پروفسور دکتر حسین محمدزلده صدیق ابدیته قووشدو

✍️کاظم حبیبی

چوْخ چالیشقان و یوْرولماز گؤرونن بو یازار، آراشدیرماجی ، دیلچی، شاعر و چوْخ سایدا کتابلارین چئویره‌نی اوْلان، آدلی-سانلی اوُزمان (استاد)، گوُنش ایلی ۱۳۲۴-ده تبریزین “سرخاب” محله‌سینده دونیایا گؤز آچمیشدیر. دۆزگون، ۱۶ یاشینا چاتینجا اؤز گۆجو و چالیشمالارینا دایاناراق زرتشتی‌لرین “اَوستا” کتابی‌نین الفبا و دیلینی اؤیره‌نیر. بو ایسه اوْنون چوْخ چالیشقان و اراده‌لی اوْلدوغونو گؤستَریر.
اوْ، ایراندا بیر پارا تحصیلاتینی بیتیردیکدن سوْنرا ، استانبولا گئدیر و ۱۳۶۲-جی ایلده استانبول اونیورسیته سیندن PH.D درجه‌سینی آلیر. سایین اوُزمان بو علمی درجه‌نی الده ائتدیکدن سونرا ، قوْنشو اؤلکه‌لردن اوْنا چاغیریش وئریلیر و حتی کانادا اؤلکه‌سیندن ده، اقامت اۆچون بیر دعوت گلیر، آما اوْنلاری قبول ائتمه‌ییب ایراندا قالیر، اؤز آنا دیلى و آذربایجان ادبياتينا گره‌کلی اوْلان ایشلری گؤرور.
اوستادین اؤنملی یازیلاریندان، اؤرنک اوْلاراق، بیر نئچه‌سینى بورادا گؤزدن کئچیریریک.

یازی و آراشدیرمالاردان:
یادمانهای ترکی باستان، آذربایجانین شهید عالیملری، شرح غزلهای صائب تبریزی ، سیری در اشعار ترکی مکتب مولویه و …

شعرلردن:
اردبیل لوحه لری، اوچغون داخما، یورد غزللری و …

ترجمه لردن:
دیوان لغات الترک، دیوان و وصیتنامه امام(ره) ، ابوالعلاء معري‌نين فخريه قصيده سي، توحيده چاغری (دعوت به توحید) و …

تصحیح لردن:
سنگلاخ، محاکمة اللغتين، گلشن راز شبستری به روایت شیخ الوان ولی شیرازی(تۆرکجه) و …

تنقيدى یازیلاری:
ژستهای علمی ترکی ستیزان ، چون غرض آمد هنر پوشیده شد، بازی‌های باستان شناسی پان ایرانیسم ها بر علیه مدنیت ترکی و …

یوخاریدا وئردیگیمیز اثرلر، بؤیوک بیر دنیزدن، بیر داملادیر. چۆنکی “دۆزگون” ایندییه‌دک، ۳۰۰ دن آرتیق کتاب و رساله لرین یازاری، ترجمه‌چی‌سی و تصحیح ائده‌نی اوْلموشدور. ان آزی ۱۰۰۰ دنه مقاله، ۱۰-لارجا نشریه و بوُنلارا، ۱۰-لارجا علمی کنفرانس و ییٛغینجاقلار اۆچون یازدیقلارینی دا، آرتیرماق اوْلار. بونلاری بۆتونلوکده گؤز اؤنونه آلیرساق، اوْندا “دۆزگون”-ون نه بوْيدا گئنیش و اطرافلی ایش گؤردوگونو بیر آز بیلمیش اوْلاریق.

بونلاردان باشقا، اوُزمانیمیز، عارف بیر انسان اوْلوب اؤز عرفانی محفل‌لرینده، چوْخ سایدا اؤیره‌نجی تربیت ائتمیشدیر. “دۆزگون”-ون عرفان اؤیره‌نجی‌لری “رها” لقبینی اوْنا وئرمیشلر و بیر نئچه کتابلاری یازماقلا، (ادراکات، نجوای سکوت، اندر یافت نو)، بوُ یؤندن ده دۆزگونو تانیتدیرماق ایسته‌میشلر. گؤردوکلری باشقا ایشلردن ده، اوستادین قیسا سؤز و اؤیودلرینی، ایکی کتابا توْپلامیش و “روزها با استاد” ، “قدم به قدم با استاد” آدلاری آلتیندا چاپا وئرمیشلر.
اوستادی تانیماغا ان دوْغرو یوْل، اوْنون کتابلاریندان اوْخوماقدیر. بئله‌لیکله اوْندا، سیز دوْغرودان دا “دۆزگون”-ون، بیر دۆزگون اوُزمان اوْلدوغونو گؤره‌جک‌سینیز. البته دئمه‌لییم کی بو یازی اوستادا بیر يؤندن و بير یاندان باخماق کیمی‌دیر، اوْنو هئچ ده يئتَرينجه تانیماق دئییل. سانکی بؤیوک بير دنیزین قیراغیندا دوُروب بیر بوُجاغينا باخماقدیر.

ارسال دیدگاه