ایکینجی عاشێق داستان گئجه‌سی #تبریزده گئچیریلدی

انجمن فرهنگی هنری عاشێقلار، ائلبیلیمی مؤسسه‌سی، ائوده آل و انجمن قرآن و مثنوی واعظ دَرنکلری‌نین ایشبیرلیگی ایله بهمن آیێ‌نێن دؤردۆنده، تبریزین نیستان سالوْنۇندا ایکینجی عاشێق داستان گئجه‌سی گئچیریلدی. بۇ محتشم و شانلێ مراسم آذربایجانێن گله‌نکلیک عاشێق مۇسیقیسینه و عاشێق داستانلارێنا مراقلانان هنر سئور وطنداشلارێن استقبالی ایله قارشێلاندێ.
بۇ گئجه‌ده «عاشێق رحیم نظری» عاشێق حسین‌ین هجران روایتلریندن دانێشێپ اوْخۇدۇ .
عاشێق رحیم نظری ۱۳۴۱. ایلده قاراداغ‘ێن کلیبر ماحالێ‌نێن نۇغَدی کندینده دنیایا گلیپ. اُستادلارێ عاشێق ادبیّاتێندا عاشێق عزیز شهنازی، سازدا ایسه عاشێق حسین اسدی اوْلؤپدۇر. عاشێق رحیم نظری‌نین بۇ صنعتده ۳۰ ایلدیر فعالیتی وار. اوْندان اؤنجه ده یئددی ایل عاشێقلێق صنعتی‌نین اؤگرنمه‌سینه وقت صرف ائیله‌ییپدیر. آلمان، هلند، بلژیک، اُتریش، تۆرکمنستان، آذربایجان جمهوریسی، تۆرکیه اؤلکه‌لرینده اجرالارێ اوْلۇپ.
عاشێق رحیم نظری‌نین ۵۵. یاشی مناسبتینه تبریزین «انجمن فرهنگی هنری عاشێقلار» و «حوزه هنری انقلاب اسلامی» اداره‌سی طرفیندن آغێرلاما مجلسی گئچیپدیر. اوْنۇن۱۰۲ ساعت گؤرۆنتۆلۆ و سسلی ایفالاری خلق آراسێندا یایێلێپ؛ عباس گۆلگز قربانی کیمی داستانلارێ صحبت ائیله‌ییپ. ۲۰۱۰ ایلینده گنجه بیلیم‌یۇردۇندان فخری دیپلوْم آلێپ. ۲۰۱۱ده تورکیه عاشێقلار بیرلیگیندن فخری دیپلوْم آلێپ، ۲۰۱۷ده آذربایجان عاشێقلار بیرلیگی‌نین عضوۆ اوْلۇپ. تۆرکیه‌دن اۆچ کز فستیوال یوْنتۇسۇ (تندیسی) آلێپدێر.

همین مراسمین دوامێندا روایتلر بیتدیکدن سوْنرا، عاشێق عوض عبادپور-دان تجلیل اوْلۇندۇ. عاشێق عوض عبادپور ۱۳۴۲ده قاراداغێن کلیبر شهری‌نین حَسنُو ماحالێنا تابع اوْلان آرپالێق کندینده آنادان اوْلۇپ. آتاسێ، قادر عبادپور بالابان اُستادی ایدی. عوض عبادپورۇن ساز اُستادێ عاشێق عیسیٰ دَشَن اوْلۇپ، سوْنرا عاشێقلێق و سؤز اُستادی عاشێق رسۇل قربانی اوْلۇپ، ساز چالماقدا دا عاشێق عدالت نصیب اوْو-دان غیابی صورتده تاثیر آلێپدێر. أن تانێنمێشی «قاراداغ چیچگی» آدلانان ۴-۵ هاوا یارادیپ. ژاپن، چین، آذربایجان جمهوریسی اؤلکه‌لرینده ایفالاری اوْلۇپ. عاشێق عوض عبادپور‘ن ۵۵ یاشێندالێق آغێرلاماسێ دا شرقی آذربایجانێ‌نێن فرهنگی هنری عاشێقلار انجمنی و حوزه هنری انقلاب اسلامی طرفیندن تبریزده گئچیریلمیشدیر.

@SancaqDergisi

ارسال دیدگاه