اۆزۆم یارپاقلاری / رضوان_حاجی‌قاسملو (جانای)

باغچامیز چوخ گئنیش‌ایدی، هر یاندا آغاج اکمیشدیلر، باغچایا چپر یئرینه همرسین سالمیشدیلار، اودا سکییب، گؤیلوجا دولانمیشدی. یازدان آی کئچیب کئچمه‌میش یئمک اوچون مئیوه‌ واریدی، آلچادان اریک‌دن آلمادان هابئله هولو، هئیوا، گیردکان، سوماق، بوللو اوزوم اوزون سؤزون قیسساسی اللرینه گلن آغاجدان بئجرتمیشدیلر. آنام باغ ایشینه چوخ ماراقلییدی. هر ایش ده الیندن گلردی. آغاجلارین دیبین دئشه‌لمک‌دن توت داللاماغا کیمی، من ده یانیجا دولاناردیم، آنا بالا هم ایشلردیک هم دانیشاردیق، آنامین چوخ گؤزل ناغیللاری واریدی، بئله شیرین دانیشاردی سانکی دانیشدیغین اؤزو یاشاییب.
کئچن قیش یامان کئچمیشدی، ایتی یئل قیه‌مه‌لری قیریب توکموشدو تنه‌که‌لری یئره سرمیشدی، آنام دولگار چاغیرمیشدی یئنی دن قیه‌مه قورا، منده دولگارلا بیرلیک ده ایشلییردیم. چای چؤرک آپاریردیم آغاج گتیریردیم الیمدن گلن دا. آخشام آنجاق ایشیمیز باشا گلدی دولگارین حئسابین وئریب یوللاندیردیق، ایشلر آنامین گؤیلونا یاتمیشدی. اوتوردوق چای ایچیب دینجه‌لک. باغا گؤز دولاندیردیم چوخ گؤزل اولموشدو آما بیر سووال بئیتیمده کوفلانیردی، آنامدان سوروشدوم:
نییه بوتون آغاجلار اؤز آیاقلاری اوسته دوروبلار آما اوزوملر دایاناجاق یئر ایستیر؟ آنام فینجانین دولدوروب بئله دانیشدی:
اوزون زامان اؤنجه تنه‌که‌لر ده اوبیریسی آغاجلار سایاق اؤزلری دوراردیلار، اوزوم‌لر سالخیملاناندا سانکی اولکردیر آی ٱووجوندا، آما گرک واختیندا دریردین، گئج قالسایدین اووخالانیب توکولردیلر. یارپاق‌لاری دا بئله آجی چالاردی ‌ مال- حئیوان دا یئمزدی.
بیر ایل یاز، چوخ یاغیشلی اولوب هر گون ایلدیریم شاخیرمیش دولو یاغارمیش، بول بلالی بیر یازیمیش! اوزومون ده بوداغینین بیرینده گؤزل قوش یوواسی واریمیش ایلدیریم شاخاندا بیردن بو یووانی اود بورویر، یازیق آنا قوش للک‌لری کؤزله‌نر یوواسی داغیلماقدا بیردن بوداق دان یووارلانار. آغاج گؤرر وای هم قوش اؤله‌جک هم یومورتالار سینیب داغیلاجاق! بیررگؤز قیرپیمیندا أییلر قوشو، یووانی قوروسون، تام یئره اییلمیش‌کن ایلدیریم آغاجی بورویر. هوندور آغاج یئره گلنده کؤکو تورپاقدان چیخار ائشیگه آما قوش دا ساغ قالار یومورتالاردی دا.
سحر سحر باغمان گلیب گؤرر آی آمان نه واریدی باغدا ایندی نه اولوب! ها گوج وئرر آغاجی قووزایابیلمز. گتیرر بوداقلارینا دایاق وئرر أن آزی یئرده قالیب قوروماسین. او ایل آغاج چوخ اینجییر آیاق اوسته دورابیلمز، باری دا داغیلیب گئدر. بو اولایین سؤزو یئتیشر آغاجلار تانریجاسینا. گلر اوزومون یانینا گؤرر او گؤزل آغاج ایلان سایاغی قالیب یئرده هنده‌ورینده ده نئچه فره دولانیر، آغاجا دئیر بو مهریبانلیغینا خاطیر ایلین باشا باشیندا سنین آدینی دیللر ازبری ائلییرم، یازدا یارپاغینا طاماحلاری اولسون سونرا کال اوزوملریندن فایدالانسینلار اوزوملرین داد آلینجا یئییلسین قوروشقاسا یئمیش اولسون چیی ازیلسه اولوسون گؤیلوجا چاخیر اولسون یا سیرکه بیشرسن‌سه دوشاب اولسون، ایستیین میلاق آسسین. ایلی باشدان باشا ائولری دولاناسان. بئله‌لیک‌له اوزوم تنه‌که اولار قیه‌مه ایستر.

🔹آچیقلامالار؛

سکییب: یئرین آلتیندان کؤک آتیب چوخالان بیتگی‌لر
همرسین: نسترن
قیه‌مه: پایه‌ای که برای بعضی درختان مثل درخت انگور و کیوی درست می‌کنند.
دولگار: نجار
تنه‌که: بوته و درخت انگور

ارسال دیدگاه