دوکتور مجدفرین حیکایه دونیاسی / علیرضا ذیحق

اووسونچو ” حئكايه سينه باخيش

هونر دونياسي نين ياشار ليق سيرري باش وئره ن حاديثه لرين آرادان گئتمه سي نن سيخ ايلگي سي وار دير. نييه كي اجتماع و تاريخ ده اتفاق دوشه ن هر بير ماجرا دوز اوز وئره ن لحظه ده وارليقيني ايتي ره رك ، هونر له دويونله نينجه يوزلرجه ايل ياشامينا دوام وئرير. بو آرادا خيال واسيطه سيله حئكايه عالمينه دالان صنعتكار بير يازيچي ، حيات تجربه لريني اؤز دوشونجه و دونيا گؤزوشو دويغولاري ايله قاتاراق ، ياراتديقي شخصيت لر و اونلارين حركت لي رابيطه لري اساسيندا ، يئني آنلاملارلا مئيدانا چيخير . بئله ليك له ائله گيزلي و درين معنالار دوغولور كي اينسان ذهني نين گؤرونمه ين قات لارين دان يازيچي نين قلمينه آخاراق ، اوحئكايه ني يازمايينجا اونون اؤزونه عادي ياشام دا ، او جوره آچيق و ايدين دئييل دي.
مرتضي مجد فر ين ده حئكايه دونياسيني آراشديرماق ، ” اووسونچو ” آدلي حئكايه سينده بو اؤزل ليك لرين گؤركمي ني گؤرمك هئچ ده چتين اولمايير. حئكايه نين آدي چورويوب اَپريميش سئحيرلي بير اينانجي خاطير لاياراق ، “علم كماللي ، وارلي ، كارلي و بئيين خسته ليك لر متخصصي” اولان بير اينسانين مدرن حيات دان يورولوب بئزيشمه سي نين نوستالژيك تصويري دير . يازيچي بيزي اونون اوشاق ليقينا و يئني يئتمه ياشلارينا قايتاراراق ، كئچميش ده ايتميش هر بير صاف ليق و گؤزل ليگه ، ائل قايدا دب لري ني خاطير لاياق، جان وئريري. سو چيچگي و زيگيل چيخارتديقدا اونا اوزه رليك ساليب و بير اووسونچونون اونون اووسولاماسي و يارالارينا توپورمك له خسته لي گي نين ساغالماسي ، يادينا دوشه رك بؤيوك ننه سي نين ” سود كيمي آغ آبباغ چارقادي” بو دؤنه گرچك حيات دا يوخ بلكه ” چن ين ايچينده لاپ دورو و آشكار گؤزه چارپاراق ” حئكايه داها اؤز رئال ليقيني گئري ده قويور. ايندي دوقتور اولان اوشاق ” كئچه جك تصوير لري ، مبهم و بولانليق تصوير لر كيمي ” گؤرور و ” آلنين دا كيچيك – كيچيك چؤوزه لر گؤيرميش و گونو گون دن آرتاركن ” اؤزو و بوتون طبيب دوستلاري اونلارين درمانيندا عاجيز قالير لار . نييه كي بو يارالار اونون بدنينده اولسادا ، كؤك لري اونون روحوندادير. نييه كي كئچميشه قاييتدقدا ” اووسونچونون گوموش سسي قولاغيندا جينگيلده ركن ” نيسبي ساغليق و توختامالاردا آرايا گلير.
يازيچي بوحئكايه ده چوخ باجاريق لاائده بيلير بير شخصيتين ايكي وَجهلي چئره سينه جان وئره كي بير اوزو ، اؤزودور و باشقالاري كيمي ياشايان بير آدام و ايكينجي سي ده سنّت و مدرنيته ايله هله بير يوللوق باريشمايان تيپيك اينسانلارين سيماسي. او حئكايه ديليني بير كؤرپو ائدير كي ديشاري دونيانان يازيلي بير هونَري اثرين اوخوجولارلارمزلي و تأثير لي رابطه قورماسينا يارديم گؤسترير.
مرتضي مجدفرين حئكايه لري و اونلارين يئني ليگه دوغرو آدديم لايان فرم و محتواسي ، چاغداش آذربايجان حئكايه سينده داها ارتيق دقته لاييق دير و ” اووسونچو ” حئكايه سي تكجه بير اؤرنك كيمي قييمت لن مه لي دير .
___________________

*اووسونچو، حئكايه ، مجدفر ،مرتضي ، روزنامه همشهري / ۵/۱۰/۸۵ نومره ۴۱۶۸

ارسال دیدگاه