ویداع‌ لاشمیرام …! / قاسم نوربخش( غزللی)

أییر اوره‌ییمده سؤزلریم قالدی
أییر کی گؤزونده گؤزلریم قالدی
آیریلیق یولوندا دیزلریم قالدی
گیلئیلیک‌دن سنه ناغیل آشمیرام
گینه سئوه‌جه‌یم ویداع‌لاشمیرام

هئچ سئون‌، من کیمین حسرت قالمادی
منیم تک‌، اؤزونو اودا سالمادی
اوره‌ییم دؤیوندو قرار آلمادی
گیلئیلیک‌دن سنه ناغیل آشمیرام
گینه سئوه‌جه‌یم ویداع‌لاشمیرام

بوتون دونیالارین سئوگیسی منده
سئوگی دالیب جاندا هر بندی‌بنده!
سئوگیدن اؤلسم‌ده، سن سال کمنده!
گیلئیلیک‌دن سنه ناغیل آشمیرام
گینه سئوه‌جه‌یم ویداع‌لاشمیرام

دولورام-داشیرام سئومه‌جه‌لردن
داشا دولاشیرام سئومه‌جه‌لردن
داغا سیرماشیرام سئومه‌جه‌لردن
گیلئیلیک‌دن سنه ناغیل آشمیرام
گینه سئوه‌جه‌یم ویداع‌لاشمیرام

بیلیر‌سن باغلی‌دیر جانیم سئوگییه
مین بئله اودلانیم‌-یانیم سئوگییه!
قوربان اولسون آدیم-سانیم سئوگییه
گیلئیلیک‌دن سنه ناغیل آشمیرام
گینه سئوه‌جه‌یم ویداع‌لاشمیرام

احتراملار‌و تشککورلر
قاسم نوربخش( غزللی)

ارسال دیدگاه