استاندارد ديل و لهجه نه دئمكدير؟ / دوکتور فیروز رفاهی علمداری

بوگون بئله بير ايمكانسيز شرايطده كي، بيزيم نه اوخوماغا يئريميز وار، نه اؤيرنميه اوجاغيميز دوزگون يازماغا چاليشماق هامينين بورجودور. دوزگون يازماغي أن بيرينجي بيزيم گنج يازارلاريميز و شاعيرلريميز اؤزلرينه مقصد ائديب باشقالارينا اؤرنگ اولماليديرلار. منجه دولغون و معنالي بير يازي اوندا كي، استاندارد و أدبي قايدالاردان اوزاق دوشور و لهجه كيفيتلري اونا داخيل اولور ، بير بينايا اوخشايير كي، اونون ايچينده هرجوره راحاتليق اوچون شرايط وار ، آنجاق ائشيكدن او بينايا باخاندا بير خاراباليغا اوخشايير. بئله بير بينايا هئچ كيمين گيرمه يي گلمير و اورايا آدديم باسماغي كيمسه آرزو ائتمير. يازيلاريميز دا گرگ بئله اولماسين . يازيدا فورم و معنا آراسيندا بير وحدت اولماليدير. گؤزل يازي معنالي و معنالي بير يازيني آنجاق گوزل يازماق ايله يارتماق اولار.

ايندي گئچك مقصديميزه. استاندارد ديل ايله آغيز ديلي آراسيندا اولان فرق بير ساوادلي آدام ايله ساوادسيز بيريسينين آراسيندا اولان فرق كيميدير. خصوصن اوندا كي، بيز بير يازيني باشقالارينا سونوروق و ايسته ييريك هامي اوندان فايدالانسين. بئله بير آندا يازيميزا چوق اونم وئريب و نئچه دؤنم اونو باشدان آياغا اوخومالييق كي، بيردن اورادا بير يانليشليق اولار و بيز بي آبير اولاريق. آخي آديني يازار قويان آدامين سيلاحي قلمدير و أير اونو دوز ايشلتمه سه اوندا بئله يازييا نئجه ديير وئرمك اولار. چاغيميزين بو زمانه سينده ، اينئرنئت بير وسيله كيمي هامينين ألينده بير سيلاح اولا بيلر. بو سيلاح بيزيم ديليميزي، مدنييتيميزي، تاريخيميزي قوروماق اوچون نهايتسيز بير ايمكان يارادير. بيز ده بو سيلاحي نئجه أله آليب وارليغيميزي قوروماق اوچون ايشه سالماغي اويرنيب باشقالارينا دا اؤيرتمه لييك. بئله بير حالدا بيزي بيرلشديرن ديلدير. واحيد يازي ديلي استاندارد ديل ساييلير. استاندارد ديليميز يولوندا چابالاريميز ايلك دؤرلردن يارانيبدير. اوندا كي بيز يازييا أل آتديق بو چابا داها دا گوجلندي. ايلر بويو ديليميز سئچمه و عوض ائتمه يولو ايله استاندارد ديل يارتماغي اويرندي. بو يولو بوتون ديللر عيني بير يولدا باشا چاتديريبلار. اونلار دا سئچمه و عوض ائتمكدن اؤز استاندارد ديلريني يارتماق اوچون فايدلانيبلار. استاندارد ديل شعورلو بير يارديجيليقدير كي، قليبلر شكلينده بئينيميزده فورمالاشير. أير بيز استاندارد ديلده يازيلان بير نئچه أثري اوخوساق ايستر-ايستمز بو قليبلر بيزيم بئينيمزه باتار و داها هئچ زامان اورادان چيخماز. بو بيزيم يكانه يولوموزدور كي، اونونلا استاندارد ديلي منيمسه يك و اينتئرنئت بو يؤنده بيزه يارديم ائدير.

   سؤزلري دانيشيق ديلده تلفوظ ائتدييميز كيمي يازاندا استاندارد ديلدن اوزاقلاشيب و لهجه ني ديله داخيل ائديريك. تصوور ائدين أير هره اؤز لهجه سينده يازسا اوندا بؤيؤك بير هرج-مرج اورتايا چيخار. باشقا ديللرده ده بئله دير. أير فارسجا يازاندا بيري سمنان، بيري كيرمان، بير ايصفاهان و ساير لهجه سينده يازسا كيملر بئله يازيني آنلايب باشا دوشر.

ارسال دیدگاه