گولدورلو ولی – دونیاسینی دَییشدی

آذربایجان باشین ساغ اولسون.

گلدی گئدر دونیادان بیر شاعیر کوچدو.

قاراداغین سئویملی اوغلو، شاعیر اوغلو، شعیرینین بزه‌یینی داغ‌لارین زیروه‌سیندن آلان شاعیر، ناتورالیست باخیشلی، قارتال قانادلی شاعیر، صابیر ادبی انجومنی‌نین ادوار مودیره هئیتینین دیرلی عضوو، شاعیر ولی شاه‌محمدی «گولدورلی ولی» بوگون ۱۴۰۱/۳/۲۶ تهراندا امام حسین خسته‌خاناسیندا حیاتا گؤز یومدو.

«گولدورلی ولی» ۱۳۳۴_جی ایلین مرداد آییندا شاعیرلر، عاشیق‌لار… مسکنی اولان قارا داغین گولدور کندینده آنادان اولدو، گنج یاش‌لاریندان آنا یوردونون سحیرلی، طراوتلی طبیعتیندن ایلهام آلاراق، شعیر یازماغا باشلادی، ائله گنج ایکن باشقا یئرلی‌لری کیمی ایش تاپماق اوچون تهرانا کؤچمک مجبوریتینده قالدی. تهراندا اوزون ایل‌لر گولر اوزیله نقاش‌لیق صینفینده شهرداش‌لارینین، وطن‌داش‌لارینین ائولرینی بزه‌دی، عینی زماندا نقاش‌لارصینفی‌نین (اتحادیه صنفی نقاشان تهران)ده فعال بیر عضو کیمی چالیشدی. «شاعیر ولی» صابیر انجومنی‌نین تأسیسیندن نئچه

ایل سونرا صابیر انجومنینه قوشولدو، عاشق‌لار ایله گئنیش ارتباطدا اولدوغو اوچون صابیر انجومنی‌نین موسیقی بؤلومونه مسئول سئچیلدی. عینی زماندا انجومنین مودیره هئیتی‌نین سئچگی‌سینده صابیر انجومنی‌نین مودیره هئیتینه سیچیلدی. «شاعیر ولی» اون ایلدن آرتیق کؤنولو اولاراق بو مسئولیتده چالیشدی. ائل آراسیندا بئله بیر سوز وار “آدام گئدر، آدقالار” بوگون «گولدورلی ولی‌» بیزدن آیریلسادا، اونون خاطیره‌لری، اونودولماز شعیرلری، شعیرلرینه بسته‌لنن ماهین‌لاری ابدی اولارلق خالقیمیزین یاداشیندا یاشایاجاق.

«گولدورلو ولی»‌دن بئش کیتاب یادیگار قالیب:

۱-آغلی داغ

۲-قارتال قایناغی

۳-حسرت گوزگوسو

۴-لامپاسیز اوتاق

۵-دیوان «گولدورلی ولی»

و بیر سیرا شعیرلر کی هله ایشیق اوزو گؤرمه‌ییب‌لر.

ادبیات سئونلر ادبیاتمیزین سماسیندا واخت‌سیز وعده‌سیز آخان شاعیرین آجی آیریلیغینی ائلیمیزه، «گولدورلی ولی»نین عاییله‌سینه، صابیر انجومنینه، ادبیات سئونلره، شاعیرین قلم‌داش‌لارینا، قوهوم اقرباسینا اورک ائویندن باش ساغلیغی وئریر.

ادبیات سئونلر: ۱۴۰۱/۳/۲۶

 

لامپاسیز اتاق

چاغداش آزربايجان شعرينده، آري ديلده شعر يازان ائل شاعيرلري، ادبيات تاريخيميزين هر بير دؤنمينده اولدوغو كيمي، دوغما و طبيعي دانيشيق ديلي ايله، گؤزه‌لليك و حقيقت نغمه‌كاري اولاراق جمعيت ايچينده اؤزلرينه يئر و مقام قازانميشلار.

بو ائل شاعيرلري ايچينده، «گولدورلو ولي» قايغي و محبت كسب ائدن، اينجه روحلو و درين مضمونلو قوشمالار قوشان بير شاعيردير. الينيزده اولان كيتاب، اونون اوچونجو شعر مجموعه‌سي ساييلير. اونون قاباقكي ايكي كيتابيندا اولدوغو كيمي، بورادادا ديلي آري، لهجه‌سي دورو و شعر ايچه‌ريگي يوكسك معنالار داشييان عرفاني مضمونلاردير.

ايندي ساوادلي و بيلگين شاعيرلريميز آراسيندا آري و تميز ديلده شعر يازماق، مقدس بير آماج ساييلير. بو آماجا اولاشماق اوستونده ايسه، بعضاً داعوا – دالاشلاردا باش وئرير. ائل شاعيرلري ايسه بو بورولغانلارا دوشمه‌دن، طبيعي اولاراق سؤزلري آخارلي مصراعلارا دوزمه قابليتي الده ائديرلر. داها دوغروسو اونلاردا بو قابليت اؤزوده طبيعي‌دير. الينيزده اولان كيتابين هر يئريني آچيب اوخوسانيز، سانكي شاعير سيز ايله دانيشير:

قويما شوشه كيمي سينيب تؤكولم،

ايلمه كيمي اؤز – اؤزومه سؤكولم.

قوي بولبول تك من‌ده گوله بوكولم،

سئوديگيم گتيرمه ديلينه يوخ، يوخ!

بئله بير قابليت الده ائتمه، بؤيوك بير نعمت و شرف ساييلير. بئله بير مقاما چاتماق، يعني اوخوجو ايله عادي و دانيشيق ديلي ايله، ساده و آري دانيشماق هر شاعيرين اوره‌ك آرزوسودور.

اوسته‌ليك، «گولدورلو ولي» نين شعر ايچينده بسله‌ديگي عشق ايسه، تام باطيني و عرفاني عشقدير. درين معناسي اولان و ظاهيري سئوگيلردن اوزاق دوران بير محبت درياسيدير.

او، «تجلي»دن دانيشان و «كرملي شاه» آدلانديرديغي مولاسينا اينانان عارفدير. شاعيرين جمخانالاردا طنبور هاوالاري ايله اوخونان بير چوخ «كلام»لاري‌دا واردير.

من، بير داها گولدورلو ولي‌نين اويناق لهجه‌لي شعر مجموعه‌سيني اوخوماغا توفيق الده ائتديم. اونون بو مجموعه‌ده، باشقا ائل شاعيرلري ايله‌ده دئييشمه‌لري نشر اولموشدور. سؤز يوخ كي شاعير ايللر بويو آخيجي و روان لهجه‌لي شعرلري ايله اوركلريميزي اوخشاياجاقدير.

دوكتور ح. م. صديق تهران – ۱۳۸۷

ارسال دیدگاه