و گؤزل بیر صورتده ده بونو حاضرلامیشدیر. بورادا اؤز تشکورلریمی بیلدیریب، ادبیاتیمیز اوغروندا اونا باشاریلار دیله ییر، اثرینی ده ده یرلی بیر تحفه کیمی ادب سئور خالقیمیز طرفیندن قارشیلاندیغینی ایسته ییریک.
