نظامی نین تورکجه دیوانی و اونا مخالف اولانلار

شوبهه سیزدیر کی گنجه لی نظامی بیر غیرتلی تورک شاعیر اولاراق، تامام اثرلرینده تورک خالقینا، اؤز وطنی آذربایجانا، گؤزل دیلینه حؤرمتله یاناشیب، دیوانیندا و تام اثرلرینده، یاخشی لیق، ایگیدلیک و بوتون گؤزللیک لره مالیک اولان انسانلارا تورک دئمیشدیر. نظامی حتی اسلام پیغمبری نی “تُرکی که میرِ هفت خیل است” عنوانیلا مدح ائدیر و او حضرتین معراجا گئتمه یینی را “ترکتازی” کیمی تعریفله ییر. آنجاق اؤز ایچیمیزدن اولان بیر سیرا ادیب لر، نظامی نین تورک و تورک سؤیلر شاعیر اولدوغونا اینانمایانلار دا واردیرلار. تأسوفله بونلار اؤز وارلیقلاری و کیملیک لرینی ایتیریب، دوشمانچیلیقلاری بیر ننگ لکه سی کیمی آذربایجان تاریخینه، ادبیاتینا دوشور.

   تازالیقدا گنجه لی نظامی نین تورکجه دیوانی – الیازامالار اساسیندا چاپ اولاراق، بو سیرادا اولان آداملارین سسی ائشیدیلیر و گاهدان ائله گولونج سؤزلر دئییرلر کی هر بیر کتاب اوخوموش و ادبی نقدیله تانیش اولانلارین الی اوزونه یاپیشیر. آخی بونلار هله کتاب پایلانمامیشدان، کتابی گؤرمزدن اونو داهاییرلار و دقت بویورمورلار بو کتاب هانسی اساس اوزوندن و هانسی الیازمایا دایاناراق یازییا آلینمیشدیر!؟ بو یازیچیلار اؤزلرینی ایرانشهری بیله رک، اؤزلرینی انتحار ائتمه یه جان آتیرلار و گونو-گوندن اولمایان آبیرلارینی دا آپاریرلار. چوخ ساده بیر مثال وورورام: بونلاردان بیری – هله کتابی گؤرمه میشدن و اوندا یازیلان و اثبات ائتدیرن سؤزلری اوخومادان، بو دیواندا اولان شعرلری گنجه لی نظامی­دن یوخ، بلکه قارامانلی نظامی یه باغلاییب و بیر سیرا یامان – یوغوز دا یازمیشلار. بو آداملار اؤز کؤکلرینی قازیرلار و فارسلا دئمیشکن: اؤز ریشه لرینه تئشه وورورلار. مثلا بیری بئله یازیب: نظامی نین خمسه دن علاوه هئچ بیر شعر نه فارسیجا و نه تورکجه یوخودور(؟!). بو آقا اؤزونه نئجه اجازه وئریر نظامی حاققیندا نظر وئرسین؟ آخی بیلیریک سعید نفسی نظامی نین “کلیات قصاید و غزلیات نظامی گنجوی” نی یازمیش و اورادا ۳۸ الیازما نسخه سیندن بهره آلمیشدیر. نفیسی دن علاوه باشقا ادیب لر – هامیسی دا فارس دیللی اولاراق نظامی نین فارسیجا دیوانینی تصحیح ائدیب و یاییملامیشلار. تهران اونیوئرسیته سی بو دیوانلارین نئچه سی نین ناشری اولموش. اؤزلرینی یازیچی – منتقد و ادیب سایان بئله بئله ایرانشهرلی لره نه دئمک اولار؟ بو آداملار – ادیب، روزنامه نگار و یازیچیلار – گنجه لی نظامی نی کؤکدن تانیمامیشلار، چونکی اونون خمسه سینه اؤته ری بیر نظر سالسایدیلار بونو بیلردیلر کی نظامی ۴۰ یاشینا قدر تکجه غزل و قصیده و باشقا ژانرلاردا شعرلر قوشموش و ۴۰ یاشیندان سونرا مثنوی یازماغا اوز گتیرمیشدیر. بو مساله نی دوشونمه ین کیمسه یه نئجه یازیچی دئمک اولار؟. هامی بیلیر و تامام دونیا ادیب لری – تکجه ایران و آذربایجان یوخ – دونیا ادیبلری، نظامی تانییانلار بیلیرلر کی نظامی بیشمیش بیر شاعیر اولدوقدان سونرا، داستانلاری اوچون طرح تؤکموش و بیر مانیفست یازمیش و سونرا خمسه یازماغا ال اوزاتمیشدیر. مخزن الاسرار اونون مانیفستی اولموش و بو مانیفستده اعلان ائتدیگی هدفینی قالان اثرلرینده داوام ائتدیرمیشدیر و نهایت اسکندرنامه ایله، سونوجا چاتاراق اؤز درین فلسفی باخیشلارینی قلمه آلمیشدیر و بو آرادا تکجه لیلی و مجنون اثری دیر کی اؤز یازدیغی مانیفستندن اوزاق دوشموشدور. آنجاق بونو یازمادا دا چالیشمیشدیر اعلان ائتدیگی مانیفستین باشقا بیر یؤنونو آچیقلاسین و بو ایشده باجاری گؤسترمیشدیر.

آنجاق بو ایرانشهری لرین بئله – بئله ساوادسیزجاسینا نظر وئرمه لری، اونلارین چیرکین و یانلیش یول توتدوقلارینی آیدین-آشکار صورتده آچیقلاییر.

عزیز دوستلار، یوزایلدیر بیزیم خالقیمیزی اؤز تاریخینی، ادبیاتینی و دیلینی اونوتماق اوچون، تحقیر ائتمیشلر، تاریخیمیزی تحریف ائتمیشلر؛ نهایت بوگون بیر سیرا آداملار – اؤز ایچیمیزدن اؤز وارلیقلارینا، منلیکلرینه مخالف اولموش و اؤز شخصیت لرینی دانیرلار. بئله آسیمیله اولان انسانلار، بیر قوت کیمی آذربایجانین قوجامان آغاجینی ایچه ریدن یئمه یه باشلامیشلار. آنجاق بونلار قاییدیب اؤز وارلیقلارینی تاپیب، اونا ایناناجاقلار؟ منجه تکجه بیر یول واردیر: بو انسانلار بیر بالاجا عقله گلیب، اؤزلرینه انسان کیمی باخیب، اؤز شخصیت لرینه ده یر وئرمکله اولابیلر. آرزی ائدیریک بو یئنی ایلده بئله انسانلار دا دوزگون یولو تاپیب، اؤز وارلیقلارینا قاییتسینلار. ایشاللاه!

ارسال دیدگاه