اوتانسین / جواد فضلی

يانار بير اوجاغی سؤندورن ظاليم
اوجاق صاحبی هئچ كؤزدن اوتانسين
اؤزون يئكه بيليب بؤيوك تانييان
مردليگه وئرديگی سؤزد‌ن اوتانسين

حقيقت بير رنگدی هئچ وعده سولماز
عؤمور كی بوشالدی دای يئری دولماز
طبيعت قانونون دَييشمه‌ك اولماز
اوز اَتدن اولوب كی اوزدن اوتانسين

يئكه‌نين خطاسی يئكه ‌ده اولور
كيچييين خطاسی تيكه‌ده اولور
گؤزون كی دقّتی لكه‌ده اولور
لكه هاردا وارسا گؤزد‌ن اوتانسين

واختيندا يارانار شعريله غزل
دوزو سئويرسن‌سه اؤزونده دوزَ‌ل
غيرتده گؤزلدير عصمتده گؤزل
قيز اوغلاندان اوغلان قيزدان اوتانسين

قاباقدا گئده‌نين باشی بَلله‌نَر
باشی آغارانين ياشی بَلله‌نَر
آدام وار اؤلسه‌ده داشی بَلله‌نَر
شؤهرت آختارانلار ايزد‌ن اوتانسين

غيرتله ياشاييب كئچميش بابالار
ياخش ‌ن يامانی سئچميش بابالار
زامان اَلَگيندن كئچميش بابالار
دئييبلَر نوه‌لر بيزد‌ن اوتانسين

آللاه حكمتينه صبرينه شوكور
گؤيدن قارا بولوت آغ ياغيش تؤكور
هر كس سنين بنده‌ن قارنينی سؤكور
بيزدن ده قورخماسا سيزد‌ن اوتانسين

اؤلكه‌نين تاريخين واراقلاياندا
اؤز يئرينده دوروب خاندا خاقاندا
آذربايجان نه‌لر چكيب جهاندا
تاريخ گَرك بو تبريزد‌ن اوتانسين

اسرافيل دونيايا گلميشدين نييه
كاشكی يارانايدين يا داش يا قَيه
بير نفر ياواشدان قولاغا دئيه
هر كس اَيری ‌ديرسه دوزد‌ن اوتانسين

ارسال دیدگاه