تورک اوغلو تورکم / معصومی

تانری داغلاریندان آخان بیر ایزم
نامردلر باغرینا چؤکن بیر دیزم

بیر اوجوم آلتایدیر بیر اوجوم قیپچاق
تمدن قورارام توپراغی تاپجاق

الله‌آ اوردویام اوردولار بیلسین
داغلارین قوردویام تولکولر گلسین

بوزقیردان بوزقیرا جوشوب آشمیشام
تاریخه اولایلار یازیب قوشموشام

قورقودلار قوینوندا قوپوز اولموشام
علسگر سازیندا سؤزه دولموشام

آلچاغلار اؤنومدن تولکو تک قاچیب
قارتالام ایزیمده قارغالار اوچوب

گؤزللیک تیمثالی بیزدن قالیبدیر
قوچاغلار ایلهامین بیزدن آلیبدیر

گؤزللیک پاییمدیر یئرده بن‌ایزم
اویغارلار قورماغا جوشان دنیزم

اولوسلار ایچینده سئچیب الله‌یم
ایگیدلیگ ائینیمه بیچیب الله‌یم

بیر یانیم اویغوردور بیر یانیم ماجار
قوزیدن گونییه ایزلریم اوچار

دوغودان باتی‌یا امریم اوجالیب
تاریخده ظالیمدان ایزیم باج آلیب

تانریدان گوج آلیب گوجه دولموشام
اؤلکه‌لر قورموشام قورال اولموشام

وئرمیشم یئرییش اینسان اوغلونا
دیللری دیلیمدن گلیبدیر جانا

تانرینین اردوسو تورک اوغلو تورکم
تانرینین قامچیسی پولاددان برکم

دونیایا سئوگییله باخان بیر گؤزم
آرازلار دیلیندن آخان بیر سؤزم

#اوردو: لشگر
#بوزقیر: دشت ، اووا
#قورقود: دده قورقود ، بایات بویوندان اولان اوغوز تورکلرین دونیادا بؤیوک و آدلیم یازاری
#قوپوز: عاشیق سازی
#اؤن: قاباق ، قانشار ، پیش
#بن‌ایز: خال
#اویغار: تمدن
#اولوس: بودون ، ملت
#قورال: قانون ، یاسا

#روح_اله_معصومی_آراز_انگورانلی
#تورک_اوغلو_تورک

ارسال دیدگاه