شانلی شاعیر / پروفسور دوکتور علی اکبر ترابی (حلاج اوغلو)

“اولوم حق دیر”سه، اولمزدیر اوره کلرده یاشار شاعیر،

ائل ایله بیر گه قالماقلا قالار شعرین قوشار شاعیر.

اولوم شاعیر الینده اولدورولموش بیر فنا شئی دیر،

قانادلانمیش، زمان حددین، بو تاریخی، آشار شاعیر.

یاشار هر بیر اوره کده، گول وئره ر ائللر جنانیندا،

یاهالماز حقی تاپماقدا، گمان ائتمه چاشار شاعیر.

مقامی، حشمتی سایماز، تمل سیز شهرتی، سوز سوز،

گوزه ل بیر هرزه دلبر تک، آلیبدیرسا بو شار شاعیر.

ظولوم گوردوکده بو انسان، قالانماز داش کیمی سس سیز،

اوزو وولکان، سوزو اودلو، یانار، قاینار، داشار شاعیر.

گوزه ل انسانلاری، عشقی، وفانی، شن ائلی گورجک،

اوره کلنمیش سئوینجینده ن، “عاشیقلار” تک جوشار شاعیر.

دئمه اولماز “صلابت له لطافت” بیر اوره ک ایچره،

داغ اولدوقدا، لطافتده باغ ایله باغلاشار شاعیر.

تموچین لر بو دونیایا گوز آچدیقدا اولوبدورلر،

خیال ائتمه قارا طالع چونر، یا آغ لاشار شاعیر!

قودورقان قورد اولان ظالیم، دونوب املیک قوزو اولماز،

جهالت خسته سی آمما باخیلسا ساغلاشار شاعیر!

سویو قدورسا هنر لر عالمی علم عالمی آنجاق،

امیدین کسمه انساندان، قیزیشدیر، داغلاشار شاعیر!

یئنی دونیا، یئنی انسان یاراتماق بیر رسالت دیر،

“باشارمام” سویله مه “حاللاج”، یارات شاعیر، باشار شاعیر!

پروفسور دکتر علی اکبر ترابی (حاللاج اوغلو)

ارسال دیدگاه