گؤی اۆزۆ شیدیرقی‌لاییر / المیرا رضازاده

 

 

من

یاغیش آلتین‌دا

تراموایی گؤزله‌ییرم

هیزلا کئچن تراموا

منی خیالینا گؤتۆرۆر

چتیریمی یاغیشلیغیمین یانین‌دان آسلاییرام

دامجی دامجی

یاغیش یاغیر سن‌سیزلیک گۆرۆلده‌ین اوتاغیما

یاتاغیمین یانی باشین‌دا دوران گۆزگۆ سئل‌ده بوغولور

سن اوتورموش اوددوم اوددوم قهوه ایچیب، گؤزآلتی منه باخیرسان

سیزیلتی‌لاریما باخمایان آی

شاقیرتی چکیب

سنین قولاغینا پیچیلداییر

سن گۆزگۆیه توخونوب

یوخ اوْلورسان

قهوه‌نی آی بیتیریر

من، دلیجه باغیرتی‌لاریما اویانیرام

یاغیش دایانمیش

آی‌ایشیغی قارانلیغی سؤکۆر

سن

دووارداکی شکیل‌ده هله‌ ده گۆلۆرسن….

 

ائلمیرا رضازاده

 

 

 

ارسال دیدگاه