آذربایجان یئنه شرفلی بیر اوغلونو الدن وئردی: انور چنگیز اوغلو

آذربایجان و تورک‌ دنیاسی‌نین بؤيوك‌ اوغلو، تانینمیش آراشدیرماچی، تاریخچی، اتنوگراف، ژورنالیست و فولکلورشناس، ۸۰-ه یاخین کتابین، یوزلرجه مقاله‌نین مؤلفی، انور چینگیزاوغلو حقّین رحمتینه قوووشوب.  بو بؤیوک انسانین اؤلوم خبرینی آلماق دوغرودان دا جان‌آلیجی بیر حادثه‌دیر.  قیمتلی چالیشمالاری یاریمچیق قالدی. چوخ آلچاق‌کؤنول‌لو و گؤزل بیر انساندی. گئرچک بیر تورکچو و آذربایجان سئودالیسی بیر تدقیقاتچی‌یدی. اثرلری‌نین چوخو جنوبی آذربایجانلا باغلی‌ اولوبدور انور معلمین. سون زمانلاردا “خوی خانلیغی” آدلی مونوگرافیسی اوزرینده چالیشماقدایدی. دئیه‌سن بیتیرمک اوزره‌یدی. رضا پهلوی دورویله علاقه‌لی ده بیر اثر حاضرلاماقدایدی. قسمت اولمادی… دوغرودان دا عمرونو بو مقدس یولا حصر ائتمیشدی انور معلم. اوبرازلی بیر دیل‌له دئسک: “تورکلوک و آذربایجان اوچون یاشادی و  اؤلدو”. اومورام ارثینه لیاقتله صاحب چیخا بیلریک، اومورام شرفلی یولونو دوام ائتدیرمک بیزه ده نصیب اولار. انور معلم هامی ایله مهربان ایدی، اوندا کین-کدورت، پاخیل‌لیق، منم-منلیگی بیر کنارا ایته‌له‌ییب وطن، ملت، ملی ایده‌آل اوغروندا چالیشیردی، و نهایت شان و شرفله عمر سوردو. چالیشاق انور معلم کیمی دوستلوقلا، بوراخدیغیمیز اثرلرله خاطرلاناق… یوردون تانریم داغلاری اولسون، معلم. گوله گوله تورکون خلف اوغلو…

ارسال دیدگاه